,,იაგოს ღვინო“ საქართველოში არტიზანული მეღვინეობის საუკეთესო მაგალითია. ათ წელიწადში ათჯერ გაზრდილი წარმოების და დიდი პოტენციალის მიუხედავად, ქართული ბრენდი საქმიანობას მცირე მარნის სტატუსით აგრძელებს. ბიოღვინოს მწარმოებელი კომპანია მთლიანად ექსპორტზე მუშაობს. როგორც კომპანიის დამფუძნებელი იაგო ბიტარიშვილი ,,კომერსანტთან“ ამბობს, მომავალ წელს აპირებს ვენახების გაფართოებას და შემდეგ უკვე ახალი, რიგით მეორე საწარმოს შექმნას, რის შემდეგაც პრემიუმ ღვინის მწარმოებელი ცნობილი ბრენდი ადგილობრივ ბაზარზეც გაიყიდება.
,,მცირე მარნის ხაზს მივყვებით, ჯერჯერობით ასეა და ამ მხრივ არც მომავალში ვაპირებთ ცვლილებას, სტატუსს ბოლომდე შევინარჩუნებთ. ეს ჩვენი არჩევანია, ვაწარმოებთ ნატურალურ ორგანულ ღვინოს და პროდუქტს მხოლოდ ექსპორტზე ვყიდით. სიმცირიდან გამომდინარე, ადგილობრივ ბაზარზე ჯერ არ ვართ წარმოდგენილი. მომავალ წელს ვაპირებთ ახალი ვენახების გაშენებას, შემდეგში ახალ საწარმოსაც გავხსნით. უკვე 2025 წლისთვის შეიძლება ადგილობრივ ბაზარზეც შემოვიდეთ. ოფიციალურად არ გვაქვს ადგილწარმოშობის სტატუსი, მაგრამ ჩვენთვის ის მახასიათებელი, რაც ჩვენს ადგილს აქვს (მცხეთა, სოფელი ჩარდახი), ჩვენს ღვინოშიც გამოიხატება. მთლიანად შევინარჩუნეთ ტექნოლოგია, რომელიც ღვინის ბუნებრივად წარმოებას გულისხმობს. ეს არის არტიზანული მეღვინეობაც – ადამიანისა და ხელოვნების კავშირი. ვცდილობთ, რაც შეიძლება მეტად განვავითაროთ ეს მიმართულება, ათზე მეტ ქვეყანაში ვახდენთ ჩვენი ღვინის რეალიზაციას და გვყავს ძალიან ბევრი პარტნიორი და იმპორტიორი“, - ამბობს იაგო ბიტარიშვილი ,,კომერსანტთან“.
რაც შეეხება პანდემიის შემდგომ პერიოდს და უკვე უკრაინაში მიმდინარე ომის გავლენას, ბიტარიშვილის თქმით, გარკვეული გამოწვევები არსებობს, თუმცა ჯერჯერობით ექსპორტზე ,,იაგოს ღვინოს“ პრობლემა არ შეჰქმნია და ოპერირებას ჩვეულ რეჟმში აგრძელებს.
,,გამოწვევები შეგვეხო გარკვეულწილად, თუმცა ღვინის სეგმენტი ერთ-ერთი გამონაკლისი გამოდგა საქართველოს ეკონომიკისთვისაც, რომელმაც შეინარჩუნა საექსპორტო პოტენციალი. ეს ადასტურებს, რომ ქართული ეკონომიკისთვის მეღვინეობა ძალიან მნიშვნელოვანია და დიდი საექსპორტო პოტენციალით გამოირჩევა. თუმცა გარკვეული გადაწყობა მოგვიწია, ზოგ ქვეყანაში მეტი გავიტანეთ პროდუქტი, ზოგან ნაკლები, ლოგისტიკაც გართულდა, მაგრამ ექსპორტში წყვეტა არ გვქონია“, - ამბობს ცნობილი მეღვინე ,,კომერსანტთან“.
იაგო ბიტარიშვილმა ორგანული ბიომეურნეობის განვითარება 1998 წელს, 2003 წლიდან უკვე ბუნებრივი ნატურალური ღვინის წარმოება და ქვევრის ღვინის ჩამოსხმა დაიწყო; თავდაპირველი წარმოება წლიურად 600 ბოთლ ღვინოს შეადგენდა და დღეს უკვე 6000 ბოთლი ისხმება. პირველი ბიო სერტიფიკატი ,,იაგოს ღვინომ“ 2004 წელს მიიღო. ვენახი გაშენებულია მცხეთის მუნიციპალიტეტის სოფელ ჩარდახში.
ცნობისთვის, არტიზანულია ღვინო, რომელიც მხოლოდ ყურძნის წვენისგან არის დამზადებული.
მიუხედავად იმისა, რომ საუკუნეების განმავლობაში ღვინო სწორედ ამ მეთოდით მზადდებოდა, სამწუხაროდ ნატურალური ღვინო დღეს ძალიან იშვიათია. ეს არის ვენახები, რომლებიც არ იწამლება არანაირი მავნე ქიმიკატებით..
მარი ჩიტაია