ქართული ღვინის ექსპორტზე რუსეთ-უკრაინას შორის კონფლიქტის გამწვავებას გავლენა ჯერჯერობით არ მოუხდენია. კომპანიები ექსპორტს უკრაინის ბაზარზე ჩვეულ რეჟიმში აგრძელებენ და აცხადებენ, რომ ამ ეტაპზე უკრაინულ მხარესთან დადებული კონტრაქტები არ შეცვლილა. როგორც ,,თელავის ღვინის მარნის“ დირექტორი ზურაბ რამაზაშვილი ,,კომერსანტთან“ ამბობს, უკრაინაში დიდი დაძაბულობაა, თუმცა ბიზნესზე ამის გავლენა ჯერჯერობით არ იგრძნობა.

,,უკრაინასა და რუსეთში ქართული ღვინის ექსპორტი ჩვეულ ტემპში ხორციელდება. ჩვენ შემთხვევაში, არანაირი დაბრკოლება არ არის, სამომავლოდ რა შეიძლება მოხდეს, ამაზე საუბარი ნაადრევია. დადებული ხელშეკრულებები ძალაშია და კონტრაქტების გადახედვა არ მომხდარა უშუალოდ რუსეთ-უკრაინის დაპირისპირების გამო. ჩვენ წარმოვადგენთ ბიზნესს და ვმოქმედებთ ბიზნეს გეგმების საფუძველზე, თუ იქნება შეკვეთები, ჩვეულებრივ გავაგზავნით პარტიებს, როგორც ამას ახლა ვაკეთებთ. დაძაბულობა არის, მაგრამ ეს ჩვენ საქმიანობაზე არ ასახულა, ამ ეტაპზე ეს მოცემულობაა, რომელიც ნებისმიერ მომენტში შეიძლება შეიცვალოს. თუ სიტუაცია დროულად გამოსწორდება, ჩვენი პროდუქტის ექსპორტს უკრაინაში ხელს არაფერი შეუშლის, ვფიქრობთ გაფართოებაზეც და იმედია, ამის შესაძლებლობა მოგვეცემა“, - აცხადებს რამაზაშვილი ,,კომერსანტთან“.

მისივე ინფორმაციით, დღესდღეობით ,,თელავის ღვინის მარნის“  პროდუქციის 15% უკრაინაში გადის, 9% კი რუსულ ბაზარზე იყიდება.

ცნობისთვის, ,,თელავის ღვინის მარანი“ საუკუნეზე მეტს ითვლის — ის 1915 წელს თელავის მახლობლად დაარსდა.

აღსანიშნავია, რომ ქართული ღვინის ექსპორტში რუსეთი და უკრაინა პირველ-მეორე ადგილს ინაწილებენ.

2021 წლის იანვარ-ნოემბრის მდგომარეობით, რუსეთში ექსპორტირებულია 55 867 692 ბოთლი ღვინო, უკრაინის შემთხვევაში, ეს მაჩვენებელი 11 667 525 ბოთლს შეადგენს.

ღვინის ეროვნული სააგენტოს მონაცემებით, ჯამში  2021 წელს საქართველოდან მსოფლიოს 62 ქვეყანაში 107 მილიონი ბოთლი ღვინოა ექსპორტირებული, რაც დამოუკიდებელი საქართველოს ისტორიაში ყველაზე მაღალი მაჩვენებელია.

ამ პერიოდში საქართველოდან სხვადასხვა მოცულობის ღვინის ექსპორტი 421-მა კომპანიამ განახორციელა.

მარი ჩიტაია