ქვეყნის იზოლაციის, პროტესტისა და ევროკავშირის მოსალოდნელი სანქციების ფონზე ირანული რიალი შაბათს აშშ-ის დოლართან მიმართებაში რეკორდულად გაუფასურდა. ამის შესახებ Reuters-ი წერს.

ევროკავშირსა და თეირანს შორის ურთიერთობები ბოლო თვეებში გაუარესდა, რადგან ბირთვული მოლაპარაკებების ხელახლა დაწყების მცდელობები ჩიხში შევიდა. ირანმა დააკავა რამდენიმე ევროპელი მოქალაქე და ბლოკი უფრო და უფრო კრიტიკული ხდება ირანის ხელისუფლების მხრიდან მომიტინგეების მიმართ არასათანადო მოპყრობისა და სიკვდილით დასჯის გამოყენებასთან დაკავშირებით.

ევროკავშირი ირანის წინააღმდეგ სანქციების მეოთხე რაუნდს განიხილავს. Reuters-ის დიპლომატიური წყაროები იუწყებიან, რომ მომავალ კვირას ბლოკის სანქციების სიას ისლამური რევოლუციის გვარდიის კორპუსის წევრები დაემატებიან. ევროკავშირის ზოგიერთი წევრი ქვეყანა უფრო შორის მიდის და ითხოვს, რომ ისლამური რევოლუციის გვარდიის კორპუსი ტერორისტულ ორგანიზაციად შეფასდეს.

სავალუტო პორტალ Bonbast.com-ის მონაცემებით, შაბათს არაოფიციალურ ბაზარზე 1 დოლარის ღირებულება 430 500 რიალიდან 447 000 რიალამდე გაიზარდა.

2022 წლის სექტემბრიდან დაწყებული საპროტესტო გამოსვლების შემდეგ რიალმა თავისი ღირებულების 29% დაკარგა. პროტესტი 22 წლის ქურთი ქალის, მაჰსა ამინის გარდაცვალებას მოჰყვა, რომელიც ჰიჯაბის „არასწორი“ ტარების გამო, პოლიციის მხრიდან ძალადობის მსხვერპლი გახდა.

საპროტესტო აქციები 1979 წლის ისლამური რევოლუციის შემდეგ ირანში თეოკრატიული მმართველობის ერთ-ერთ ყველაზე დიდ გამოწვევად იქცა.