„მნიშვნელოვანია, რომ პირდაპირი უცხოური ინვესტიციები იზრდება და ადრე არსებული ნეგატიური დინამიკა შეცვლილია. მნიშვნელოვანია, რომელ დარგებში ხდება ზრდა. პირველ რიგში, ესაა საფინანსო სექტორი. ასევე, ეს არის ენერგეტიკა, რომელიც კვლავინდებურად ერთ-ერთი ყველაზე მიმზიდველი დარგია საინვესტიციოდ, აგრეთვე ესაა გადამამუშავებელი მრეწველობა და ტრანსპორტი. საყურადღებოა პირდაპირი უცხოური ინვესტიციების გეოგრაფია. ძირითადად, საუბარია ევროპულ სახელმწიფოებსა და თურქეთზე“, – განაცხადა ეკონომიკის მინისტრმა ნათია თურნავამ.

მთავრობის სიამაყის საფუძველი 2021 წლის იანვარ-სექტემბერში წინა წელთან შედარებით, როდესაც მკვეთრი ვარდნა დაფიქსირდა, პირდაპირი უცხოური ინვესტიციების მოცულობის 3.2 პროცენტით ზრდაა. 9 თვეში საქართველოში შემოსული 728.4 მილიონი აშშ დოლარიდან 84% სინამდვილეში რეინვესტიციაა.

საქართველოს ეკონომიკის და მდგრადი განვითარების მინისტრის ყოფილი მოადგილე ქეთი ბოჭორიშვილი მიმდინარე წლის ინვესტიციების შემოდინების შეფასებისას, განსაკუთრებულად ხაზს იმ გარემოებას უსვამს, რომ რეინვესტირების მაჩვენებელი გაზრდილია.

„ინვესტიციების შემოდინების შარშანდელი, ისტორიულად დაბალი მაჩვენებლის მცირედი გაუმჯობესება უკვე მნიშვნელოვანია. ვთვლი, რომ ზრდის ტენდენცია კარგია. რეინვესტირებას დიდ ადგილი უჭირავს, რაც იმას ნიშნავს, რომ არსებული ინვესტორები აგრძელებენ ქვეყანაში ინვესტირებას, რაც მნიშვნელოვანია, მაგრამ ამავე დროს მათ უნდა ჰქოდნეთ იმედი, რომ ჩვენს ქვეყანაში ინვესტიციის ჩადება მომგებიანია. სამწუხაროა, რომ ბიუროკრატიული პროცედურების გამო ბევრი პროექტი შეჩერებულია, განსაკუთრებით ენერგეტიკის მიმართულებით“, - ამბობს ქეთი ბოჭორიშვილი.

„ეკონომიკური ტრანსფორმაციის ცენტრის“ პრეზიდენტი, რამაზ გერლიანი „კომერსანტთან“ ინვესტიციების კლების ტენდენციაზე საუბრობს და ამბობს, რომ მეგა პროექტების გაჩერებამ საქართველოს ბევრი ინვესტორი დააკარგინა.

„ის, რომ ზრდა არის, ცუდი ნამდვილად არაა, მაგრამ გააჩნია რასთან შედარებით გვაქვს ეს ზრდა. თუ დავაკვირდებით ნორმალურ პერიოდებს, მასთან შედარებით კლებაა. სამწუხაროდ, მაღალი პიკური მაჩვენებლები როცა გვქონდა, მათთან შედარებით დაბალია. კლების ტრენდი წლებია გვაქვს და ეს იმის ბრალია, რომ სტაბილური ეკონომიკური პოლიტიკა არ ტარდება, მრავალი შეცდომაა რეგულაციების მიმართულებით. ასევე გავლენას ახდენს მნიშვნელოვანი პროექტების ჩაგდება, რომლებმაც ქვეყნის იმიჯი მეგა დონეზე ძალიან კითხვის ნიშნის ქვეშ დააყენა და სერიოზული ინვესტორები დაკვირვების რეჟიმში გადაიყვანა. აქ ვგულისხმობ იმას, რომ ერთი და იგივე მთავრობის რეჟიმში, კაბინეტების ცვლილების შედეგად მრავალი პროექტის მიმართ დამოკიდებულება იცვლებოდა, ეს იქნება ანაკლიის პორტი, ციფრული ჰაბის თუ ნამახვანჰესის პროექტი. არ ვამბობ ეს პროექტები მიზანშეწონილად შეჩერდა თუ არა, აქ მთავარია რომ ორივე შემთხვევაში, დაწყება ამ მთავრობის პირობებში მოხდა და გაჩერებაც მათ პერიოდში ანუ არათანმიმდევრული ნაბიჯები იდგმებოდა. ამ შემთხვევაში დაწყება და შემდეგ გაჩერება ვნებს საინვესტიციო გარემოს, პრემიერების ცვლილება მეგაპროექტების გაჩერებას იწვევდა, ამიტომ ინვესტორი დაფიქრდება, გადავა დაკვირვების რეჟიმზე, რადგან ყველამ იცის, რომ კერძო სექტორი არის სუსტი და მნიშვნელოვანია მთავრობასთან მოლაპარაკებები.

რეინვესტიცია კარგია, გარკვეული სტიმულების შექმნა არსებული ინვესტორებისთვის საჭიროა, მაგრამ ამ შემთხვევაში ახალი ინვესტიციები გვჭირდება. სრულდება ძველი მეგა პროექტები და ხდება დიდი ვარდნა, არავინ ფიქრობს ეს პოლიტიკა ისე იყოს დაგეგმილი, რომ მეგა პროექტის დამთავრების შემდეგ, გადაბმადი იყოს ახალი და მკვეთრი ვარდნა არ დაგვიფიქსირდეს“, - განმარტავს რამაზ გერლიანი.

Galt&Taggart-ის მიმოხილვის მიხედვით, წინასწარი მონაცემებით, საქართველოში განხორციელებული პირდაპირი უცხოური ინვესტიციები წლიურად 1.4%-ით გაიზარდა 299 მლნ აშშ დოლარამდე 2021 წლის მე-3 კვარტალში, წინა კვარტლის 23.9%-იანი ზრდის შემდეგ.

აღსანიშნავია, რომ მესამე კვარტალში ქვეყანაში შემოტანილი პირდაპირი უცხოური ინვესტიციების კუთხით პირველ ადგილზე გაერთიანებული სამეფო იყო 60.9 მლნ აშშ დოლარით, შემდეგ მოდიან – ნიდერლანდები და ჩეხეთის რესპუბლიკა – 59.8 მლნ და 36 მლნ აშშ დოლარით. მეოთხე ადგილზე – აშშ 29.6 მლნ აშშ დოლარით, შემდეგ თურქეთი – 24.2 მლნ აშშ დოლარით; მალტა – 15.8 მლნ აშშ დოლარით; საფრანგეთი – 14.5 მლნ აშშ დოლარით; სეიშელები – 13 მლნ აშშ დოლარით და რუსეთი – 12.5 მლნ აშშ დოლარით.

ნინო თამაზაშვილი