კორონავირუსით გამოწვეული კრიზისის მიუხედავად კომპამნია „ჭკვიანი თხილის“ პროდუქტზე მოთხოვნა  ქართულ ბაზარზე  კიდევ უფრო გაიზარდა.  მიზეზი ჯანსაღი პროდუქტი და ონლაინ ვაჭრობის გააქტიურებაა.

„ჭკვიანი თხილი“, რომლის  პროდუქციითაც ქართული რესტორნების დიდი ნაწილი მარაგდებოდა, მუშაობას ონლაინ სივრცეში საკმაოდ აქტიურად აგრძელებს და დახურული სექტორიდან მიღებული ზარალის დაბალანსებას ახერხებს. კომპანიამ მომხმარებლებს პანდემიის პერიოდში ახალი პროდუქტიც შესთავაზა.

კომპანიის დამფუძნებელი ნინო ანდრიაძის თქმით მიუხედავად იმისა, რომ ნედლეულზე ფასი საგრძნობლად მომატებულია მზა პროდუქტის ღირებულება ამ დრომდე არ გაზრდილა.

„ჩვენს მუშაობაზე მიმდინარე ამბები ცუდად არ ასახულა, პირიქით ახალი პროდუქტი დავამატეთ ბაზარზე.  ეს არის ქართული პეკანის პასტა. ეს არის თხილის ნუშის მიწისთხილისა და პეკანის პასტა, ნატურალური პროდუქტი, კარაქის მცენარეული ალტერნატივაა.  მიუხედავად იმისა, რომ არ არის იაფი და საბაზრო ღირებულება  200 გრამიანი შეფუთვა 16 ლარი ღირს და100%-ით ნატურალურია და მასზე მოთხოვნაც მაღლია. თუმცა დღეს აღარ გვაქვს მარაგი და ველოდებით როდის აღდგება მიმოსვლა რომ ნედლეულით მოვმარაგდეთ.  ასევე ვცდილობთ როგორც ახალ, ისე არსებულ პროდუქტებზე ფასი უცვლელი შევინარჩუნოთ და ვნახოთ როდემდე შევძლებთ ამას. ასევე ჩვენ შევდიოდით რესტორნებში, თუმცა ონლაინ მუშაობამ  დააბალანსა რესტორნების ნაწილი. “-აღნიშნა ნინო ანდრიაძემ.

„ჭკვიანი თხილის“ დამფუძნებელი კორონავირუსის პერიოდში პროდუქტის გაზრდილ მოთხოვნასა და სამომავლო გეგმებზეც საუბრობს და აცხადებს, რომ იზოლაციის დროს გაყიდვების მაჩვენებელმა საგრძნობლად მოიმატა.

რაც შეეხება სამომავლო გეგმებს, ანდრიაძის თქმით  ექსპორტზე გასასვლელად ჯერ კომპანია მზად არ არის, თუმცა მათ  სამომავლო გეგმაში უცხოეთის ბაზარი შედის.

„თუ მალე გაიხსნება მიმოსვლა  და დავუბრუნდით ძველებურ ცხოვრებას, დავიწყებთ მუშაობას ახალ პროექტზე, გვქონდა გეგმაში რომ ჩვენი წერტილი გაგვეხსნა და კიდევ კარგი არ ვიჩქარეთ, თორემ უდიდესი ზარალი იქნებოდა.  შემდეგი ნაბიჯი კი ექსპორტი იქნებოდა, რომლის დიდი სურვილიც გვაქვს.  თუმცა ამისთვის საჭიროა საწარმო გვქონდეს, რომელსაც ჯერ ვერ გავაკეთებთ გარემოპირობებიდან გამომდინარე, ახლა ვართ სხვის ფართში და ეს გვაფერხებს, რომ საერთაშორისო ბაზარზე გავიდეთ. „-აცხადებს ანდრიაძე.

შეგახსენებთ, რომ „ჭკვიანი თხილი“ ბაზარზე 2017 წლის დეკემბერში შემოვიდა. მისი დამფუძნებელები ცოლ-ქმარი ნინო ანდრიაძე და შოთა მურცხვალაძე არიან. წყვილმა საკუთარი ხარჯებით შექმნილ ოჯახურ ბიზნესს სახელწოდება მისი სასარგებლო თვისებებიდან გამომდინარე შეურჩია.

კომპანიის საწარმო თბილისში დაახლოებით 100 კვადრატულ მეტრზეა განთავსებული. სამომავლოდ ბრენდი უფრო დიდ მასშტაბებზე გასვლას გეგმავს.

ნათია ლომიძე