საფრანგეთი, გერმანია, პოლონეთი, საბერძნეთი და იტალია ის ქვეყნებია, სადაც ქართული ტკბილეული შეიძლება გავიდეს, მაგრამ ადგილობრივი წარმოება ამისთვის მზად ჯერჯერობით არ არის. მწარმოებლების ინფორმაციით, ევროპაში ქართულ ტკბილეულზე მოთხოვნა დიდია, თუმცა ტექნიკური ბარიერის გამო მიწოდება ვერ ხერხდება.
მიიღე ინფორმაცია უფრო სწრაფად „კომერსანტის“ Telegram-ზე.
როგორც კომპანია ,,ტკბილი ქვეყნის“ კომერციული დირექტორი კახაბერ ყრუაშვილი ,,კომერსანტთან“ ამბობს, პრობლემა ძირითადად ნედლეულის სიმცირე და პროდუქტის ვარგისიანობასთან დაკავშირებითაც არის, ვინაიდან ხანგრძლივი ტრანსპორტირების გამო ვარგისიანობის ვადა მცირდება, რითაც სტანდარტი ირღვევა.
,,დღესდღეობით ადგილობრივ ბაზარს სრულად ვამარაგებთ, მაგრამ დიდი მოთხოვნა გაჩნდა ევროპიდანაც. თუმცა, ამ გამოწვევას ჯერჯერობით ვერ ვპასუხობთ. გარკვეული კუთხით, ნედლეულის პრობლემაცაა, საკმარისი რაოდენობით ვერ შემოდის. თანაც, ამ ეტაპზე მთლიანად ქართულ ბაზარზე ვართ კონცენტრირებული. როგორც აღმოჩნდა, გლობალური გამოწვევებისთვის არ ვიყავით მზად, რაც მოხდა, არც არავინ ელოდა. ცხადია, ნებისმიერ კომპანიას უნდა ევროპულ ბაზარზე გასვლა, ხარისხის კუთხით პრობლემა არ გვაქვს, ჩვენი პროდუქცია დატესტილიც არის და ევროპის რამდენიმე ქვეყანაში მცირე რაოდენობით გადიოდა (ქართული სეგმენტისთვის), მაგრამ ტრანსპორტირების კუთხით დაბრკოლება არსებობს. კერძოდ, ტრანსპორტირების ხანგრძლივობა 2 თვეა, ამ დროს ჩვენ არ გვაქვს გრძელვადიანი პროდუქცია, ხოლო ევროპული სტანდარტი მოითხოვს, შეტანის დროს პროდუქტის ვარგისიანობის მაჩვენებელი 80%-ის დონეზე ფიქსირდებოდეს. ჩვენს შემთხვევაში, როცა 3-4 თვიანი ვარგისიანობის ვადა გვაქვს, თუკი 2 თვეს ტრანსპორტირებას მოვანდომებთ, პროდუქტის მიწოდებისას ვარგისიანობის 50% გასულია, რითაც სტანდარტი ირღვევა“, - ამბობს ყრუაშვილი.
მისივე თქმით, შესაძლებელია ემულგატორების დამატებით პროდუქტის ვარგისიანობის გაზრდა, მაგრამ ხარისხი გაუარესდება.
,,მაღალი ხარისხის ტკბილეულს ვაწარმოებთ. ხარისხის გაუარესება არც ჩვენ გვინდა და ასეთ პროდუქტს არც ევროპა მიღებს. ალბათ, დროთა განმავლობაში გამოსავალი მოიძებნება, ვაპირებთ წარმოების გაფართოებას იმ დონეზე, რომ მსგავს გამოწვევას თავი გავართვათ“, - დასძენ კომპანიის კომერციული დირექტორი ,,კომერსანტთან“.
კახაბერ ყრუაშვილის ინფორმაციით, წლის ბოლომდე ,,ტკბილი ქვეყანა“ წარმოების დაახლოებით 50%-ით გაზრდას გეგმავს.
ფაბრიკა დღეისათვის მომხმარებელს 150 დასახელების ტკბილეულს სთავაზობს. ქარხანა ფართოვდება ამ ეტაპზე 500 ადამიანია დასაქმებული, 9 000 მ/კვ ფართს ვფლობთ. გაფართოების შემთხვევაში 4 000 კვ/მ დაემატება.
მარი ჩიტაია