„ქართული დავოსად“, მსოფლიოში ცნობილ ოთხი სეზონის სამთო კურორტად და მაღალი დონის ჩემპიონატების მასპინძელ ადგილად ბაკურიანის გადაქცევის პირობა ჯერ კიდევ 2014 წელს გიორგი კვირიკაშვილმა ვიცე-პრემიერობის დროს გასცა, შემდეგ მას სხვა პრემიერ-მინისტრებიც, მათ შორის მამუკა ბახტაძე, გიორგი გახარია და ირაკლი ღარიბაშვილი მოჰყვნენ.

ბაკურიანის აღორძინების რეალური ძვრები კი 9 წლის შემდეგაც მხოლოდ დაპირებების დონეზე რჩება, წლევანდელ ჩემპიონატს წინ უძღოდა ტალახი თოვლის ნაცლად, მოუწესრიგებელი ინფრასტრუქტურა, ქაოტური განაშენიანება, სასმელი წყლის პრობლემა, საგზაო ინფრასტრუქტურის და ტროტუარების არარსებობა, საცობები და სხვა მრავალი ხარვეზი.

პრემიერ-მინისტრების დაპირებების ქრონოლოგია:

2014 წლის 6 ოქტომბერი

(ყოფილი) ვიცე-პრემიერი, საქართველოს ეკონომიკისა და მდგრადი განვითარების ყოფილი მინისტრი გიორგი კვირიკაშვილი — „ბაკურიანი ერთ-ერთი ძალიან ლამაზი და გამორჩეული კურორტი გახდება. ხელოვნური გათოვლიანება ზამთრის სეზონს გაახანგრძლივებს და ეს იქნება გარანტირებული სეზონი ყველა სასტუმროსთვის“, — ასე მიმართა გიორგი კვირიკაშვილმა ბაკურიანში, კინოთეატრ „დიდველში“ ადგილობრივ მოსახლეობას.

2016 წლის 10 აგვისტო

(ყოფილი) პრემიერ-მინისტრი გიორგი კვირიკაშვილი — „ძალიან დიდი განვითარება მიმდინარეობს და ეს კიდევ არ არის ყველაფერი. ბაკურიანი უნდა ჩამოყალიბდეს, როგორც რეგიონული საკონფერენციო ცენტრი, როგორიც ეს არის დავოსი შვეიცარიაში და მას ამისი ყველანაირი პოტენციალი გააჩნია“, — ასეთი დაპირება გასცა ყოფილმა პრემიერმა 7 წლის წინ.

2018 წლის 6 მარტი

(ყოფილი) პრემიერ-მინისტრი გიორგი კვირიკაშვილი — „ბაკურიანი საერთაშორისო სტანდარტების შესაბამის, ოთხი სეზონის სამთო კურორტად უნდა გადაიქცეს. სივრცითი განვითარება არის ერთ-ერთი უმთავრესი მიმართულება ჩვენი სამთავრობო გეგმის და დღეს ვამტკიცებთ ბაკურიანის მიწათსარგებლობის გენერალურ გეგმას. გენერალური გეგმა მოიცავს სასრიალო ტრასების სიგრძის გაზრდას და ერთმანეთთან დაკავშირებას, ასევე ე.წ „წრის“ შიდა ტერიტორიიის პარკად ჩამოყალიბებას, მდინარე ბაკურიანულას რესურსის სარეკრეაციო გამოყენებას, რეკრეაციული სივრცეების შექმნას, საბავშო მოედნების, კემპინგების, საფეხმავლო გზების, პარკირების მოწესრიგებას და ა.შ. მოკლედ რომ ვთქვათ, ამ რეგულაციების საშუალებით ბაკურიანი უნდა გადაიქცეს საერთაშორისო სტანდარტების შესაბამის, ოთხი სეზონის სამთო კურორტად“, — ამის შესახებ გიორგი კვირიკაშვილმა მთავრობის სხდომაზე განაცხადა.

