„ქართულ ოცნებას“ ე.წ. ხრუშჩოვკების სახით უმძიმესი საბჭოთა მემკვიდრეობა დახვდა, - ამის შესახებ  თბილისის საკრებულოს განათლებისა და კულტურის კომისიის თავმჯდომარემ, ისნის რაიონის მაჟორიტარმა, კახა ლაბუჩიძემ, საკრებულოს სხდომაზე, განაცხადა.

მან კოლეგებთან ავარიული შენობებისა და ე.წ. „ხრუშჩოვკების“ ჩანაცვლების პროექტზე ისაუბრა.

დეპუტატის თქმით, აღნიშნულ საცხოვრებელ სახლებს ექსპლუატაციის ვადა 30 წელია გაუვიდა და ამ დრომდე, ვერცერთმა ხელისუფლებამ ამ პრობლემის გადაჭრა ვერ შეძლო.

როგორც კახა ლაბუჩიძემ განაცხადა, „ქართულ ოცნებას“ ე.წ. ხრუშჩოვკების სახით უმძიმესი საბჭოთა მემკვიდრეობა დახვდა, თუმცა დედაქალაქის მთავრობამ უმნიშვნელოვანესი გადაწყვეტილება მიიღო და ავარიული სახლების ჩანაცვლების პროცესი აქტიურად მიმდინარეობს.

„ეს ძალიან სასიხარულო და ათასობით ოჯახისთვის მნიშვნელოვანი გადაწყვეტილებაა, განსაკუთრებით კი, ავლაბრელებისთვის, სადაც ყველაზე მეტი პრობლემაა ამ მხრივ. მახარებს ის ფაქტი, რომ წინასაარჩევნო დაპირებებს ვასრულებთ და ჩემს სამაჟორიტაროს, ჩვენს პოლიტიკურ გუნდთან ერთად ყველა პრობლემის გადაჭრაში ვეხმარებით“, - განაცხადა კახაბერ ლაბუჩიძემ და ყურადღება ძველი თბილისური ეზოების მდგომარეობაზეც გაამახვილა.

მისი თქმით, ამ მიმართულებითაც დროული გადაწყვეტილებების მიღებაა საჭირო. ისნის რაიონის მაჟორიტარის აზრით,  ეფექტური გადაწყვეტილების მიღებისთვის აუცილებელია, რომ მოსახლეობისა და ინვესტორების ინტერესები და მუნიციპალიტეტის შესაძლებლობები თანხვედრაში იყოს.

ინფორმაციას თბილისის საკრებულოს პრესსამსახური ავრცელებს.