სს „ქართული ლუდის კომპანიის“ 12,39%-იანი წილი, რომელსაც PSP ყიდის, ჯერაც არ გასხვისებულა. შპს „პსპ ფარმამ“ ლუდსახარშ კომპანიაში წილის გასხვისების განზრახულობის შესახებ სს „ქართული ლუდის კომპანიის“ სხვა აქციონერებსაც უკვე ოფიციალურად შეატყობინა და გასხვისებაზე მოლაპარაკებებიც დაიწყო. როგორც „კომერსანტს“ PSP-ში უთხრეს წილის შეძენაზე მოლაპარაკებები მიდის, როგორც არსებულ აქციონერებთან, ასევე სხვა დამოუკიდებელ სუბიექტებთანაც.
„ქართული ლუდის კომპანიის“ აქციების გასხვისებაზე „პსპ ფარმას“ მიღებული გადაწყვეტილება პირველ რიგში ეცნობათ კომპანიის სხვა აქციონერებს, ვისაც გააჩნიათ აქციების უპირატესად შეძენის უფლება. ამჟამად „პსპ ფარმა“, კომპანიის აქციონერების გარდა, აწარმოებს მოლაპარაკებებს სხვა პირებთანაც სს „ქართული ლუდის კომპანიის“ აქციონერებისთვის შეთავაზებული მსგავსი პირობებით აქციების გასხვისებაზე. დამატებითი ინფორმაციის მოწოდებას შევძლებთ მოლაპარაკებების დასრულების შემდეგ“, - განუცხადეს „კომერსანტს“ კომპანია „პსპ ფარმაში“.
როგორც ცნობილია, მიმდინარე წლის აგვისტოში PSP-მ განაცხადა, რომ კომპანიის მმართველმა გუნდმა საექსპორტო პოტენციალის გაზრდის მიზნით ფარმწარმოების ნაწილის გაფართოვება და ფარმაცევტული სექტორის განვითარებაზე სრული კონცენტრირება გადაწყვიტა.
კომპანიის განცხადების თანახმად, პროექტის ფარგლებში მომდევნო 2 წლის მანძილზე PSP სრულად გამოვა მის მფლობელობაში არსებული არაპროფილური ბიზნესებიდან.
მოგვიანებით კომპანიამ დააზუსტა და თქვა, რომ „ქართული ლუდის კომპანიის“ წილს 8 მლნ დოლარად ყიდის.
„ამ ეტაპზე შპს პსპ ფარმამ მიიღო გადაწყვეტილება გაასხვისოს სს „ქართული ლუდის კომპანიის“ (ზედაზენის) 12,39%-იანი წილის (7 001 000 აქცია) რვა მილიონ აშშ დოლარად და მზად არის მიიღოს წილის შეძენით დაინტერესებული პირებისაგან შესაბამისი წინადადებები“, - აღნიშნული იყო ოქტომბერში გავრცელებულ „პსპ ფარმას“ მორიგ განცხადებაში.
სს „ქართული ლუდის კომპანია” სააქციო საზოგადოებაა, რომელიც 2011 წლის 9 ივნისს დაფუძნდა. კომპანიის მიერ, მცხეთის რაიონის სოფელ საგურამოში აშენებულმა საწარმომ, ოპერირება 2012 წლის თებერვალში დაიწყო.
2021 წლის მარტში კომპანიამ დააარსა 100% შვილობილი კომპანია შპს „ჯიბისი ინვესტი“ და განახორციელა შპს „რითეილ ჯგუფში“ მისი წილის 20,04% ოდენობის შენატანი შვილობილი საწარმოს საკუთარ კაპიტალში. შპს „ჯიბისი ინვესტის ოპერაციები შემოიფარგლება მხოლოდ შპს „რითეილ ჯგუფში“ მისი წილების ფლობით და ასოცირებული საწარმოს კაპიტალში შენატანებით კომპანიის მოთხოვნისა და დაფინანსების საფუძველზე.
2022 წლის 30 ივნისის და 2021 წლის 31 დეკემბრისთვის ჯგუფის უშუალო და საბოლოო მშობელი კომპანია იყო შპს „მიქსორი (63,5%), ჯგუფის დანარჩენ აქციებს ფლობს შპს „საქართველოს ინდუსერიული ჯგუფის ჰოლდინგი“(24.11%) და „პსპ ფარმა“ (12,39%).
2022 წლის 30 ივნისის და 2021 წლის 31 დეკემბრისთვის შპს მიქსორის” მფლობელები ცეზარ ჩოჩელი, იზოლდა ჩარიგოგიშვილი და შპს „ქიისთოუნ ინვესთმენთს“, ფლობდნენ ამ კომპანიის აქციების 42,12%, 42,13%-სა და 15.75% ს. შესაბამისად, ჯგუფს არ გააჩნია საბოლოო ბენეფიციარი მფლობელი.