ზურაბ აზარაშვილმა ჯანდაცვის სექტორში ახალი რეგულაციები დააანონსა. მინისტრის თქმით, 2025 წლიდან სამედიცინო აღჭურვილობისა და სამედიცინო სახარჯი მასალების დარეგულირება მოხდება. მან ისიც თქვა, რომ კლინიკებში ინფექციის კონტროლის კუთხით ერთ-ერთი კომპონენტი სტერილური და მაღალი ხარისხის სახარჯი მასალებია.
„კომერსანტი“ სამედიცინო სფეროში სტერილური და მაღალი ხარისხის სახარჯი მასალების მნიშვნელობაზე „ამერიკული ჰოსპიტალი თბილისის“ სამედიცინო დირექტორს ირაკლი გოგოხიას ესაუბრა.
ირაკლი გოგოხიას თქმით, ზოგადად, პროცესი სწორია. მარეგულირებელ ორგანოს კლინიკაში შესვლის უფლება და ვალდებულება ნებისმიერ დროს აქვს. მან უნდა შეამოწმოს რამდენად სწორად გამართულია პროცესი - ვენტილაციის სისტემიდან დაწყებული ელექტრობით დამთავრებული; უნდა შემოწმდეს წესრიგშია თუ არა აპარატურა, რომელზეც პაციენტებს ვაერთებთ; კლინიკაში შესწავლილი იყოს უნდა ინფექციის კონტროლი, მისი დარღვევა ერთ-ერთ ყველაზე მძიმე დაავადებას - სეფსისს იწვევს, რომელსაც 85%-იანი სიკვდილიანობა აქვს.
„ინფექციის კონტროლისთვის უმნიშვნელოვანესი სტერილური მასალების გამოყენებაა. თუ მათ ერთჯერადი ვალიდაცია აქვთ, ერთჯერადად უნდა იყოს გამოყენებული. რაც შეეხება მაღალი ხარისხის სახარჯი მასალების გამოყენებას ისინიც, რა თქმა უნდა, საერთაშორისო სტანდარტებს უნდა აკმაყოფილებდეს“, განაცხადა ირაკლი გოგოხიამ.
„ამერიკული ჰოსპიტალი თბილისის“ სამედიცინო დირექტორმა ისიც გვითხრა, რომ ქართული კომპანიები მაღალტექნოლოგიურ სახარჯ მასალებს და სამედიცინო აღჭურვილობას, მათ შორის საკერავ ძაფებსაც კი, არ აწარმოებენ. ქართულ ბაზარზე შეიძლება შეგვხდეს ერთჯერადად მოსახმარი მასალები ან მედიკამენტები, რომლებიც ნახევრად მზა პროდუქციის სახით შემოდის და აქ ხდება დაფასოება და ეტიკეტირება.
მოამზადა მაკა ბიბილაშვილმა