ქართულ ბაზარზე ამ სეზონის პირველი სატაცური გამოჩნდა. ამ დროისთვის, ხილისა და ბოსტნეულის სპეციალიზებულ მაღაზიებსა და სუპერმარკეტებში კილოგრამი სატაცურის ფასი დაახლოებით 55 ლარია (21,19 დოლარია), ამის შესახებ Eastfruit-ი
წერს.
საქართველოში სათბურებში სატაცურის ერთ-ერთი მწარმოებელი კოოპერატივი „ოზაანია“, რომელსაც აღმოსავლეთ საქართველოში, დედოფლისწყაროს მუნიციპალიტეტში 6 ჰექტარი ღია გრუნტის გარდა, 4000 კვ.მ. სათბური აქვს. წელს კოოპერატივი მხოლოდ სათბურიდან 1 ტონამდე სატაცურის მოსავალს ელის, რომელიც თბილისის სუპერმარკეტების ქსელებში, მათ შორის აგროჰაბში, ნიკორასა და კარფურში გაიყიდება. გაყიდვები უახლოეს დღეებში დაიწყება. ამ სეზონზე სუპერმარკეტების მიერ შემოთავაზებული ფასები სავარაუდოდ გასულ სეზონზე დაბალი იქნება. თუ შარშან კილო სატაცური 40 ლარი (15,41 დოლარი) ღირდა, წელს სავარაუდო ფასი 35 ლარი (13,48 დოლარი) იქნება, თუმცა საცალო ფასი სუპერმარკეტის მოგების ოდენობით გაიზრდება, წერს East Fruit-ი.
სატაცურის დაბალ ფასს „ოზაანის“ ხელმძღვანელი ჯაბა გიგოლაშვილი შარშანდელთან შედარებით ქართული ლარის დოლართან მიმართებაში გამყარებით ხსნის.
ღია გრუნტზე მოსავლის აღების სეზონი დაახლოებით სამ კვირაში დაიწყება და ფასები მნიშვნელოვნად დაიკლებს. ჯაბა გიგოლაშვილის თქმით, სეზონზე საბითუმო ფასები კილოგრამზე 10-12 ლარამდე დაიკლებს. კოოპერატივი ამ სეზონზე ღია გრუნტიდან 15-20 ტონა სატაცურის მოსავალს ელის.
გიგოლაშვილის თქმით, საქართველოში სატაცურზე მოთხოვნა ყოველწლიურად იზრდება, „ოზაანმა“ წლების განმავლობაში წარმოება გაზარდა. ამ სეზონზე კოოპერატივი არასეზონურ პერიოდში გაყინული სატაცურის გაყიდვას გეგმავს. კოოპერატივს უკვე აქვს გამაგრილებელი საცავი, რომელიც USAID-ის სოფლის მეურნეობის პროგრამის ფინანსური მხარდაჭერით აშენდა. სეზონის განმავლობაში „ოზაანი“ სატაცურს სხვა ფერმერებისგან შეისყიდის გაყინული პროდუქციის შესანახად. გიგოლაშვილის თქმით, მიმდინარე სეზონში ისინი ერთ ტონამდე სატაცურს შეიძენენ. სუპერმარკეტების ქსელებში „ოზაანის“ გაყინული სატაცური 1 კგ-იან შეფუთვაში გაიყიდება.