პუტინი არამეგობრული ქვეყნების სიაში შემავალ სახელმწიფოებს რუბლებში გადახდაზე უარის თქმის გამო 1-ლი აპრილიდან ბუნებრივი გაზის შეწყვეტით ემუქრება.

რუსეთის პრეზიდენტმა ვიდეომიმართვისას აღნიშნა, რომ თუ რუსული გაზის შესყიდვის მსურველები რუსულ ბანკში ანგარიშს არ გახსნიან, მოსკოვი მას ვალდებულების შეუსრულებლობად ჩათვლის და გაზის ონკანს გადაუკეტავს.

არამეგობრული ქვეყნების სია რუსეთმა 7 მარტს დაამტკიცა და მასში ევროკავშირის წევრი ქვეყნები, ბრიტანეთი, უკრაინა, შვეიცარია, ნორვეგია, ისლანდია, აშშ, კანადა, კორეა და იაპონია შეიყვანა. 23 მარტს კი მათ გაზის საფასურის რუბლებში გადახდა მოსთხოვა, რაზედაც მოსკოვისადმი შედარებით ლოიალურად განწყობილი იტალიისა და გერმანიისგანაც უარი მიიღო.

უკრაინაში შეჭრის საპასუხოდ დასავლეთმა რუსეთს აქამდე უპრეცედენტო მასშტაბის სანქციები დაუწესა, თუმცა მასში ენერგოსექტორი მაინც ვერ მოხდა. გარდა იმისა, რომ კრემლი ექსპორტის ნახევარზე მეტს ბუნებრივი გაზის, ნავთობისა და ნავთობპროდუქტების ექსპორტით აგენერირებს, მათ პოლიტიკური შანტაჟისთვისაც იყენებს. ევროპა ბუნებრივი გაზის 35%-ს რუსეთისგან ყიდულობს და მასზე მყისიერად უარის თქმას ერიდება.

რუსულ ენერგორესურსებზე სრული უარი აქამდე მხოლოდ შეერთებულმა შტატებმა და კანადამ განაცხადა, მათ რიცხვს წლის ბოლომდე ბრიტანეთიც შეუერთდება. 2023 წლიდან გაზპრომთან კონტრაქტის გაგრძელებაზე პოლონეთმაც უარი განაცხადა.