„პუტინი მართალია იმაში, რომ „მარცვლეულის დერეფნის“ მეშვეობით ხორბლის მიწოდება არ ხდება ღარიბ ქვეყნებში“, — აღნიშნულის შესახებ განცხადება თურქეთის პრეზიდენტმა რეჯეფ თაიფ ერდოღანი ხორვატიაში ვიზიტისას გააკეთა.
ერდოღანის თქმით, ის მხარს უჭერს იმას, რომ რუსეთში წარმოებული სოფლის მეურნეობის პროდუქტები მსოფლიო ბაზარზე დაბრუნდეს.
„მიწოდება მიდის განვითარებულ ქვეყნებში. ანკარა იმედოვნებს და მხარს უჭერს იმას, რომ სოფლის მეურნეობის პროდუქციის ექსპორტი რუსეთიდანაც დაიწყოს. ამ საკითხს პუტინთან სამარყანდში განვიხილავ“, - განაცხადა თურქეთის ლიდერმა.
თურქეთის ლიდერმა გაიხსენა, რომ „მარცვლეულის დერეფნის“ შექმნის იდეა სასურსათო კრიზისის ფონზე ყველაზე ღარიბი ქვეყნების მხარდაჭერის თემას ეფუძნება.
„ანტირუსული სანქციების გაგრძელების ფონზე პუტინს აწუხებს მარცვლეულის მიწოდება იმ ქვეყნებისთვის, რომლებმაც შეზღუდვები შემოიღეს მოსკოვზე. ჩვენ მხარს ვუჭერთ რუსეთიდან სოფლის მეურნეობის პროდუქციის მიწოდებას“, - განაცხადა ერდოღანმა.
აღნიშნული განცხადებები თურქეთის პრეზიდენმა რუსეთის პრეზიდენტის საპასუხოდ გააკეთა და თქვა, რომ პუტინთან აღნიშნულ თემას განიხილავს. გუშინ ვლადიმერ პუტინმა განაცხადა, რომ ბევრი ევროპული ქვეყანა დღესაც კოლონიზატორივით იქცევა, ამიტომ, თურქეთის პრეზიდენტ ერდოღანს დაელაპარაკება უკრაინიდან ევროპაში ხორბლის გატანის შესაძლო შეზღუდვის მიზნით.
„ჩვენ ყველაფერი გავაკეთეთ იმისთვის, რომ უკრაინული მარცვლეულის გატანა მომხდარიყო. ეს გავაკეთეთ თურქეთთან ერთად. თურქეთს თუ გამოვრიცხავთ, როგორც შუამავალ ქვეყანას, მაშინ უკრაინიდან ექსპორტირებული თითქმის მთელი მარცვლეული იგზავნება არა განვითარებად უღარიბეს ქვეყნებში, არამედ ევროკავშირის ქვეყნებში“, – განაცხადა პუტინმა.
რუსეთის პრეზიდენტმა ხაზგასმით აღნიშნა, რომ ოთხმოცდაშვიდიდან მხოლოდ ორი გემი იყო დატვირთული გაერო-ს მსოფლიო სასურსათო პროგრამის ფარგლებში.
„მინდა, ვთქვა, რომ ბევრი ევროპული ქვეყანა, როგორც ბოლო ათწლეულებში და საუკუნეებში მოქმედებდნენ, როგორც კოლონიზატორები, ასევე აგრძელებენ დღესაც. კიდევ ერთხელ მოატყუეს განვითარებადი ქვეყნები და აგრძელებენ მათ მოტყუებას. ცხადია, ამ მიდგომით მსოფლიოში სურსათის პრობლემების მასშტაბები მხოლოდ გაიზრდება, სამწუხაროდ, რამაც შეიძლება, გამოიწვიოს უპრეცედენტო ჰუმანიტარული კატასტროფა. იქნებ, უნდა ვიფიქროთ იმაზე, რომ შევზღუდოთ მარცვლეულისა და საკვების ექსპორტის მიმართულება ამ მარშრუტზე? აუცილებლად გავივლი ამ საკითხს თურქეთის პრეზიდენტთან, ბატონ ერდოღანთან“, – განაცხადა პუტინმა.
რუსეთის პრეზიდენტის განცხადებას მოულოდნელი და უსაფუძვლო უწოდა უკრაინის პრეზიდენტის ოფისის ხელმძღვანელის მრჩეველმა მიახილო პოდოლიაკმა. მან სააგენტო „როიტერსს“ უთხრა, რომ რუსეთს შეთანხმების გადახედვის არანაირი რეალური საფუძველი არ გააჩნია, რადგან უკრაინა პირობებს ასრულებს. პოდოლიაკის შეფასებით, მსგავსი განცხადებები ახალი აგრესიული თემების მოძიების მცდელობაა.
უკრაინამ და რუსეთმა თურქეთის და გაეროს შუამავლობით, 22 ივლისს, სტამბოლში მიაღწიეს შეთანხმებას შავი ზღვით, უკრაინიდან სოფლის მეურნეობის პროდუქციის ექსპორტის განახლების შესახებ. გემებს და მათ უსაფრთხო ნაოსნობას სტამბოლიდან აკონტროლებს საგანგებოდ შექმნილი საკოორდინაციო ცენტრი. უკრაინაში შეჭრის შემდეგ, რუსეთმა შავი ზღვის პორტები დაბლოკა, აზოვის ზღვის პორტებს კი, თავად აკონტროლებს, ამიტომ, უკრაინა ვეღარ ახორციელებდა საზღვაო გზით ხორბლის და სოფლის მეურნეობის სხვა პროდუქციის ექსპორტს.