ევრაზიის ეკონომიკური კავშირის შიდა ბაზრის დაცვის დეპარტამენტის დირექტორმა გაავრცელა ოფიციალური შეტყობინება, რომლის თანახმად, ქართული წარმოშობის ფეროსილიკომანგანუმთან მიმართებით ანტიდემპინგური გამოძიება დაიწყო.

კომერსანტის მიერ ექსკლუზიურად მოპოვებული აღნიშნული შეტყობინების დოკუმენტი 2021 წლის 23 ივნისით თარიღდება.

გამოძიების ობიექტად სახელდება პროდუქტი, რომელიც ლითონის, მანგანუმისა და სილიციუმის შენადნობს წარმოადგენს და რომელიც ევრაზიის ეკონომიკური კავშირის საბაჟო ტერიტორიაზე საქართველოდან შედის. აღსანიშნავია, რომ დოკუმენტში საერთოდ არ არის ნახსენები კომპანია ჯორჯიან მანგანეზი.

დოკუმენტის თანამად, აღნიშნული პროდუქტის დემპინგურმა მარჟამ, „ნორმალური ღირებულებისა და საექსპორტო ფასის თანაფარდობის დაანგარიშებით“, 61% შეადგინა, რაც „ევრაზიის ეკონომიკური კავშირის წევრი ქვეყნების ეკონომიკის ამ დარგს დემპინგური იმპორტით გამოწვეულ ზარალს აყენებს“.

ევრაზიული კავშირის ბაზარზე 2016–დან 2020 წლამდე ამ პროდუქტზე მოთხოვნა 20,3%–ით გაიზარდა, ხოლო 2020–ში 2019–თან შედარებით – 7%–ით. ამ ფონზე მნიშვნელოვნად გაიზარდა ნედლეულის იმპორტი საქართველოდან, შესაბამისად, 125%–ით და 10,8%–ით.

ამავდროულად, დოკუმენტის თანახმად, საბაჟო კავშირის ტერიტორიაზე იმპორტირებული პროდქციის მთლიან მოცულობაში საქართველოს წილი 2016 წლის 30,5%–დან 2020 წელს 90,5%–მდე გაიზარდა.

დოკუმენტის ავტორები ამტკიცებენ, რომ ქართული პროდუქციის გავლენით ეკონომიკის ამ დარგმა მნშვნელოვანი ზარალი ნახა და გააუარესა მისი საფინანსო მაჩვენებლები.

გარდა ამისა, საქართველოდან იმპორტის ზრდის გამო ეკონომიკის ამ დარგში სასაქონლო მარაგები, საანალიზო პერიოდში, 4,8–ჯერ გაიზარდა.

ევრაზიის ეკონომიკური კავშირის შიდა ბაზრის დაცვის დეპარტამენტი ამტკიცებს, რომ წარმოდგენილი განცხადებით მტკიცდება შემდეგი:

– საბაჟო კავშირის ტერიტორიაზე ფეროსილიკომანგანუმის საქართველოდან დემპინგური ფასებით შეტანა;

– ევრაზიის ეკონომიკური ქავშირის ქვეყნების დარგის ზარალი განპირობებულია დემპინგური იმპორტით.

ჯორჯიან მანგანეზის მოზიცია

აღნიშნული გამოძიების დაწყებასთან დაკავშირებით „კომერსანტმა“ კითხვებით მიმართა შპს „ჯორჯიან მანგანეზს“, რომელიც ფეროშენადნობების უმსხვილესი მწარმოებელი და ექსპორტიორია ჩრდილოეთ და სამხრეთ ამერიკაში, რუსეთსში, ევროკავშირსა და სხვა ქვეყნებში.

ევრაზიის ეკონომიკურ კავშირს “ჯორჯიან მანგანეზის“ მიმართ ბრალდება არ წაუყენებია, დაიწყო გამოძიება კონკრეტული ქვეყნის კონკრეტულ პროდუქტზე, – განმარტავენ კომპანიაში.

კერძოდ, 2021 წლის 28 ივნისს შპს „ჯორჯიან მანგანეზმა“  მიიღო ევრაზიის ეკონომიკური კომისიის წერილი, კომისიის მიერ, საქართველოში წარმოებულ და საქართველოდან რუსეთში იმპორტირებულ ფეროსილიკომანგანუმთან დაკავშირებით ანტიდემპინგური გამოძიების დაწყების თაობაზე.

წერილში გაკეთებულია გადამისამართება კომისიის შეტყობინებაზე, რომელიც გამოქვეყნებულია კომისიის ოფიციალური ვებ-გვერდის შემდეგ ლინკზე: http://www.eurasiancommission.org/ru/act/trade/podm/investigations/PublicDocuments/AD36_notice_initiation.pdf 

„ჯორჯიან მანგანეზმა“, როგორც გამოძიებაში დაინტერესებულმა პირმა, კომისიასთან იშუამდგომლა კომისიის პროტოკოლით გაწერილი შესაბამისი პროცედურის თანახმად. კერძოდ, დაადასტურა გამოძიებაში ჩართვისთვის მზაობა და კომისიას მიაწოდა საჭირო მიმართვა კომისიის პორტალზე რეგისტრაციის მიზნებისთვის. ზემოაღნიშნულის შედეგად, „ჯორჯიან მანგანეზი“ მიიღებს სრულფასოვან წვდომას პორტალზე, რაც მისცემს შესაძლებლობას, გაეცნოს გამოძიებასთან დაკავშირებით პორტალზე ატვირთულ მასალებს და მიიღოს მონაწილეობა გამოძიების ფარგლებში განსახორციელებელ შემდგომ პროცედურებში.

ფეროშენადნობების ექსპორტი ხორციელდება რუსეთში (ევრაზიული ეკონომიკური კავშირის ერთადერთ ქვეყანაში), რომელიც მთლიან ექსპორტში 52% შეადგენდა 2020 წელს, ხოლო 2021 წლის 6 თვის მონაცემებით 43%-ია, – უთხრეს კომერსანტს ჯორჯიან მანგანეზში.