„კახური ტრადიციული მეღვინეობის“ (KTW) შვილობილი KTW Development-ი მცხეთის ცენტრში მდებარე რესტორან „ქართული ღვინის პალატას“ და ყაზბეგში ტურისტულ სივრცე Terravino-ს ყიდის.

ორივე ობიექტის გასხვისების შესახებ ინფორმაცია კომპანიამ facebook-ის გვერდზე განათავსა. ობიექტების გასაყიდი ღირებულება ცნობილი არ არის და მხოლოდ Terravino-ს უწერია „ფასი შეთანხმებით“.

როგორც გამოქვეყნებული განცხადებიდან ხდება ცნობილი, KTW Development-ი სრული ინვენტარით ყიდის მცხეთის 4 სართულიან „ქართული ღვინის პალატას“, რომლის პირველ სართულზე ღვინის მაღაზია და სავახშმო დარბაზია განთავსებული, ხოლო მე-2 და მე-3 სართულებზე რესტორანი და ვერანდა. რესტორანს აქვს შიდა და უკანა ეზო. რაც შეეხება ტურისტულ სივრცე Terravino-ს, 3-სართულიანი შენობა სტეფანწმინდის შესასვლელში მდებარეობს. შენობის პირველ სართულზე ღვინის მაღაზია, სწრაფი კვების სივრცე და ტერასაა განლაგებული, ხოლო მეორე სართულზე რესტორანი და ტერასა. რესტორანი ჯამში 130 სტუმარზეა გათვლილი.

„კომერსანტი“ დაინტერესდა ობიექტების გაყიდვა ხომ არ ნიშნავს კომპანიის ჰორეკა სექტორიდან გასვლას. კომპანიაში ამბობენ, რომ სექტორიდან არ გადიან და ობიექტების გაყიდვა ფინანსების რეინვესტირების მიზნით ხდება. დამატებით დეტალებზე საუბარს კომაპნიაში მოგვიანებით აპირებენ.

„ეს არ ნიშნავს იმას, რომ კომპანია გამოდის ჰორეკა სექტორიდან. ობიექტებს ვყიდით ფინანსების რეინვესტირებისთვის, ანუ სხვა მიმართულებით გვინდა რომ ჩავდოთ. დეტალებზე ინფორმაციას მოგვიანებით მოგაწვდით,“ - აცხადებენ კომპანიაში.