როგორც ცნობილია, „ქართლი ტექსტილი“ ესაა კომპანია, რომელიც MADE IN GEORGIA - ამ წარწერით ლივერპულის, ჩელსის და დორტმუნდის გუნდების უნიფორმებს შეკერავს.

„ქართლი ტექსტილის“ გენერალური დირექტორის გია ლომინაძის თქმით, ეს არ არის პირველი პროექტი, როდესაც საწარმო საფეხბურთო გუნდებისთვის უნიფორმებს შეკერავს.

„ჩვენთან, ძალიან ცნობილი გუნდების და ნაკრებების ფორმები  იკერებოდა  - თუნდაც ხორვატია, შვეიცარია, ლივერპული, დორტმუნდი, ჩელსი და  სამომავლოდაც ასე გავაგრძელებთ.  მსოფლიო დონის საფეხბურთო გუნდების ფორმები რუსთავში, სპეციალურად აშენებულ ახალ საწარმოში შეიკერება, რომელიც დაახლოებით 4 თვეში დასრულდება,“ - განარტავს გიორგი ლომინაძე „კომერსანტთან“ საუბარში.

საერთო ჯამში, პროექტის საინვესტიციო მოცულობა 20 მლნ. ლარს შეადგენს. „აწარმოე საქართველოში“-ს მხარდაჭერით საწარმომ 10 მლნ. ლარის ოდენობის სესხი აიღო.

კომპანიის დირექტორის განცხადებით, ფორმების გამოშვება ოქტომბრის ბოლოს დაიწყება და 2021 წელს, ლივერპულის, ჩელსის და დორტმუნდის გუნდები სწორედ საქართველოში დამზადებული უნიფორმებით ითამაშებენ.

რაც შეეხება საწარმოს, რუსთავის ახალ ქარხანაში დასაქმებული ადამიანების 90% ადგილობრივი მოსახლეობა იქნება, რომელთა გადამზადება, მშენებლობის პარალელურად დაიწყება. კომპანია რუსთავში 3 000 ადგილობრივს დაასაქმებს.

„შპს. „ქართლი ტექსტილის“ სახელით,  ქალაქ რუსთავში მასშტაბური პროექტი ხორციელდება, სადაც 3 000 ადამიანი დასაქმდება. სამშენებლო პროცესი ძალიან აქტიურად მიმდინარეობს. იგეგმება, რომ 4 თვეში მშენებლობა დასრულდეს და პროდუქციის წარმოება დაიწყოს,“ - განმარტავს გია ლომინაძე.

სააგენტოს ფინანსებზე ხელმისაწვდომობის კომპონენტის ფარგლებში, კომპანია უახლესი ტექნოლოგიის დანადგარებს შეიძენს, რაც მას საშუალებას მისცემს, ისეთ კომპანიებს, როგორებიცაა: Nike, Adidas, Puma, Lotto, Erima ეფექტური ტექნოლოგიით დამზადებული, მაღალხარისხიანი პროდუქცია მიაწოდოს. პროექტის ჯამური ინვესტიციის მოცულობა 20 მილიონ ლარს შეადგენს.