განათლების სამინისტრო პროფესიული სასწავლებლების დაფინანსების ახალ წესზე მუშაობს. ამის შესახებ განათლების მინისტრის მოადგილემ, თამარ ქიტიაშვილმა განაცხადა. დაფინანსების დღეს მოქმედ მოდელს სამინისტრო შეინარჩუნებს, თუმცა შემოდის ახალი კომპონენტი: მიღწევებზე დაფუძნებული დაფინანსება. დაფინანსების ახალი მოდელი, სავარაუდოდ, 2022 წლიდან ამოქმედდება.
„პროფესიულ განათლებაში ვცვლით დაფინანსების წესს. სწორედ ახლა ვმუშაობთ ამ წესზე. შემოგვაქვს ახალი კომპონენტი: მიღწევებზე დაფუძნებული დაფინანსება. ეს იქმნება დამატებითი კომპონენტი. გარდა ვაუჩერული დაფინანსებისა, რომელიც დღეს მოქმედებს და გულისხმობს თითო სტუდენტის დაფინანსებას + საჯარო კოლეჯის ოპერირება-განვითარებისთვის აუცილებელ ხარჯს, დამატებით კოლეჯები მიიღებენ მიღწევებზე დაფუძნებულ დაფინანსებებსაც. ანუ რაც უფრო კარგი შედეგს აჩვენებს კოლეჯი, მით მეტი დაფინანსება ექნება მას. ამით ვეცდებით წავახალისოთ კოლეჯები, გახდნენ შედეგზე ორიენტირებული, ოღონდ, ეს იმუშავებს ისეთი მექანიზმით, რომ სუსტ კოლეჯი კიდევ უფრო არ დასუსტდეს და ძლიერი კიდევ უფრო არ გაძლიერდეს. დაფინანსების ახალი წესი არც კერძო კოლეჯებთან მიმართებაში იქნება დისკრიმინაციული. მუშავდება დაფინანსების დივერსიფიცირებული მოდელი, რომელიც საუკეთესო საერთაშორისო პრაქტიკაზე იქნება დაფუძნებული. ჩვენი გეგმით, 2022 წლის მარტი-მაისში დასრულდება ამ წესის, ამ მოდელის, შემუშავება და შემდეგი წლის, ანუ 2022 წლის მიღებისთვის ვფიქრობთ რომ მოვასწრებთ გადავიდეთ პროფესიული სასწავლებლების დაფინანსების ახალ წესზე,“ - ამბობს განათლების მინისტრის მოადგილე, თამარ ქიტიაშვილი, რომელიც დარწმუნებულია, რომ დაფინანსების ახლი წესის ამოქმედებით მოგვარდება და დაიძლევა ბევრი გამოწვევა, რაც დღესაა. მისი განმარტებით, ეს გაზრდის პროფესიული განათლების ხარიხს და ხელს შეუწყობს კონკურენტული და ჯანსაღი გარემოს შექმნას განათლების ბაზარზე.
შეიცვლება თუ არა დაფინანსების წესი მოქალაქითვის, რომელიც მომავალი წლიდან პროფესიული პროგრამის გავლას გადაწყვეტს, განათლების მინისტრის მოადგილეს ამაზე ზუსტი პასუხი ჯერ არ აქვს, თუმცა სავარაუდო ვერსიებს გვიზიარებს.
„სტუდენტისა და კოლეჯის დაფინანსება სახელმწიფოსთვის, ამ შემთხვევაში, განათლების სამინისტროსთვის, ერთი და იგივეა, რადგან სტუდენტების კუთვნილ დაფინანსებას იღებენ კოლეჯები. ანუ სწავლის დაფინანსების ვაუჩერს სტუდენტი ხომ პირდაპირ არ იღებს?! - ეს პირდაპირ კოლეჯში მიდის. ამიტომ ამას ჩვენ ზოგადად პროფესული განათლების დაფინანსების წესს ვუწოდებთ, რომელიც გულისხმობს კოლეჯის განვითარებისა და ოპერირების ხარჯს დამატებული ერთ სტუდენტზე გაწეული ხარჯი. შეიცვლება თუ არა დაფინანსების წესი მოქალაქისთვის, რომელიც მომავალი წლიდან პროფესიული პროგრამის გავლას გადაწყვეტს, წინასწარ არ ვიცი. ახლა მიმდინარეობს ამაზე მსჯელობა. შეიძლება ყველა პროგრამაზე ერთგვაროვანი დაფინანსება აღარ იყოს. ვგულისმობ ყველა პროფესიულ პროგრამაზე 100%-იან დაფინანსებას. ვფიქრობთ, რომ უფრო მეტად ის პროგრამები დაფინანსდეს, ანუ იმ პროგრამებზე მიიმართოს სახელმწიფო რესურსი, რომელ პროფესიებზეც მეტი მოთხოვნაა შრომის ბაზარზე და რომელსაც მეტი დამატებითი ღირებულების შექმნა შეუძლია ეკონომიკისთვის. აქ ვფიქრობთ, რომ შემოვიდეს გარკვეული თანადაფინანსების ცნებაც. ანუ შეიძლება ბიზნესმა აიღოს თავის თავზე დაფინანსების რაღაც ნაწილი, შეიძლება მოქალაქემაც ჩადოს ამაში რაღაც რესურსი, ამაზე ჯერ ვმუშაობთ,“- ამბობს ქიტიაშვილი.
ავტორი: ბელა გელაშვილი
წყარო: EDU ARIS.GE