ჩვენ ზუსტად ვიცით, რომ ჩვენ ერთსა და იმავეს ვგულისხმობთ, როდესაც სიტყვა "თავისუფლებას" ვამბობთ, - ასე მიმართა უკრაინის პრეზიდენტმა ვოლოდიმირ ზელენსკიმ სტენფორდის უნივერსიტეტის დამსწრე საზოგადოებას, რითიც ამერიკასა და უკრაინას შორის არსებულ ურთიერთობას ხაზი გაუსვა.

მისივე თქმით, უკრაინის ომის შემდგომი აღდგენა ერთ-ერთი უდიდესი თავისუფლების პროექტია, რაშიც სტუდენტებს მონაწილეობის მიღება შეუძლიათ.

"დარწმუნებული ვარ, რომ ამ ომის შემდეგ, რაღაც შეიცვლება თქვენ, ამერიკელ ხალხსა და ჩვენს ურთიერთობაში, ის უკვე იცვლება, ჩვენ უფრო დავახლოვდით. ჩვენ ზუსტად ვიცით, რომ ჩვენ ერთსა და იმავეს ვგულისხმობთ, როდესაც სიტყვა "თავისუფლებას" ვამბობთ. გასულ სექტემბერში უკრაინაში რომ დავბრუნდი, ძალიან გამხნევებული ვიყავი. ვფიქრობდი, რამდენის გაკეთება შეგვეძლო ერთად. ახლა ვგრძნობ მსგავს ამაღლებულ განწყობას, იმიტომ რომ მე ვხედავ თქვენს თვალებს და მჯერა, რომ ბევრი თქვენგანი იქნება უკრაინაში და ჩვენს ომის შემდგომ რეკონსტუქციას დაეხმარებით, რადგან ეს, თავისუფლების დაცვის შესახებ ყველაზე დიდი პროექტია, რომელშიც თქვენს თაობას მონაწილეობა შეუძლია. ჩვენი ქალაქები განადგურებულია, ზღვა ისევ ბლოკირებულია, მაგრამ ჩვენ თავისუფლები ვრჩებით", - განაცხადა ზელენსკიმ.

მოგვიანებით, უკრაინის პრეზიდენტმა მის მორიგ ვიდეომიმართვაში განაცხდა, რომ  მიუხედავად რუსეთის მიერ ნგრევისა, უკრაინას მაინც აღადგენენ.

"როგორც მოსალოდნელი იყო, სიტუაცია ძალიან მძიმეა. ოკუპანტები ცდილობენ მიაღწიონ იმ მიზნებს, რასაც 24 თებერვლის შემდეგ, პირველ დღეებში ელოდნენ, ამიტომ მათ დონბასში მაქსიმალური არტილერიის კონცენტრირება მოახდინეს, არის სარაკეტო და საჰაერო თავდასხმები. ჩვენ ვიცავთ ჩვენს მიწას ისე, როგორც ჩვენი დღევანდელი თავდაცვის რესურსები იძლევა ამის საშუალებას. ჩვენ ყველაფერს ვაკეთებთ, რომ ის გაიზარდოს და ჩვენ გავზრდით მას. თუ ოკუპანტებს ჰგონიათ, რომ ლიმანი ან სევეროდონეცკი მათი იქნება, ცდებიან. დონბასი უკრაინული იქნება, რადგან ეს ჩვენ ვართ, ეს არის ჩვენი არსი და მაშინაც კი, თუ რუსეთი ყველგან ნგრევას და ტანჯვას მოიტანს, ჩვენ ყველა ქალაქსა და დასახლებას მაინც აღვადგენთ. ჩვენი უკრაინის დროშების ალტერნატივა იქ არ არის და არ იქნება", - განაცხადა ზელენსკიმ.

წყარო: "ინტერპრესნიუსი"