პუტინმა ხელი მოაწერა კანონს, რომლის მიხედვითაც, რუსეთის მოქალაქეები ლარსზე დროისა და თარიღის წინასწარი დაჯავშნის გარეშე ვეღარ გადმოვლენ. თუმცა კანონი ამ ეტაპზე რუსეთის საზღვრის გადაკვეთის თარიღისა და დროის წინასწარ დაჯავშნას მხოლოდ სატვირთო მანქანების მძღოლებს ავალდებულებს. დოკუმენტი რუსეთის სამართლებრივი ინფორმაციის ოფიციალურ ინტერნეტპორტალზე გამოქვეყნდა.
კანონი ძალაში 1-ლი სექტემბრიდან შევა. თუმცა ვრცელდებოდა ინფორმაცია, რომ ის ახლავე, ანუ 2023 წლის 1-ლი მარტიდან უნდა ამოქმედებულიყო და 2024 წლის 1-ელ მარტამდე ყოფილიყო ძალაში.
აღსანიშნავია, რომ „რუსეთის ფედერაციაში საავტომობილო გზებისა და საგზაო საქმიანობის შესახებ“კანონში შესატანი ცვლილებების თავდაპირველ ვერსიაში არ იყო მითითებული, ტრანსპორტის რომელ სახეობას შეეხებოდა კანონი. ამას Telegram-არხებზე პანიკა მოჰყვა. რუსი მომხმარებლები ავრცელებდნენ ცნობებს, რომ ახალი კანონი რეალურად რუსეთში მოახლოებულ მობილიზაციის მორიგ ტალღას უკავშირდებოდა.
თუმცა სახელმწიფო სათათბიროს მიერ მესამე მოსმენით მიღებული და პუტინის მიერ ხელმოწერილ დოკუმენტი მოიცავს ცალკეულ მუხლს, რომელიც საზღვარზე დროის დაჯავშნას მხოლოდ კომერციული სატვირთო მანქანებისთვის არეგულირებს.
ახალი სისტემა ფედერაციის მთელ საზღვარზე არ იმოქმედებს და იმ მონაკვეთებზე იმუშავებს, სადაც რიგის პრობლემებია. კანონში მოცემულია სასაზღვრო-გამშვები პუნქტების ჩამონათვალი, რომლებზეც საერთაშორისო გადაზიდვების სატვირთო სატრანსპორტო საშუალებებმა რიგის ელექტრონული რეგისტრაცია უნდა გაიარონ. კერძოდ, პრობლემურ სასაზღვრო პუნქტებს შორის არის ჩინეთთან არსებული ზაბაიკალის საზღვარი, რუსეთ-საქართველოს საზღვრის ზემო ლარსის მონაკვეთი და აზერბაიჯანთან არსებული იარაგ-კაზმალიარის საზღვარი.
ელექტრონული სატრანსპორტო დოკუმენტაციის სახელმწიფო საინფორმაციო სისტემაში რიგის ადგილის დაჯავშნა უფასოა. თარიღისა და დროის დაჯავშნაზე უარის თქმა შესაძლებელია მხოლოდ იმ შემთხვევაში, თუ მძღოლი საჭირო დოკუმენტაციას არ წარადგენს. კანონის თანახმად, დაჯავშნილი დროის მოლოდინისთვის შეიქმნება პარკირების ზონები სანაგვე ურნებითა და ტუალეტებით, ასევე, მაღაზიებით, კაფეებითა და რეკრეაციული ზონებით.
სახელმწიფო დუმის ტრანსპორტისა და სატრანსპორტო ინფრასტრუქტურის განვითარების კომიტეტის თავმჯდომარე, ევგენი მოსკვიჩოვი აცხადებს, რომ ახალი კანონი სასაზღვრო პუნქტებზე მრავალკილომეტრიან რიგებს მოხსნის.