ფოტო: ლელი ბლაგონრავოვა 

ქართული სამკაულის ბრენდ „საქარელს“ თითქმის 20-წლიანი ისტორია აქვს. ამ დროის განმავლობაში ის სხვადასხვა კონცეფციის კოლექციებს ქმნიდა, სხვადასხვა საუველირო ტექნიკასა და მასალას იყენებდა. როგორც „კომერსანტთან“ საუბრისას „საქარელის“ დამფუძნებელი და დიზაინერი ქეთევან საქარელი ამბობს, ბრენდის ესთეტიკა და შთაგონება ვინტაჟი, 80-იანების სტილია. ამ სტილის გავლენით შეიქმნა ოცხელის, მონდრიანის, ჰაუნდთუზის (houndstooth) კოლექციები. „საქარელი“ პოპულარული სწორედ ამ კოლექციებით გახდა.

„საქარელის“ სამკაული ონლაინ, სოცმედია პლატფორმებსა და ხელნაკეთი აქსესუარების ამერიკულ ონლაინ პლატფორმა etsy.com-ზე იყიდება. ბრენდს ასევე აქვს სახელოსნო და „შოუ რუმი“ შარტავას 22-ში. „საქარელის“ სამკაულის ფასები 180-დან 1500 ლარამდე მერყეობს.

„თავიდან ტიხრულ მინანქარსა და ვერცხლზე ვმუშაობდი. შემდეგ მინიმალისტურ კონცეფციებზე გადავედით, ვიყენებდით ტვიფრულ მინანქარს და ვერცხლზე ლაზერულ კვეთას. ეს კოლექციები უფრო მოდის სფეროს იყო მორგებული. 2018-ში კოლექცია, მასალა და ტექნიკაც შეიცვალა. მინანქარი უფრო მეტად თვლებით ჩავანაცვლეთ. გვქონდა კონცეპტუალური კოლექცია - Tulips Evolution. ავიღეთ საბჭოთა სამკაულის დიზაინი და ათჯერ გავადიდეთ ზომაში იმის ნიშნად, 80-იან წლებთან შედარებით, რამდენად გაიზარდა ქალის როლი და ადგილი დღევანდელ სამყაროში. ეს ყველაფერი უტრირებული ფორმით ვაჩვენეთ და ოქროს და ვერცლის დიდი „წულპანები შევქმენით“, — იხსენებს ქეთევან საქარელი. 

როგორც ქეთევან საქარელი ამბობს, პანდემიის შემდეგ ბრენდი ახალი კოლექციითა და ახალი მასალით, სიფრთხილით დაბრუნდა სოციალურ პლატფორმებზე.

„ჩვენი შთაგონება ახლა მეომრები და მითოლოგიაა. ტექნიკა - გემა, ინტალიო, ოქრო, ვერცხლი და ფაილონებიანი მინანქარი, რომელიც საუველირო ნაწარმში ვიქტორიანული ეპოქის მახასიათებელია. ჩვენ ისევ ვმოგზაურობთ დროში, ჩვენი კოლექციებით და ვცდილობთ, სათქმელი ესთეტიკურად და ფრთხილად ვთქვათ“, — ამობობს ქეთევან საქარელი

ბრენდის დამფუძნებლის თქმით, „საქარელი“ აღარ თანამშრომლობს მაღაზიებთან, რადგან ეს პროდუქციას აძვირებს და გეგმავენ, რომ საკუთარი მაღაზია გახსნან.

„ახალი კოლექციის ფასები ვერცხლის შემთხვევაში 180 ლარიდან 400 ლარამდე მერყეობს, ოქრო - 800-დან 1500 ლარამდე. ჩვენი ფასნამატი დაბალი იყო. ვითვალისწინებდით სხვადასხვა გარემოებებით შექმნილ კრიზისს და ფასების შენარჩუნებას ვცდილობდით, რასაც 2023 წლიდან ვეღარ შევძლებთ. მასალას, რომელსაც ახლა ვიყენებთ, საზღვარგარეთ ვუკვეთავთ, გაგვიძვირდა ტრანსპორტირება და წარმოების ხარჯებიც. ჩვენ არ ვმუშაობთ ინდუსტრიული პრინციპით, მცირე და ექსკლუზიური მოხმარების სამკაულს ვამზადებთ. ფასები 15-20%-ით იმისთვის გაიზრდება, რომ მუშაობის გაგრძელება შევძლოთ“, - ამბობს ქეთევან საქარელი.

მოამზადა მაკა ბიბილაშვილმა