„ქართუ ჯგუფი“ სათავო ოფისს აახლებს – შენობის რეაბილიტაცია კომპანიამ უკვე დაიწყო. როგორც „კომერსანტმა“ გაარკვია, ფასადისა და სახურავის სარემონტო მოპირკეთებითი სამუშაოების ნებართვის მოთხოვნით „ქართუ ჯგუფმა“ დედაქალაქის მთავრობას მიმდინარე წლის მარტში მიმართა.

არქიტექტურის სამსახურის ვებ-გვერდზე განთავსებული ინფორმაციის მიხედვით ირკვევა, რომ 14–სართულიანი საოფისე შენობა მოპირკეთებულია ეკლარის ქვით, რომელიც სიძველის გამო დროდადრო ცვივა, რის გამოც შენობის ფასადებს ესაჭიროება სასწრაფო რეაბილიტაცია. დოკუმენტში ასევე, ვკითხულობთ, რომ მთავარი ფასადის მოაჯირების გამჭვირვალე მინის პანელების უმეტესობა დაბზარულია და საჭიროებს გამოცვლას.

მათი ინფორმაციით, პროექტი ითვალისწინებს მოძველებული ეკლარის ქვის მოპირკეთების თანამედროვე ალუმინის კომპოზიტური პანელებით ჩანაცვლებას, ხოლო მოაჯირების გამჭვირვალე მინა შეიცვლება ლურჯი ფერის მინით. ფასადის ნაწილი შეილესება და შეიღებება მაღალი ხარისხის თეთრი საღებავით.

ამონაწერით საჯარო რეესტრიდან ირკვევა, რომ კომპანია 2020 წლის დეკემბერში დარეგისტრირდა, აღმასრულებელი დირექტორი გოჩა ჩიკვილაძე. 100% წილის მფლობელი კი არასამეწარმეო იურიდიული პირი საერთაშორისო საქველმოქმედო ფონდი „ქართუა“.

ბაჩო ადამია