მთავრობამ პროექტში წყალტუბოს „ახალი სიცოცხლე“ უცხოელი ინვესტორის დაინტერესება შეძლო. როგორც მთავრობის სხდომის დასრულების შემდეგ, ვიცე-პრემიერმა ლევან დავითაშვილმა განაცხადა, საუბარია კატარულ საინვესტიციო ჯგუფზე, რომელიც წყალტუბოში ინვესტირებით და კურორტის განვითარებითაა დაინტერესებული.

„გვქონდა მოლაპარაკებები კატარულ საინვესტიციო ჯგუფთან „წყალტუბოს ახალი სიცოცხლის“ ფარგლებში. ეს არის პროექტი, რომლის შესახებაც საზოგადოებამ მიმდინარე წლის განმავლობაში გაიგო. მათ შორის აუქციონზე იყო გამოტანილი ობიექტები, რომელიც სახელმწიფოსთან ერთად შეისწავლა უძრავი ქონების ავტორიტერულმა კომპანიამ. რამდენიმე ობიექტის გაყიდვა უკვე მოხდა. მოხდა შეთანხმება ქართველ ინვესტორებთან. ამ შემთხვევაში უკვე გვყავს უცხოელი ინვესტორი, რომელთაც აქვთ საკმაოდ ამბიციური გეგმები წყალტუბოსთან ახალი სიცოცხლის ფარგლებში, რათა მაღალი დონის სასტუმრო, რეკრეაციულ-გამაჯანსაღებელი ინფრასტრუქტურა შეიქმნას. ეს იქნება 5 ვარსკვლავიანი სასტუმროები“,- განაცხადა ლევან დავითაშვილმა.

ვიცე-პრემიერის თქმით, პროექტის საპრივატიზაციო თანხა 12 მლნ იქნება.

„იცით, რომ მნიშვნელოვანი წინაპირობა იყო ის, რომ სახელმწიფომ მოახდინა ძირითადი რესურსის, სამკურნალო წყლების გამოსყიდვა. დღეს ეს წყლები ხელმისაწვდომია, როგორც კერძო პირებისთვის, ვინც დაინტერესებულია უბრალოდ მომსახურება მიიღოს წყალტუბოში და საკმაოდ წარმატებით ხორციელდებოდა მიმდინარე წლის განმავლობაში, ეს საოპერაციო საქმიანობა. ასევე, ყველა იმ დაინტერესებული ბიზნესისთვის, რომელიც წყალტუბოში განახორციელებს ინვესტიციებს და მართლაც ამ გამაჯანსაღებელ ინფრასტრუქტურას განაახლებს, ისევე, როგორც ეს იყო წარსულში და საკმაოდ პოპულარული იყო. ასე, რომ აქაც ჩვენი ხუთი ობიექტის განვახორციელებთ და ეს იქნება მინიმუმი. საპრივატიზაციო თანხა არის 12 მლნ. 35-მლნ.-მდე საინვესტიციო ვალდებულებებით, დამატებით უბრალოდ, რა თქმა უნდა, გეგმაში არსებობს მინიმუმ ვალდებულებებზე მეტს კომპანია/ინვესტორი განახორციელებს“,-განაცხადა დავითაშვილმა.

როგორც ცნობილია, „წყალტუბოს ახალი სიცოცხლე“ მთავრობის მიერ დაანონსებული მასშტაბური საინვესტიციო პროექტია, რომელიც კურორტის აღდგენისა და განვითარების კონცეპტუალური გეგმის ფარგლებში ინვესტორებისთვის საპრივატიზებო აუქციონებზე 14 სანატორიუმის გაყიდვას და შემდგომ რეაბილიტაცია/აშენებას ითვალისწინებს. ამ დროისათვის 14-დან გაყიდულია 2 ობიექტი.

პროგრამის დაანონსებისას მთავრობამ განაცხადა, რომ კურორტში დაახლოებით 500 მლნ ლარის ოდენობის კერძო ინვესტიცია განხორციელდება.

პროექტი ითვალისწინებს წყალტუბოში უნიკალური, თანამედროვე სპა-კურორტის შექმნას, სამედიცინო ტურიზმის ჩამოყალიბებას, ტურისტული შეთავაზებების მრავალფეროვნებას, ქალაქის ცენტრისა და საჯარო სივრცის რეაბილიტაციას, ქალაქის ცენტრის ურბანული სივრცის შექმნას. საქართველოს მთავრობის მიერ შემუშავებული პროექტის განხორციელების შედეგად, წყალტუბო გახდება მსოფლიო დონის კურორტი, რომელიც ოთხივე სეზონზე უმასპინძლებს საერთაშორისო და ადგილობრივ ტურისტებს. წყალტუბო დამსვენებლებს შესთავაზებს არა მხოლოდ უნიკალურ თერმულ წყლებს, არამედ დასვენების უმაღლეს ხარისხს, ეკოლოგიას და ბუნების ძეგლებს.