დასავლეთ საქართველოში მწვანილის კრეფის და ექსპორტის სეზონი რამდენიმე კვირის წინ დაიწყო, თუმცა, წინა წელთან შედარებით გაყიდვები გართულდა, ხოლო ფასები შემცირდა.
სეზონის წარმატება დამოკიდებულია მოთხოვნაზე ტრადიციულ ბაზრებზე - რუსეთში და უკრაინაში, სადაც ქართული მწვანილის დიდი ნაწილი იყიდება.
ექსპორტიორების თქმით, ამჯერად ქართული მწვანილი უმსხვილესი იმპორტიორი - რუსეთი - დიდი რაოდენობით პროდუქციას ირანში ყიდულობს. ბაზარზე მწვავე კონკურენციაა, რაც ქართულ პროდუქტზე ფასებს ამცირებს.
ფერმერებიც და ექსპორტიორებიც სეზონის დასაწყისით უკმაყოფილოები არიან - მათი თქმით, წინა წელთან შედარებით ფასები შესამჩნევად დაბალია, მოთხოვნა კი შემცირდა, როგორც უკვე ითქვა, სხვა ქვეყნებიდან შეტანილი პროდუქტის ხარჯზე.
ექსპორტიორები ასევე ქართული მწვანილის დაბალ ხარისხს უჩივიან - მათი თქმით, ამ სეზონზე დასავლეთ საქართველოში ნალექიანი ამინდების გამო მწვანილში ბევრი სიდამპლეა.
რუსეთის გარდა, ქართული მწვანილი ამ წელს ყატარში, ბალტიის ქვეყნებში და ბულგარეთში გაიყიდება. ამ ქვეყნებში ექსპორტი შედარებით გვიან - იანვარში იწყება.
ბალტიის ქვეყნებში ექსპორტიორი კომპანიის Geo-Green-ის ინფორმაციით, გაყიდვები ჯერ არ დაწყებულა, რადგანაც ამ ბაზრებზე სადღეისოდ ძირითადად ცენტრალური აზიიდან იმპორტირებული მწვანილი იყიდება, ის კი შედარებით იაფია.
შესაბამისად, დღეს ექსპორტის დაწყება ნაკლებად მომგებიანია და ქართული კომპანია ბალტიის ქვეყნებში მიწოდებას იმის შემდეგ დაიწყებს, რაც აზიიდან იმპორტი შეწყდება, ფასები კი შედარებით გაიზრდება. კერძოდ, ამ ეტაპზე ბალტიის ქვეყნებში მწვანილის მთავარი მიმწოდებელი არის და იანვრის ბოლომდე იქნება უზბეკეთი.
გასაღების ბაზრების დივერსიფიცირებაზე აქტიურად მუშაობს საქართველოში მწვანილის ერთ-ერთი უმსხვილესი მწარმოებელი Herbia, ერთადერთი კომპანია ამ დარგში, რომელიც გლობალურ სერტიფიკატ GlobalG.A.P.-ს ფლობს.
კომპანიის დირექტორის ზურაბ ჯანელიძეს თქმით, Herbia აქტიურად მუშაობს ადგილობრივ ბაზარზე და ამავე დროს პროდუქცია ბულგარეთშიც გააქვს. ამ დროისთვის კომპანიას საექსპორტო მიწოდება ჯერ არ დაუწყია, რადგანაც ჯერ საკმარისი მოსავალი არა აქვს.
კომპანია მხოლოდ თავის წარმოებულ მწვანილს ყიდის და ექსპორტის დაწყებას იანვრის ბოლოს გეგმავს.
ყატარში ქართული მწვანილის ექსპორტს კომპანია Agritouch ახორციელებს. მისი დირექტორის დავით მაყაშვილის თქმით, მიწოდებები ამ ქვეყანაში მიმდინარეობდა ბოლო 3 თვის მანძილზე, ამ ეტაპზე დროებით შეჩერებულია, თუმცა, უახლოეს მომავალში აღდგება.
რაც შეეხება ამ სეზონის პროგნოზს, ფერმერებიც და ექსპორტიორებიც იანვარში ფასებს ზრდას ელიან, თუმცა, ეს დამოკიდებულია სიტუაციაზე კონკურენტ-ქვეყნებში. ირანში და უზბეკეთში წარმოება ღია ნიადაგზე მიმდინარეობს, და ზამთარში ამინდის გაუარესებასთან ერთად ამ ქვეყნებში მოსავალი და შესაბამისად ექსპორტის მოცულობა შემცირდება. ეს კი ფასების ზრდის შესაძლებლობას ქმნის.
ამ დროისთვის საშუალოდ მწვანილის საბითუმო ფასი საქართველოში 3 ლარს შეადგენს, საექსპორტო ხარისხის პროდუქტზე კი - 4 ლარს.
east-fruit.com