„წინა წლის დეკემბერში ინდოეთის ბაზარზე შევედით“ - ამის შესახებ FinTech პლატფორმა „კერნელის“ დამფუძნებელმა ბექა დალაქიშვილმა გადაცემაში „ბიზნესი რუსთავი 2“-ზე განაცხადა. მისი თქმით, ინდოეთის ბაზარზე ბევრი სირთულეა, რადგან ინდოეთში საქართველოსთან შედარებით აბსოლუტურად განსხვავებული კულტურა, ადამიანების ქცევა და იერარქიაა.
„როდესაც ადამიანების დაქირავება და მათი მართვა გიწევს ეს ინდოეთში ძალიან რთული პროცესია, რადგან ჩვენი ქვეყნისგან განსხვავებით იქ იერარქია აბსოლუტურად განსხვავებულია. ეს კასტური სისტემა ორგანიზაციებშიც არის გადატანილი, რასაც ბევრი სირთულე ახლავს თან. ამჟამად თავის დამკვიდრების პროცესში ვართ. დღეს რა ეტაპზეც ვართ, აქამდე საკმაოდ კარგად მოვედით და წინ კიდევ დიდი გზაა იმისთვის, რომ ბაზარი სრულად ავითვისოთ, თუმცა კარგი ტემპით მივდივართ და ძალიან კარგად ვითარდებით“, - განაცხადა ბექა დალაქიშვილმა.
დალაქიშვილის თქმით, „კერნელი“ ფილიპინების ბაზარზეც არის წარმოდგენილი, თუმცა ფილიპინებში ბაზარი ინდოეთთან შედარებით პასიურობს, თუმცა კომპანიას ინდოეთის ბაზარზეც ძალიან პატარა წილი აქვთ ათვისებული.
„ინდოეთში 65 მილიონი მცირე ბიზნესია, რომელიც პოტენციურად ჩვენი სამიზნე ბაზარია. ამ ეტაპზე ჩვენ 30 000 მომხმარებელი გვყავს, რაც ჯერჯერობით ძალიან პატარაა, თუმცა გეგმა მთლიანი ბაზრის არა, მაგრამ გარკვეული სეგმენტის ათვისებაა. თუმცა იქამდე საკმაოდ დიდი გზაა.
ამ ეტაპზე ძირითადი პროდუქტი, რაც გვაქვს ეს არის ინვოისირება, თუმცა ინვოისების გარდა ყველანაირ ბუღალტერიასთან დაკავშირებული დოკუმენტაცია და ხარჯების ნაწილი დავამატეთ, იმიტომ რომ ბუღალტერს მიაწოდონ სრული ინფორმაცია შემოსავლების და ხარჯების შესახებ. ადგილობრივ საგადასახადო სისტემას დავუკავშირდით ინტეგრაციით, ასევე ყველაზე დიდი ბუღალტრული პროგრამა რაც არის იმასთანაც ავაწყვეთ თანამშრომლობა. ხედვა არის, რომ ვიყოთ embedded finance, თუმცა იმის გათვალისწინებით, რომ ჩვენთან კლიენტის შესახებ დიდი რაოდენობით ფინანსური ინფორმაციის აკუმულირება ხდება, ფაქტობრივად ყველანაირი შემოსავლის და ხარჯის შესახებ ინფორმაცია პლატფორმაზეა, მათ შორის გადახდების მიღება, გადახდა და ა.შ.
ეს საშუალებას იძლევა, რომ მათ მივაწოდოთ ფინანსური სერვისები, იქნება ეს სესხები, ინვოისს ფინანსირება იქნება თუ ასე შემდეგ, პარტნიორების მეშვეობით ბევრი სხვადასხვა ფინანსური სერვისები შეგვიძლია მივაწოდოთ და საბოლოო ხედვა არის ის, რომ ჩვენი პლატფორმა იყოს საოპერაციო სისტემა მცირე ბიზნესისთვის, ანუ რაც სჭირდება დოკუმენტაცია ამას აკეთებს და ავტომატურად ეს ყველაფერი ფინანსური კუთხით , საგადასახადო კუთხით და ფინანსურ სერვისებზე წვდომის კუთხით მივაწოდოთ“, - აღნიშნა ბექა დალაქიშვილმა.
