რუსეთ-უკრაინის ომმა პრობლემა არაერთი მიმართულებით შექმნა. დიდი ალბათობით, ომი საქართველოს ტურიზმის სექტორზეც აისახება. როგორც „კომერსანტს“ ქობულეთში მდებარე სასტუმრო „ალბატროსის“ მფლობელმა ქეთევან შავიშვილმა უთხრა, არსებული ვითარებიდან გამომდინარე, პროგნოზს იმაზე, თუ როგორი იქნება ზაფხულის სეზონი ქობულეთში, ვერ აკეთებს. მან ასევე კურორტზე არსებულ პრობლემებზე და მოუწესრიგებელ ინფრასტრუქტურაზეც ისაუბრა.
„მოლოდინებზე ჯერჯერობით რა გითხრათ, არაფრის მოლოდინი არ მაქვს, ისეთი არეულობაა ქვეყანაში. ამ პანდემიის გამო ორი წელია ისედაც სეზონი არ გვაქვს, ნომერს კიდევ ისეთი ფასი აქვს, რომ კომუნალურ ხარჯებსაც ვერ ვფარავთ, ფასს მოთხოვნიდან გამომდინარე ვარეგულირებთ. დენი 31 თეთრი გახდა, წყლის გადასახადი ძალიან მაღალია, გაზი 1 ლარი და 5 თეთრი ღირს, ჩვენ ყველაფერს კომერციულად ვიხდით და არაფერი აღარ გვრჩება. ბანკის ვალებს ვეღარ ვიხდით, ამას შემდეგ პროცენტებიც ემატება. თუ სიტუაცია არ დასტაბილურდა, ცუდ მდგომარეობაში აღმოვჩნდებით. მე ეს სასტუმრო ადრე მაქვს აშენებული და პერიოდულად რაღაცების განახლება მიწევს, რომ უყურებ რომ შენმა მეზობელმა განაახლა, შემატა რაღაც, შენც აკეთებ – სხვა გზა არ გაქვს. ბანკში ძალიან მაღალი პროცენტია, 22-23% აქვთ, რა ბიზნესი უნდა გქონდეს ისეთი, რომ ეს პროცენტი გაქაჩო, მითუმეტეს ჩვენთან არის ორთვიანი სეზონი, ივლისის შუა რიცხვებში იწყება და სექტემბრის შუა რიცხვებში დამთავრებულია და თუ აგვისტოში იწვიმა, ისიც ჩავარდნილია.
სხვა კურორტები, რომლებიც ზამთარშიც და ზაფხულშიც მუშაობენ, კიდევ გარისკავ და აიღებ სესხს, მაგრამ ქობულეთში რთულია, თუმცა მაინც შეტოპა ხალხმა და ბანკის მახეში გაება. პროგნოზი ძალიან პესიმისტური მაქვს, ფაქტებიდან გამომდინარე ვლაპარაკობ, ილუზიებზე ვერ ვისაუბრებ, ან იქნება სეზონი, ან არა. ბევრს არ მოსწონს, მაგრამ ჩვენი ძირითადი დამსვენებლები არიან რუსები, რუსეთი თუ არ შემოვიდა, ან რუსეთის საზღვრიდან ბელარუსი თუ არ შემოვიდა, არ იქნება მუშაობა. ევროპა ჩვენთან არ მოდის მე ვარ ევროპის კურორტებზე ნამყოფი და ჩვენ იმათ კონკურენციას ვერასდროს ვერ გავუწევთ ვერც კლიმატით და ვერც ინფრასტრუქტურით. ჩვენ ვართ ნოტიო სუბტროპიკები, ეს არის წვიმიანი, ზღვა კი გვაქვს კარგი, მაგრამ კეთილმოუწყობელია, პლაჟები არ იწმინდება, პრობლემა პრობლემას ემატება“, - აღნიშნა ქეთევან შავიშვილმა.
პანდემიამდელ პერიოდში სომხეთიდან აქტიურად ჩამოდიოდნენ ქობულეთში დასასვენებლად, თუმცა როგორც ქეთევან შავიშვილი ამბობს, გასულ წელს ქობულეთში სომხები თითქმის არ იყვნენ, რადგან კოვიდრეგულაციების თანახმად მათ პსრ ტესტების გაკეთებ უწევდათ, რაც 4-5 სულიანი ოჯახს უკვე ძვირი უჯდებოდა.
“სომხები ქობულეთში აქტიურად ჩამოდიოდნენ, მაგრამ პანდემიის გამო მათ პსრ ტესტები გაკეთება უწევდათ. დიდი ოჯახებით მოდიან, მრავალშვილიანები არიან, ისინი ბავშვებით მოდიან და ამიტომ ქობულეთს ეტანებიან, იოდის ნაკლებობა აქვთ და ზღვა სჭირდებათ. აზერბაიჯანელები უფრო ბათუმში მიდიან, იმათ გართობა და კაზინო უნდათ, ეგენი უფრო შეძლებული ხალხია და ბათუმიც გართობისთვის მეტ საშუალებას იძლევა. შარშან სომეხი თითქმის არ ყოფილა ქობულეთში. მეც ჯამში 2 თვეც არ მიმუშავია, სეზონი არ იყო, არც ახლა არ მაქვს არაფრის მოლოდინი, არაფერი ქობულეთში არ არის, რომ გაწვიმდება ხომ უნდა გქონდეს რაღაც ალტერნატივა რომ ოთახში არ იჯდე, მარტო კაფეში შეგიძლია შესვლა და იქაც ყველაფერზე ცეცხლის ფასია, თან კარგი კაფეებიც არ არის, კუსტარული კაფეებია“, - აღნიშნა ქეთევან შავიშვილმა.
თაკო კვაჭანტირაძე