საზღვარგარეთ სიმულაციური სწავლების რეჟიმი კარგად დამკვიდრებული პრაქტიკაა. პროფესორ თენგიზ თაქთაქიშვილს კი ამ პრაქტიკის გაცნობის შემდეგ გაუჩნდა იდეა და სურვილი, რომ სიმულატორებზე დაფუძნებული სასწავლო პროცესი საქართველოშიც ყოფილიყო.

„2021-2022 სასწავლო წლის შემოდგომის სემესტრში უცხოელ პარტნიორებთან ერთად საცდელად დავნერგეთ სიმულატორი სტრატეგიული მენეჯმენტის სასწავლო კურსში, რამაც გაამართლა და სტუდენტებისგან დიდი მოწონება და ინტერესი დაიმსახურა. ამასთან, რამდენიმე სირთულეც გამოიკვეთა: სიმულატორი იყო ინგლისურ ენაზე, არ იყო მორგებული ქართულ რეალობას და იყო ძვირი. შესაბამისად, გაჩნდა იდეა, რომ ქართულენოვანი, შედარებით იაფი და ადგილობრივ ბაზარზე მორგებული სიმულატორი შექმნილიყო.“

- რა გამოცდილება გაქვთ ამ სფეროში?

ვარ ეკონომიკის დოქტორი, ასოცირებული პროფესორი და მენეჯმენტის საბაკალავრო პროგრამის ხელმძღვანელი საქართველოს ეროვნულ უნივერსიტეტ სეუ-ში. ასევე, ვასწავლი კავკასიის უნივერსიტეტის ბიზნესის სკოლში, შავი ზღვის საერთაშორისო უნივერსიტეტსა და ივ. ჯავახიშვილის სახელობის თბილისის სახელმწიფო უნივერსიტეტში. სიმულატორით სწავლება გასულ სემესტრში პოლონელ პარტნიორებთან ერთად განვახორციელე. გარდა ამისა, უნივერსიტეტის აკადემიურ პერსონალს ჩავუტარე ვორკშოპი სიმულატორით სწავლებასთან დაკავშირებით და ამ მიმართულებით გარკვეული გამოცდილება უკვე გამაჩნია.

- დეტალურად გვიამბეთ თქვენი სტარტაპის საქმიანობის შესახებ

სტარტაპი ქმნის ბიზნეს სიმულატორს, რომელიც სტუდენტებს და სხვა დაინტერესებულ ადამიანებს დაეხმარება იმაში, რომ მათ სიმულაციურ გარემოში მიიღონ გადაწყვეტილებები და მართონ ბიზნესი. სიმულატორის მონაწილეებს საშუალება აქვთ, დააფუძნონ კომპანია, შეიძინონ რესურსები, დაიქირაონ ადამიანები, ბაზარს შესთავაზონ პროდუქტები, დააწესონ ფასები და მათი ამ გადაწყვეტილებების შედეგები თავად იხილონ. სიმულატორის ფარგლებში სტუდენტები გუნდურად მოქმედებენ, როგორც კომპანიები და სხვა სტუდენტების მიერ შექმნილ კომპანიებს უწევენ კონკურენციას. მთელი ამ პროცესის შედეგებს კი მათთან ერთად მენტორი აანალიზებს და ღირებულ უკუკავშირს აძლევს სტუდენტებს მათ მიერ მიღებული გადაწყვეტილებების შესახებ. ეს პროცესი შეგვიძლია დავახასიათოთ, როგორც სწავლა მოქმედების გზით.

- როგორ გახსენდებათ სიმულატორზე მუშაობის დაწყების ეტაპი?

სიმულატორის სცენარზე მუშაობა რამდენიმე წელია მიმდინარეობს. მსგავსი სცენარით სტუდენტებთან მუშაობა უკვე რამდენიმე სემესტრია ხორციელდება, თუმცა, ეს ყველაფერი ხდება ფურცელზე და ამჯერად საშუალება გვექნება, რომ მისი ინტეგრირება თანამედროვე ტექნოლოგიებთან მოვახდინოთ.

ახლა კი, სიმულატორის სცენარი მზადაა და დეველოპერის მიერ მუშაობის დაწყებიდან 2-3 თვეში ის დასრულებული სახით იქნება წარმოდგენილი.

- რატომ და როგორ გადაწყვიტეთ Shark Tank-ში მონაწილეობის მიღება?

Shark Tank-ის წინა სეზონის ყურებისას გამიჩნდა იდეა, რომ მეც მიმეღო მონაწილეობა, რათა, ერთი მხრივ, პროდუქტის დასამზადებლად საჭირო ინვესტიცია მომეზიდა, ხოლო მეორე მხრივ, შემეძინა პარტნიორი, რომელიც ამ პროდუქტის ბიზნეს წრეებში პოპულარიაზაციაში დამეხმარებოდა. ველოდი, რომ განათლების სფეროსთვის ამ ეტაპზე მეტად საჭირო ინიციატივას გამოხმაურება მოჰყვებოდა და ასეც მოხდა.

- რის გაკეთებას აპირებთ აღებული ინვესტიციით?

მიღებული ინვესტიციით შეიქმნება ვებგვერდი, სადაც სიმულატორის სცენარი იქნება ინტეგრირებული და უნივერსიტეტებს, კომპანიებს, ტრენინგ- ცენტრებსა და ნებისმიერ დაინტერესებულ ადამიანს შეეძლება გამოიყენოს ის.

- და ბოლოს, ზოგადად, როგორია თქვენი სამომავლო გეგმები?

სიმულატორის შექმნის შემდეგ მოხდება მისი შეთავაზება უნივერსიტეტების, კომპანიების და ტრენინგ-ცენტრებისთვის. მომავალში ვებგვერდს სიმულატორის ახალი სცენარებიც დაემატება, ხოლო უფრო გრძელვადიან პერიოდში უცხოენოვანი (ინგლისურენოვანი და არამხოლოდ) სიმულატორის შექმნაც იგეგმება, რომლითაც რეგიონულ და გლობალურ ბაზრებზე გავალთ.

(R)