უკრაინული გამოცემა უნიანი Newsweek-ზე დაყრდნობით წერს, რომ 2021 წლის აგვისტოში ვლადიმერ პუტინი იაპონიასთან სამხედრო კონფლიქტისთვის ემზადებოდა.
ამერიკული გამოცემა Newsweek-ის ხელში 17 მარტით დათარიღებული რუსეთის უსაფრთხოების ფედერალური სამსახურის (ეფესბე) თანამშრომლის რუსი უფლებადამცველისა და ჟურნალისტის ვლადიმერ ოსეჩკინისადმი მიწერილი წერილი აღმოჩნდა.
ეფესბე-ს აგენტი ფსევდონიმით „ცვლილებათა ქარი“ წერს: „ალბათობა იმისა, რომ ქვეყნები (იაპონია და რუსეთი) მწვავე დაპირისპირებისა და ომის ეტაპზე გადავიდოდნენ დიდი იყო. საბოლოოდ, ომისთვის უკრაინა რატომ შეირჩა უცნობია - სცენარში ბევრი არაფერი შეცვლილა.“
გამოცემა წერს, რომ იაპონიასთან კონფლიქტის დაწყებამდე თამაშში პროპაგანდისტები უნდა ჩართულიყვნენ. მათი როლი იაპონელების მიმართ რუსეთის სიძულვილის გაღვივება, მათთვის „ნაცისტებისა“ და „ფაშისტების“ იმიჯის მორგება იყო. ეს ტაქტიკა რუსებმა, საბოლოოდ, უკრაინელების წინააღმდეგ გამოიყენეს.
რუსეთმა ხალხის იაპონიასთან ომისთვის მომზადება დაიწყო. 2021 წლის აგვისტოში ეფესბე-მ გააჟღერა ინფორმაცია იმის შესახებ, რომ მეორე მსოფლიო ომის დროს იაპონიის სპეცსამსახურები სსრკ-ს მოქალაქეებს აწამებდნენ. თავიდან საინფორმაციო სივრცეში ეს სიახლე ვერ შეამჩნიეს, მაგრამ რამდენიმე დღეში პროპაგანდამ ამ თემით სპეკულირება დაიწყო, მაგრამ მალევე მიივიწყეს.
„ცვლილებათა ქარმა“ რუსული ვერტმფრენების ზუსტი პოზიციები დაასახელა, რომლებიც იაპონიაზე თავდასხმისთვის სიგნალს ელოდნენ, მაგრამ მოსკოვმა მოულოდნელად იაპონიასთან ბრძოლა გადაიფიქრა და უკრაინაზე გადაერთო. პოზიციების შეცვლის მიზეზები უცნობია.
მოამზადა მაკა ბიბილაშვილმა