2022 წელის კრიპტოვალუტის ბაზრისთვის მნიშვნელოვანი და გამოწვევებით სავსე პერიოდი იყო. უმსხვილესი კრიპტოვალუტის, ბიტკოინის ფასი თითქმის ყოველდღიურად მცირდებოდა და არაერთი მსხვილი კომპანია გაკოტრდა. 

რით იყო გამორჩეული მიმდინარე წელს საქართველოს კრიპროვალუტის ბაზარი და რა იყო ყველაზე მნიშვნელოვანი მოვლენები, ამის შესახებ „კომერსანტთან“ „კრიპტომატი“-ს დირექტორმა იოსებ ბოლქვაძემ ისაუბრა.

„პირველი და მნიშვნელოვანი ფაქტორი იყო ამერიკის ფედერალური სარეზერვო სიტემის პოლიტიკის და გლობალური ეკონომიკური რეცესიის შედეგად რაც მივიღეთ, ანუ ძირითადი ციფრული აქტივები მნიშვნელოვნად შემცირდა, სწორედ ამით შეგვიძლია დავახასიათოთ წლევანდელი წელი.

მეორე და მნიშვნელოვანი ფაქტორი იყო ის, რომ უკრაინაში მიმდინარე ომის შედეგად საქართველოში კრიპტოვალუტების ბაზარი მნიშვნელოვნად გაიზარდა. საქართველო ერთ-ერთ მნიშვნელოვან ბაზრად იქცა. ფაქტობრივად მთელი რუსეთი „ქოინებს“ ქართული მარკეტიდან ყიდულობს. ეს რეგიონალური და ლოკალური კუთხით ძალიან მნიშვნელოვანი მოვლენაა.

ბოლო დროს ძალიან მნიშვნელოვანი ამბავი რაც მოხდა, იყო სიდიდით მეორე-მესამე კრიპტობირჟის  FTX-ის გაკოტრება. FTX-ის კოლაფსის შედეგად, მომხმარებლების კუთვნილი სულ მცირე $1 მილიარდი გაქრა. ეს ფაქტი ბევრ ქართველ მომხმარებელსაც შეეხო. დადასტურებული მონაცემები არ არსებობს, თუმცა სუბიექტური გაზომვებით, შეიძლება ითქვას რომ Binance არის ყველაზე პოპულარული ქართველი მომხმარებლებისთვის, ხოლო მეორე ადგილზე FTX-ია, ძირითადად ქართველი მომხმარებლები ფიუჩერსული კონტრაქტებით ვაჭრობენ და სწორედ ამიტომ არის ეს ორი პლატფორმა მათთვის საინტერესო.

ეროვნული ბანკის მიერ საკანონმდებლო ცვლილებების პაკეტიც საინტერესოა, რომელიც გულისხმობს, რომ 2023 წლიდან კრიპტოს გადაცვლის საქმიანობა ჩვენს ქვეყანაში დარეგულირებული იქნება და ვირტუალური აქტივების სერვის პროვაიდერის ლიცენზიაც გაჩნდება.

და ბოლოს, ძალიან მნიშვნელოვანია Binance-ის ხელმძღვანელის ვიზიტი საქართველოში და მისი განცხადებები. თუ ამას მართლაც მოყვება რეაგირება, საქართველოში რეგიონული ოფისი გაიხსნება და ამ მიმართულებით ფულიც ჩაიდება, ძალიან კარგი იქნება ქვეყნისთვის და ლოკალური ეკოსისტემისთვისაც. Binance საქართველოში პირველ ადგილზეა, რადგან აქვს ყველაზე დახვეწილი პროდუქტი, მაღალი ლიკვიდობა და ყველაზე დიდი სავაჭრო მოცულობა“, — ამბობს იოსებ ბოლქვაძე.