საქართველოში პროფესიონალი კადრების დეფიციტზე რადიო „კომერსანტის“ გადაცემაში „აგროსექტორი“ დისტრიბუტორთა ასოციაციის თავმჯდომარემ ივა ჭყონიამ ისაუბრა. რას ურჩევს ბიზნესმენი დასაქმების მსურველებს და რატომ უნდა გააკეთონ არჩევანი საქართველოში დარჩენაზე მათ, ვინც საზღვარგარეთ სამუშაოდ წასვლას აპირებენ?

„იმ კადრების ძირითადი ნაწილი, რომელიც ჩვენი ქვეყნის ეკონომიკის და ბიზნესის  განვითარებისთვის მნიშვნელოვანია, ქვეყნიდან არის გასული. აქ უფრო მენტალური ფაქტორია, საქართველოში თითქოს ეთაკილებათ იმის გაკეთება რასაც უცხო ქვეყანაში გააკეთებენ. ასევე არის ინფლაციის ფაქტორი, იმდენად მაღალია ინფლაციის მაჩვენებელი, რომ ხელფასი არსებობაზეც არ ყოფნით, ესეც  ერთ-ერთი უმნიშვნელოვანესი პრობლემაა. 

დისტრიბუტორთა ბიზნეს ასოციაციამ  თავის აქტივობით გამოიწვია ის, რომ სახელმწიფომ დისტრიბუცია აღიარა როგორც დარგი, მათ შორის ჩაგვრთო სასწავლო პროგრამაში,  მოგვცა ლიცენზია, იმისათვის, რომ ეს პროგრამა განგვეხორციელებინა, გვაქვს სამ თვიანი კურსი, შემდეგ ვიძლევით სახელმწიფოსგან აღიარებულ სერტიფიკატს“, - აღნიშნა ივა ჭყონიამ.

ჭყონიას თქმით მსმენელები ორი თვის განმავლობაში სწავლობენ თუ რა არის დისტრიბუცია და შემდეგ ერთი თვის განმავლობაში გადიან პრაქტიკებს დაწყებული პროდუქტის საწყობიდან გატანით,  დასრულებული ჩაბარებით და მერჩენდაიზინგით. მისივე თქმით, სასწავლო კურსის სრულად დასრულების შემდეგ დისტრიბუტორთა ასოციაცია  დასაქმების სრულ გარანტიას იძლევა.

როგორც ჭყონია აღნიშნავს,  დისტრიბუტორებზე ბიზნესის მხრიდან მოთხოვნა საკმაოდ მაღალია, თუმცა  ყოველ შემდეგ სასწავლო კურსზე მსმენელთა რაოდენობა იკლებს.

„კვირა არ გავა, რომ ბიზნესიდან არ იყოს მოთხოვნა კადრებზე, ვინც ამ კურსს ამთავრებს, გარანტირებულად 100% ვასაქმებთ და ჩვენ სექტორში ხელფასები იწყება 1000 ლარიდან და 5000 ლარამდეც კი ადის, მესმის ისიც რომ რთულია 1000 ლარზე მუშაობა, მაგრამ სახლში ჯდომას ჯობია.

პირველ ეტაპზე საკმაოდ მაღალი იყო დაინტერესება. რაც უფრო დრო გადის, უფრო და უფრო იკლო, ბოლო ჯგუფში კი, 10 ადამიანის შეკრება გაგვიჭირდა. ძალიან მაღალია წევრი კომპანიებიდან  მოთხოვნა,  თანამშრომლების სერიოზული დეფიციტია, სწავლის მსურველი კი — ცოტა. ყველას მოვუწოდებ, რომ ვისაც სურვილი აქვს რომ ჩვენ სფეროში ჩაერთოს, ჯობია საქართველოში დარჩეს, აქ იმუშაოს, გაცილებით მეტი პერსპექტივა იქნება ვიდრე სადღაც გავიქცეთ. განსაკუთრებით იმ ფონზე, როცა უკრაინაში რუსეთის აგრესიის გამო ევროპის ქვეყნებს ბევრი მიაწყდა და ქართველებს, რომლებიც განსაკუთრებით პოლონეთში იყვნენ წასულები, დაბრუნება მოუწიათ“,  - აღნიშნავს ივა ჭყონია.

თაკო კვაჭანტირაძე