სალონი ქაბულის ცენტრში ერთ-ერთი უკანასკნელი ადგილია, სადაც გარკვეული თავისუფლება შენარჩუნდა და ბევრი თამამი სიახლე ჯერაც ნებადართულია. მისმა მფლობელმა მოხადესამ, თალიბების მხრიდან მუდმივი მუქარების მიუხედავად, სალონის შენარჩუნება გადაწყვიტა. კლიენტები, ძირითადად ახალგაზრდა ქალები, მოდიან მანქანებით და შედიან არაფრით გამორჩეულ შენობაში, რომლის ფასადზეც ყველა სარეკლამო აბრა თეთრადაა გადაღებილი. ოთახში შემოსვლის შემდეგ, ისინი ჰიჯაბებს და ნიკაბებს იხდიან და ამ დროს თალიბების ჯგუფები, რომლებიც რამდენიმე მეტრში პატრულირებენ, თითქოს სხვა სამყაროს მიეკუთვნებიან.
32 წლის მეწარმე მოხადესა, გრძელი თმებით და კიმ კარდაშიანის სტილის წარბებით, თავისი ნებით ბიზნესიდან წასვლას არ აპირებს. ეს ძალიან გაბედული გადაწყვეტილებაა, როგორც მისთვის, ასევე მის სალონში მომუშავე 20 გოგონასთვის.
„ჩვენ არ გვინდა მივატოვოთ ჩვენი სამუშაო, რომელიც ასე გვიყვარს. ავღანეთს კი ისე, როგორც არასდროს, სჭირდება მომუშავე ქალები. ჩვენი სალონის თანამშრომლების დიდი ნაწილი ამ სამუშაო ოჯახებს არჩენს,“ - განაცხადა მოხადესამ.
თალიბების წინა მმართველობის დროს (1996-2001) სილამაზის სალონები აკრძალული იყო და შეღებილი ფრჩხილების ჩვენება თითების მოჭრით ისჯებოდა. ამჟამად, ხელისუფლებაში მეორედ დაბრუნების შემდეგ, ფუნდამენტალისტები მუდმივად იმეორებენ, რომ შეიცვალნენ და უფრო თანამედროვეები გახდნენ. თუმცა, მოდერნიზების მოუხედავად, თალიბებმა ტელევიზიით გამოაცხადეს, რომ სუნამოს არომატი და ქუსლები კაკუნი რელიგიური ნორმების დარღვევაა.
თალიბების ხელისუფლებაში მოსვლის შემდეგ 2 თვე გავიდა, მაგრამ მათი რელიგიური მითითებების შინაარსი დ აპრაქტიკ აგაურკვეველი რჩება. ამიტომაც მოხადესა ამ გაურკვევლობას ძალიან ფრთხილად იყენებს. ყველას აშინებს შესაძლო მოულოდნელი გამკაცრება. სამსახურში ყველა შიშის ქვეშ მოდის, განსაკუთრებით. სალონის გახსნის დროს.
სალონში მოსული ინგლისურის მასწავლებელი ფარხუნდა ამბობს, რომ ეს დეკემბრის ბოლოდან მისთვის გარეთ გამოცლის პირველი შემთხვევაა. მას ერთი თვალი დაზიანებული აქვს სკოლაზე თალიბების თავდასხმის შედეგად.
„ქალური სილამაზის კულტურა ჩვენთვის ექსტრემიზმის წინააღმდეგ ბრძოლის მთავარი იარაღია, იქნება ეს მაკიაჟი, თუ ვარცხნილობის დაყენება. მე წინააღმდეგობის მჯერა. ჩვენ არ ვართ ჯოგი ბურკებში და ნიკაბებში, არც შავი ფერის და არც ცისფერის. ჩვენ, ავღანეთში, ისეთი ლამაზი, კოლორიტული და დახვეწილი მოდა გვაქვს, მაგრამ დღეს ჩვენ მხოლოდ მოჩვენებები ვართ,“ - ამბობს სალონის მფლობელი.
სალონის კლიენტებს შორის საკმაოდ თანამედროვე და ცივილიზებული ქალებია, მაგალითად, მარვა, რომელმაც სულ რამდენიმე თვის წინ ქაბულში ადგილობრივი მოდის სახლი გახსნა, თუმცა, თალიბების მოსვლი შემდეგ, მას საკუთარ პროექტზე უარის თქმა მოუწია.
ფარხუნდას დახურული სკოლის კვლაც გახსნის და მუშაობის გაგრძელების იმედი აქვს, თუმცა ის შიშობს, რომ კიდევ კარგა ხანი თავის საქმეს ვერ დაუბრუნდება.
მოხადესა კი სიცოცხლის რისკზე და თალიბების მიერ შექმნილი „ცოდვების აღმოფხვრის სამინისტროსგან“ მიღებულ მუქარის წერილებზე საუბრობს. თუმცა, მას მუქარის არ ეშინია და მუშაობის შეწყვეტას არ გეგმავს.
„წერილები საკმარისი არაა. მე დავხურავ სალონს მხოლოდ მაშინ, თუ ისინი დანას პირდაპირ ყელთან მიმადებენ“ - ამბობს მოხადესა.
ავტორი: თენგიზ აბლოთია
წყარო: LeFigaro