თბილისში Car Sharing-ის, იგივე ავტომობილების გაზიარების სერივისით სარგებლობა დაახლოებით ორი კვირაა შეუძლებელია. კომპანიის ფესუბუქ გვერდზე მომხმარებლები წერენ, რომ აპლიკაციაში შესვლისას რუკაზე ავტომობილები აღარ ხვდებათ, შეუძლებელია ასევე კომპანიის ქოლცენტრში და ტექნიკურ დეპარტამენტთან დაკავშირებაც.
„კომერსანტი“ დეტალების გასარკვევას კომპანიის წარმომადგენლებთან შეეცადა, თუმცა ამ ეტაპზე კომენტარისგან თავს იკავებენ.
2019 წლის დასაწყისში მანქანის გაზიარების სერვისი თბილის მერმა კახა კალაძემ წარადგინდა და აღნიშნა, რომ პირველ ეტაპზე დედაქალაქში მანქანების გაზიარების სერვისში 300 ელექტრომობილი იქნებოდა ჩართული და ის მომხმარებელს რამდენიმე სხვადასხვა ლოკაციიდან მოემსახურებოდა.
„ყველა ევროპულ ქალაქში არის ე.წ. Car sharing, ანუ ავტომობილების გაზიარება ხდება. ყველა ადამიანს შეუძლია აიყვანოს ავტომობილი, გადაიხადოს თანხა და ისარგებლოს რამდენი ხნითაც მოესურვება. ასეთი პროექტის განხორციელება ჩვენთვის ძალიან მნიშვნელოვანი იყო. გვქონდა საუბარი სხვადასხვა ბიზნესსექტორის წარმომადგენელთან და ერთი ბიზნეს ჯგუფი დაინტერესდა და ისინი წარმოგვიდგენენ უახლოეს მომავალში დიდ პრეზენტაციას.
ყველა ავტომობილი იქნება ელექტრო. ქალაქში ძალიან მალე 300 ავტომობილი იქნება ჩამოყვანილი და განთავსდება სხვადასხვა ლოკაციაზე. თითოეულ თბილისელს, ვინც დარეგისტრირდება პროგრამაში, გადმოიწერს აპლიკაციას, ექნება შესაძლებლობა ისარგებლოს ამ ავტომობილებით. ფასი იქნება ყველასთვის ხელმისაწვდომი“, – ამბობდა კალაძე.
Car sharing–ის სერვისმა საქართველოში თითქმის ორი წელი იმუშავა, თავდაპირველად ის თბილისში და ბათუმში ოპერირებდა, თუმცა მოგვიანებით, 2021 წლის ზაფხულში კომპანიამ ბათუმში ოპერირება შეწყვიტა და ბათუმში არსებული მაქნანები თბილისში გადაიყვანა.
Aicar–ის მანქანები სრულად აპლიკაციის მეშვეობით კონტროლდებოდა და მისი გაღებისთვის გასაღებიც არ იყო საჭირო.
აპლიკაცია აჩვენებდა თუ სად მდებარეობდა მანქანა, მომხმარებელს აღნიშნული მანქანის დარეზერვება შეეძლო, აპლიკაციითვე იღებოდა მანქანის კარიც. გადაადგილების შემდეგ მომხმარებელს მანქანის დატოვება დედაქალაქში ნებისმიერ ლოკაციაზე შეეძლო და მანქანაც აპლიკაციიდანვე იკეტებოდა.
Aicar–ს NISSAN LEAF–ის, Renault Zoe–ის და Renault Changan–ის მანქანები ჰყავს.
თაკო კვაჭანტირაძე