უკრაინის კორუფციის პრევენციის ეროვნულმა სააგენტომ Procter & Gamble-ი ომის საერთაშორისო სპონსორად დაასახელა. ამის შესახებ ეკონომიკური უსაფრთხოების საბჭოზე დაყრდნობით „უკრაინსკა პრავდა“ იუწყება.
კომპანიის ამ სიაში დამატების მიზეზი იყო ის, რომ კორპორაცია აგრძელებს ოპერირებას რუსეთში, იხდის გადასახადებს ბიუჯეტში და მონაწილეობს მობილიზაციის ღონისძიებებშიც კი, ამის მტკიცებულება ეკონომიკური უსაფრთხოების საბჭომ წარმოადგინა.
2022 წლის მარტში, კომპანიამ გამოაცხადა რუსულ ბაზარზე ჯანმრთელობისა და ჰიგიენის საქონლის ასორტიმენტის შემცირება. აგვისტოში გაჩნდა ინფორმაცია, რომ P&G აღარ ახორციელებდა ინვესტიციებს რუსეთში ბიზნესის განვითარებაში, თუმცა აგრესორი ქვეყნის ტერიტორიაზე კვლავ აგრძელებენ მუშაობას საყოფაცხოვრებო ქიმიკატების ქარხანა, P&G-სთვის მსოფლიოში სარეცხი საშუალებების უდიდესი საწარმო და Gillette-ის საპარსების ქარხანა.
კორპორაცია აგრძელებს მოგების მიღებას რუსულ ბაზარზე და წვლილს შეიტანს აგრესორი ქვეყნის სახელმწიფო ბიუჯეტში. მხოლოდ 2021 წელს კომპანიამ გადაიხადა დაახლოებით 5,2 მილიონი აშშ დოლარის სხვადასხვა გადასახადი და ასევე 2,5 ათას რუსს ასაქმებს.
გასული წლის მარტში რუსეთში კომპანიის მასშტაბების შემცირების გამოცხადების შემდეგ, P&G-მ რუსეთში საკუთარ საქონელზე ფასები 40%-ით გაზარდა. ამრიგად, კომპანიამ თითქმის აანაზღაურა ბრენდის პორტფელის შემცირებით შემოსავლის დანაკარგი.
აღნიშნავს, რომ კომპანიის 2022 წლის ანგარიშის მიხედვით, პროდუქციის ფასების ასეთი ზრდის გამო, გაიზარდა კომპანიის ორგანული გაყიდვები რუსეთში.
ეკონომიკური უსაფრთხოების საბჭოს განცხადებით, კომპანია ასევე ხელს უწყობს მობილიზაციას, რადგან, რუსეთის ფედერაციის კანონმდებლობის თანახმად, რუსეთში მოქმედი კორპორაციები იძულებულნი არიან მონაწილეობა მიიღონ სამობილიზაციო ღონისძიებებში, ხელი შეუწყონ თანამშრომლების ჯარში გაწვევას და დააფინანსონ მათი სამხედრო აღჭურვილობა
Procter & Gamble ფლობს შემდეგ შვილობილ კომპანიებსა და ბრენდებს:
Gillette. Fairy. Tide. Ariel. Lenor. Mr. Proper. Pampers. Always. Head & Shoulders. Pantene. Old Spice. Hugo Boss. Max Factor და სხვები.
შეგახსენებთ, უკრაინაში რუსეთის სრულმასშტაბიანი შეჭრის შემდეგ ასეულობით საერთაშორისო კომპანიამ რუსეთის ბაზარი დატოვა.