„ქვეყანაში პოზიტიური დინამიკაა, ჩვენ გვაქვს უპრეცედენტო ეკონომიკური ზრდა“ - ამის შესახებ ირაკლი ღარიბაშვილმა მთავრობის დღევანდელ სხდომაზე განაცხადა. პრემიერ-მინისტრმა თქვა, რომ ისეთი ეკონომიკური ზრდა როგორიც საქართველოშია ძალიან ცოტა ქვეყანას აქვს. მისივე განმარტებით, ბრატისლავაში გლობალური უსაფრთხოების ფორუმზე ევროპელი კოლეგები მისი და ეკონომიკის მინისტრის საუბრებს გაოცებულები ისმენდნენ:

„ვაგრძელებთ ეკონომიკის განვითარებას, ქვეყანაში პოზიტიური დინამიკაა, ჩვენ გვაქვს უპრეცედენტო ეკონომიკური ზრდა. ჩემი ევროპელი კოლეგები გაოცებულები ისმენდნენ ჩემი და ლევან დავითაშვილის საუბრებს - სულ ახლახან ვიყავით ბრატისლავაში. ასეთი ეკონომიკური ზრდა მსოფლიოში ძალიან ცოტა ქვეყანას აქვს. პირველი კვარტალი ჩვენ დავხურეთ 14 %-იანი ეკონომიკური ზრდით და 4 თვეში ჩვენ გამოგვივიდა 10,8 %. რაც რა თქმა უნდა არის ძალიან სასიხარულო. შარშან აპრილში ჩვენ გვქონდა თითქმის 45 %-იანი ეკონომიკური ზრდა,  ჩვენ არ ველოდით ეკონომიკის ზრდა, მაგრამ ამის მიუხედავთ მაინც გვაქვს დადებით დინამიკა. სრულად აღდგენილია ფრენები, ტურიზმის აღდგენა მიმდინარეობს ძალიან სწრაფად, სავსეა ჩვენი ქვეყანა ტურისტებით და ეს გვახარებს. ექსპორტი იზრდება, ძალიან კარგი დინამიკაა, ბიზნესის ბრუნვა წინა წილის ანალოგიურ პერიოდთან შედარებით გაზრდილია და შეადგინა 38.6 მლრდ. ლარი. ბიზნეს სექტორში სამუშაო ადგილების რაოდენობაც გაზრდილია, ხოლო საშუალო ხელფასის ოდენობაც 15% არის გაზრდილი. ასევ გეტყვით რომ სიღარიბის დონე  ამ წლებში ისტორიულ მინიმუმზეა ჩამოსული - 17,5 % შეადგინა - ასეთი შემცირება ბოლო წლების განმავლობაში არ ყოფილა.შედარებისთვის გეტყვით, რომ 2010 წელს 38 % იყო სიღარიბის დონე.  ეს ჩვენ არ გვაკმაყოფილებს, რა თქმა უნდა მეტი უნდა გავიკეთოთ. ინფლაცია არის მთელი მსოფლიოსთვის, თურქეთში 73 % -ია , ევროპაში ისტორიულ მაქსიმუმზეა, მოლდოვაში 27, ესტონეთში 18, რუსეთში 17, მეზობელ ქვეყნებში ორ ნიშნა ინფლაციაა, აზერბაიჯანში 12, სომხეთში 8 %-ია. ეს არის რეალობა რომელშიც ჩვენ ვართ“, - განაცხადა ირაკლი ღარიბაშვილმა.