ელექტროსკუტერების გაზიარების სისტემა „სქროლი“, რომელიც დედაქალაქში კორონავირუსის პანდემიის დროს, პირველად 27 აპრილს გამოჩნდა, საზოგადოებრივი ტრანსპორტის შეზღუდვის ფონზე ბევრისთვის სხვა ტრანსპორტის ალტერნატივად იქცა.
თბილისისა და ბათუმის ცენტრში „სქროლს“, როგორც გადაადგილების საშუალებას შესამჩნევად ბევრი ადამიანი იყენებს. როგორც „სქროლის“ ბიზნესგანვითარების მიმართულების ხელმძღვანელი დანიელ დოინიცინი „კომერსანტთან“ განმარტავს, შესაბამისი ინფრასტრუქტურის განვითარების შემთხვევაში, სკუტერების გაზიარების სისტემა საქართველოს სხვა ქალაქებშიც დაინერგება. ხოლო გლობალური ეპიდსიტუაციის დარეგულირების შემდეგ, ქართული „სქროლი“ ევროპის ბაზარსაც შეუერთდება.
„აპრილის შემდეგ, ჩავედით ბათუმში და დედაქალაქის საოპერაციო ზონა გავზარდეთ, გლდანში და დიღმის მასივშიც უკვე შესაძლებელია „სქროლით“ გადაადგილება.
გვინდა, რომ სერვისების დივერსიფიცირებაც მოვახდინოთ დროდადრო გაზიარებულ მობილობაში. გაზიარებული მობილობა გულისხმობს იმას, რომ სატრასნპორტო საშუალება არ ეკუთვნის ერთ კონკრეტულ პირს არმედ ქალაქში არის ხელმისაწვდომი ყველასთვის თანაბრად და ეს მარტო სკუტერს არ ეხება. ასეთი სისტემა მსოფლიოში ახალია და თანდათან მოთხოვნა მსგავს სერვისზე იზრდება.
მალე სხვა ქალაქებსა და ევროპის ბაზარზე გასვლასაც ვგეგმავთ, თუმცა ეს დამოკიდებულია პანდემიასა და იმაზე თუ როდის დაუბრუნება მსოფლიო ჩვეულ რიტმს,“ - განმარტავს დანიელ დოინიცინი.
თავდაპირველად, საზოგადოებაში ხმაური „სქროლით“ გადაადგილების ღირებულებამ გამოიწვია, რომელიც ერთი წუთი 35 თეთრი ღირს, ხოლო საათში მინიმუ 22 ლარია. დანიელ დონიცინის განმარტებით, ფასი საერთაშორისო სტანდარტებს მორგებულია და კომპანია თავისი სერვისის მეტად ხელმისაწვდომობის სქემაზე მუშაობს.
„კომპანიის შემოსვლიდან საუბარი იყო, არის და იქნება ფასებზე - ეს ნორმალური ამბავია. ნებისმიერ ადამაიანს რაღაცის მიღება იაფად სურს. მაგრამ ჩვენ, როგორც ოპერატორი და ბიზნესსუბიექტი ჩვენი მოდელით ვმუშაობთ. 120-ზე მეტი ადამიანი გვყავს დასაქმებული, სერვისის მიწოდება მოითხოვს რესურსსა და შრომას - ფასიც აქედან გამომდინარეობს. თუმცა, თანდათან ვცდილობთ უფრო ხელმისაწვდომი გავხადოთ სერვისი - დავმეგობრდით „თიბისი ბანკთან“ და „სფეისი“ ბანკთან. „სფეისის“ ვიზა ბარათის მფლობელებს ჩვენთან 30 პროცენტიანი მომენტალური ქეშბექი აქვთ, ანალოგიურად „თიბისი ბანკის“ სტუდენტურ ბარათებაზეც მოქმედებს - 30 პროცენტიანი მომენტალური ქეშბექი. ვმუშაობთ ლოიალობის პროგრამაზე - რაც უფრო ხშირად მოიხმარს ადამიანი „სქროლს“, მას ტარიფზე შესაბამისი ფასდაკლებები ექნება.
ქალაქების სწორი დაგეგმარების შემთხვევაში „სქროლი“ და ზოგადად ელექტრო სკუტერების გაზიარების სისტემა, უახლოეს 4-5 წელიწადში გადაადგილების სერიოზული ალტერნატივა გახდება. ვისურვებდით, რომ ორივე ქალაქში იყოს მორგებული ინფრასტრუქტურა გადადგილების მსგავს საშუალებებზე. მეტს თუ ვიმუშავებთ, ბევრი სხვა კომპანიაც შემოგვიერთდება,“ - აღნიშნა დანიელ დოინიცინმა.
პროექტი თბილისის მერიის მხარდაჭერით კომპანია „სქროლმა“ ამერიკულ Bird-თან თანამშრომლობით შეიმუშავა. Bird-ი 2017 წელს დაარსდა და ახლა ის 100-ზე მეტ ქალაქში ოპერირებს. სკუტერების გამოყენება აპლიკაცია Bird-ის მეშვეობით ხდება. ქალაქში სხვადასხვა ლოკაციაზე სკუტერებია დაყენებული; აპლიკაციის საშუალებით მათ ადგილმდებარეობას მომხმარებელი პირდაპირ რეჟიმში ნახულობს. შემდგომ აპლიკაციაში კამერით სკუტერზე მიკრული QR კოდის დაფიქსირება ხდება და სკუტერი აქტიურდება.
სკუტერი ერთი დამუხტვით დაახლოებით 30 კილომეტრს გადის, მისი მაქსიმალური სიჩქარე კი საათში 20 კილომეტრია.
მარიამ მორგოშია