პრემიუმ შოკოლადის შვეიცარულმა მწარმოებელმა, Lindt & Sprüngli Group-მა რუსეთის ბაზრიდან გასვლის გადაწყვეტილება მიიღო. კომპანიამ პირობა დადო, რომ მხარს დაუჭერს თავის თანამშრომლებს რუსეთში და ბიზნესს ადგილობრივი კანონების შესაბამისად შეწყვეტს. კონკრეტულად რა იგულისხმება, კომპანია განცხადებაში არ განმარტავს.

Lindt-მა რუსეთში მიწოდება ჯერ კიდევ მარტში შეწყვიტა და თავისი ფლაგმანი მაღაზიები დახურა. კომპანიამ მაშინ განაცხადა, რომ თანამშრომლების ფინანსურ მხარდაჭერას განაგრძობდა. რუსეთში მუშაობის შეწყვეტის მიზეზი Lindt & Sprüngli Group-ს არც მარტში დუსახელებია და კომპანია ამას არც ამჟამად აკონკრეტებს.

2019 წელს ფედერალურმა ანტიმონოპოლიურმა სამსახურმა Lindt, ასევე, ბრენდები, Persil და Ariel იმის გამო გააფრთხილა, რომ უწყების აზრით, რუსეთში გაყიდული პროდუქცია ხარისხითა და შემადგენლობით საზღვარგარეთ გაყიდულისგან განსხვავდებოდა. თუმცა 2021 წლის აპრილში „ანტიმონოპოლიურმა“ განაცხადა, რომ ვერ აღმოაჩინა მტკიცებულება, თითქოს, რუსეთში გაყიდული Lindt-ის შოკოლადი ევროპული ნიმუშებისგან განსხვავდებოდეს.

საკონდიტრო მრეწველობის საწარმოთა ასოციაციის მონაცემებით, 2021 წლის ბოლოს რუსეთი შოკოლადის ექსპორტიორთა მსოფლიო რეიტინგში მეათე ადგილზე იყო და შვეიცარიასაც უსწრებდა. ასოციაციამ მოიყვანა გაეროს საერთაშორისო სავაჭრო ცენტრისა და UN Comtrade-ის მონაცემები, რომლის მიხედვითაც, რუსული შოკოლადის ექსპორტმა 2020 წლის სექტემბრიდან 2021 წლის სექტემბრამდე 838,5 მლნ დოლარი შეადგინა.

ბიზნესპრესნიუსი