რადიო “კომერსანტის“ ეთერში, გიორგი აბაშიშვილის საავტორო გადაცემაში “ბიზნესინსაიდერი“ ISET-ის კვლევითი ინსტიტუტის წამყვანმა ეკონომისტმა გიორგი პაპავამ სახელმწიფო საწარმოებზე ისაუბრა და აღნიშნა, რომ ფინანსთა  სამინისტროს სახელმწიფო საწარმოებთან დაკავშირებით გამოქვეყნებული აქვს სტრატეგიული  დოკუმენტი. მისი თქმით, ამ დოკუმენტის ხედვა ცალსახად  სწორია და  მიმართულია  იმისკენ, რომ ის  საწარმოები, რომლებსაც  აქვთ  შესაძლებლობა, რომ მოგებაზე  იყვნენ ორიენტირებული და სახელმწიფოს  დამოკიდებულება იყოს ისეთი,  როგორც მფლობელსა და  საწარმოს  შორის და ამით  ერთის  მხრივ ფისკალური კუთხით სახელმწიფოზე დამოკიდებულება  შემცირდეს.

 

მიიღე ინფორმაცია უფრო სწრაფად „კომერსანტის“ Telegram-ზე.

„ეს  არ  ეხება ყველას, მაგრამ  ძირითადი ნაწილი რომ ავიღოთ, 2020 წელს სახელმწიფო  საწარმოებს 1 მილიარდ  ლარზე მეტი  ჰქონდათ წაგება. ამ დოკუმენტში განხილულია 300-მდე სახელმწიფო საწარმო. მაგალითად სახელმწიფო  საწარმოებზე  გაცემული  სუბსიდიები 2021 წელს პირველ  რვა  თვეში  იყო  110 მილიონი ლარი და  ეს სახელმწო ბიუჯეტს  და საქართველოს თითოეულ  მოქალაქეს, ვინც საკუთარი  გადასახადებით ამ  საწარმოებს ინახავს, ძალიან დიდ  წნეხად  აწევს, არადა  უნდა  არსებობდეს უფრო  მეტი  პოტენციალი, რომ მოგებაზე  ორიენტირებული გახდნენ და  სახელმწიფოს  ჩარევა მათ  მართვაში  იყოს  შედარებით  ნაკლები.

 

მეორე ნაწილი , რაც  ეხებოდა  პრივატიზაციას, აქ  ბოლო პერიოდში თითქოს  გაუმჯობესდა  მდგომარეობა, გამოგვქონდა ობიექტები გასაყიდად, თუმცა კოვიდის გამო შეიძლება  დროც  არ  იყო  კარგი. მნიშვნელოვანია, რომ პრივატიზაციის  პროცესი  მაქსიმალურად  სწრაფად და მაქსიმალურად  გამჭვირვალედ განხორციელდეს და სახელმწიფო საწარმო გადავიდეს კერძო საკუთრებაში. მითუმეტეს იმ პერიოდში, როდესაც  ფისკალური კუთხით გვიჭირს და მაღალი დეფიციტი გვაქვს. ეს  ნაწილი გამოვიყენოთ იმიტომ,  რომ  სამომავლო ფისკალური  რისკები და  ფინანსური დამოკიდებულება შემცირდეს და კონკრეტულ მომენტში საწარმოები გადავიყვანოთ უფრო ეფექტიან მმართველობაში და ამ მიმართულებით უფრო მეტი დოვალთი შეიქმნას“, —  აღნიშნა გიორგი პაპავამ.

თაკო კვაჭანტირაძე