რადიო „კომერსანტის“ დილის ეთერში რძისა და რძის პროდუქტების ეტიკეტირების და რეგულაციების გამკაცრების აუცილებლობაზე საუბრისას რძისა და რძის პროდუქტების მწარმოებელთა ასოციაცია საქრძის აღმასრულებელმა დირექტორმა კახა კონიაშვილმა განაცხადა, რომ ქართულ ბაზარზე რძის პროდუქტების 70% გაუკონტროლებელია.

მისი თქმით ეტიკეტირების და რეგულაციების გამკაცრება უნდა შეეხოს იმ მწარმოებლებს, რომელიც ფიზიკური პირები არიან და ყოველგვარი ნებართვისა და ოფიციალური რეგისტრაციის გარეშე აწარმოებენ და ყიდიან რძის პროდუქტებს..

„ეტიკეტირების და რეგულაციების გამკაცრება ეხება იმ მწარმოებლებს, რომლებიც ფიზიკური პირები არიან და ყოველგვარი ნებართვის, ოფიციალური რეგისტრაციის და ყოველგვარი კონტროლის გარეშე აწარმოებენ რძის პროდუქტებს და ახდენენ რეალიზაციას. ეს ძალიან დიდ პრობლემებს უქმნის როგორც, ერთ მხრივ, მწარმოებლებს, რომლებიც ლეგალურ ჩარჩოებში მუშაობენ და გადასახადებს იხდიან, ასევე მოსახლეობას. რადგან გაუკონტროლებელი სურსათი ჯანმრთელობის თვალსაზრისით რისკის შემცველია“, - განაცხადა კახა კონიაშვილმა.

„უნდა აღიწეროს, იდენტიფიცირება უნდა მოხდეს და აუცილებლად უნდა გამოიკვეთოს ის მწარმოებლები, რომლებიც რძის პროდუქტებს არალეგალურად ამზადებენ. ჩვენი გათვლებით, ეს გაუკონტროლირებელი „შავი ბაზარი“, 70%-ზე დიდია,“ აცხადებს კახა კონიაშვილი.

საქრძის აღმასრულებელი დირექტორის თქმით, საკანონმდებლო დონეზე ყველა ის ნორმატიული აქტია მიღებული, რომელმაც ეს პროცესები უნდა გააკონტროლოს, პრობლემა ამ კანონების აღსრულებაშია.

„საკითხი მდგომარეობს იმაში, რამდენად აღსრულებადია ეს კანონი და სურსათის ეროვნულ სააგენტოს რამდენად აქვს იმის რესურსი, რომ ბაზარი გააკონტროლოს. 2020 წელს მიღებულ იქნა მე-14 დადგენილება, რომელსაც ერთმანეთისგან უნდა გაემიჯნა ბიზნეს ოპერატორები, რომლებიც სურსათს ლეგალურად აწარმოებენ და „შინა მეწარმეები“. ჯერ-ჯერობით არ გვაქვს ნათელი სურათი — რა ხდება ქვეყანაში ამ თვალსაზრისით, არ ვიცით, რამდენია ბიზნესოპერატორი და რამდენი - შინა მეწარმე. დარგი რეალურად ზიანდება, ვინაიდან არაკეთილსინდისიერ კონკურენციასთან გვაქვს საქმე“, — აცხადებს კახა კონიაშვილი.