რაც შეეხება ინდოეთში შიდა კონკურენციას, დალაქიშვილი აღნიშნავს, რომ კონკურენციის კუთხით საკმაოდ რთული ბაზარია, თუმცა მისივე თქმით, პროდუქტის ხარისხის მიმართ მიდგომა განსხვავებულია.
„კერნელი“ თავდაპირველად საქართველოში შეიქმნა, სტარტაპმა 2020 წელს GITA-ს გრანტიც მიიღო. შემდეგ მონაწილეობდა „საქართველოს ბანკის“ აქსელერაციის პროგრამაში 500 startups.
„როდესაც ჩვენ საქართველოდან საერთაშორისო ბაზრისკენ ყურება დავიწყეთ, შევაფასეთ ბაზრები. პირველ რიგში ჩვენ შევედით ფილიპინებში. ინდოეთის ბაზარიც შევისწავლეთ თავიდანვე, თუმცა ინდოეთი რთული ბაზარი იყო, ჯერ ფილიპინებში დავუშვით შეცდომები და შემდეგ ბევრი რაღაც ვისწავლეთ და წავედით ინდოეთისკენ და გამოცდილებამ გაგვიმაგრა ზურგი და ტექნოლოგიური მოკვლევის თვალსაზრისით ბევრად უფრო გაგვიმარტივდა საქმე“ –აღნიშნა ბექა დალაქიშვილმა.
ბექა დალაქიშვილმა აღნიშნა, რომ თავდაპირველად პროდუქტი საქართველოში დაიტესტა. სტარტაპმა 2020 წელს საქართველოში აიღო GITA - ს გრანტი, შეიძინა პირველი მომხმარებლები და ამის შემდეგ 5000 startup ის აქსელერაციის პროგრამაში მოხვდა, საიდანაც დაიწყო ახალი გზა.
„რაც შეეხება აქსელერაციის პროგრამას, 500 სტარტაპი მსოფლიოში წამყვანი აქსელერაციის პროგრამაა, მისი ყველაზე დიდი უპირატესობა არის ის, რომ სტარტაპის ცხოვრება არის რბოლა დროის წინააღმდეგ, ანუ ყველაფერი გასაკეთებელია ძალიან სწრაფად, რომ გადახვიდე შემდეგ ეტაპზე და ა.შ. აპლიკაციის შევსებას რომ იწყებ, იქიდანვე ხვდები, რომ ყველაფერს უნდა შეხედო გლობალურად, სტრატეგიის დაგეგმვაში და საერთაშორისო ბაზარზე გასვლაში 500 სტარტაპი ძალიან დაგვეხმარა“, - აღნიშნა ბექა დალაქიშვილმა.
დალაქიშვილის თქმით, საქართველოში სტარტაპის ეკოსისტემა ძალიან სწრაფად ვითარდება. მისივე თქმით, დაახლოებით 5 წლის წინ სულ რამდენიმე ადამიანი იყო ვინც სტარტაპის გაკეთება სცადა, დღეს კი საქართველოში ძალიან ბევრი სტარტაპია, რაშიც GITA- სა დახმარება ძალიან მნიშვნელოვანია, გარდა ამისა არის აქსელერაციის პროგრამებიც და შემოდის ბევრი ფონდი.
Fintech startup „კერნელი“ მარტივი ფინანსური ხელსაწყოების საბუღალტრო პროცესების გაციფრულების ქართული პლატფორმაა, სადაც მომხმარებლებს შეუძლიათ, გამოიწერონ, გაგზავნონ და მართონ ინვოისები. ასევე „კერნელი“ მომხმარებლებს სთავაზობს გამოთვალონ გადასახადები და სხვადასხვა ფინანსური მაჩვენებლები, რომლის მეშვეობითაც საკუთარ ბიზნესს მარტივად შეაფასებენ და უკეთეს ფინანსურ გადაწყვეტილებას მიიღებენ.
თაკო კვაჭანტირაძე