2019 წლის 14 აგვისტო

(ყოფილი) პრემიერ-მინისტრი მამუკა ბახტაძე — „ჩვენ ბაკურიანში შემოვიტანთ ახალ სიცოცხლეს. ეს ინვესტიციები და მსგავსი საერთაშორისო ტურნირები ნიშნავს დამატებით შემოსავალს ჩვენი მოსახლეობისთვის, დამატებით სამუშაო ადგილებს და რაც მთავარია, საქართველოს მეტ ცნობადობას, როგორც საუკეთესო ზამთრის კურორტების მქონე ქვეყანას“, – ამის შესახებ მამუკა ბახტაძემ ბაკურიანში განაცხადა, სადაც „დოპელმაიერ-გარავენტა ჯგუფთან“ სამი ახალი საბაგიროს მშენებლობის დაწყებასთან დაკავშირებით ხელშეკრულება გაფორმდა.

2020 წლის 12 ოქტომბერი

(ყოფილი) პრემიერ-მინისტრი გიორგი გახარია — „ბაკურიანში უკვე დაიწყო როგორც სათაო ნაგებობის, ასევე კიდევ ერთი წყლის რესურსის მოძიების სამუშაოები და წელს უკვე 10 მლნ დაიხარჯა ამ პროექტში და 2021 წლის სეზონისთვის ეს პროექტი დასრულდება, ბაკურიანში წყლის პრობლემა არ უნდა არსებობდეს. ბაკურიანში მუნიციპალური ტრანსპორტი იქიდან გამომდინარე, რომ ადამიანების რაოდენობა ყოველწლიურად იმატებს, ტურისტების რაოდენობა იმატებს, აუცილებლად მოსაგვარებელია და წელსაც სეზონის დაწყებამდე მოესწრება სპეციალური, 10 ავტობუსი, რომელიც შესაძლებლობას აძლევს მოთხილამურეებსაც თავისი აღჭურვილობა ატარონ თან. ნაბიჯ-ნაბიჯ ჩვენ ყველაფერი უნდა გავაკეთოთ იმისთვის, რომ როდესაც ბაკურიანში ჩემპიონატი ჩატარდება ბაკურიანი სრულად უნდა იყოს მომზადებული იმისთვის, რომ ევროპულ დონეზე დავხვდეთ და ვუმასპინძლოთ ამ ჩემპიონატს“, — ამის შესახებ გიორგი გახარიამ ახალციხეში, ადიგენში, ბორჯომსა და ასპინძაში „ქართული ოცნების“ მაჟორიტარი დეპუტატობის კანდიდატის, ანტონ ობოლაშვილის წარდგენისას განაცხადა.

2023 წლის 11 თებერვალი

პრემიერ-მინისტრი ირაკლი ღარიბაშვილი — „ბაკურიანი მუდმივად მზად უნდა იყოს მაღალი დონის ჩემპიონატებისთვის. ბაკურიანში სამი ახალი საბაგირო ავაშენეთ, 6 ახალი ტრასა მოეწყო და 30 კილომეტრის მანძილზე ახალი გათოვლიანების სისტემა და ეს არის ყველაზე თანამედროვე სისტემა, რომელიც დამონტაჟდა ბაკურიანში. ჯამში 270 მილიონი ლარის ინვესტიცია განხორციელდა, ჩვენ ველოდებით მსოფლიო ჩემპიონატის დაწყებას. ვგეგმავთ მოვაწყოთ, აღვადგინოთ ტრამპლინები, სხვა ძალიან მნიშვნელოვანი ინფრასტრუქტურა შეიქმნება ამ ოლიმპიადის ფარგლებში. ბაკურიანი უნდა იყოს მუდმივად მზად იმისთვის, რომ უმასპინძლოს ასეთი მაღალი დონის ჩემპიონატებს“, — განაცხადა ირაკლი ღარიბაშვილმა ბაკურიანში ყოფნისას, სადაც მან ფრისტაილში, სნოუბორდსა და ფრისკიში 2023 წლის მსოფლიო ჩემპიონატის მოსამზადებელი სამუშაოები დაათვალიერა.

მიმდინარე წლის 16 თებერვლიდან 5 მარტის ჩათვლით საქართველო ფრისტაილში, სნოუბორდსა და ფრისკიში მსოფლიო ჩემპიონატს მასპინძლობს. „ბაკურიანი 2023“ საერთაშორისო სათხილამურო ფედერაციის (FIS) ეგიდით გაიმართება, რომელშიც 42 ქვეყნის 700-მდე სპორტსმენი მიიღებს მონაწილეობას. მსოფლიო ჩემპიონატზე 7 სახეობაში 30 სხვადასხვა შეჯიბრი ჩატარდება.