2023 წლის მაისამდე ქართული  თაფლი ექსპორტზე აღარ გავა - ამის  შესახებ ინფორმაციას „თაფლის მწარმოებელთა ასოციაციის“ ხელმძღვანელი ალეკო პაპავა ავრცელებს. საკითხზე ალეკო პაპავამ BMGTV - ის გადაცემა „საქმის კურსში“ ისაუბრა მისი თქმით ექსპორტის შეფერხება საქართველოში თაფლის მარაგების ამოწურვით არის განპირობებული.

მეფუტკრე აღნიშნავს, რომ გასულ წელს სექტორს თაფლის მარაგები დაგროვილი ჰქონდა, რაც წელს ამოიწურა, მისივე  თქმით გამომდინარე იქიდან, რომ ბოლო პერიოდში თაფლის ხარისხი საგრძნობლად არის გაუმჯობესებული ადგილობრივ ბაზარზე მოთხოვნა გაიზარდა.

„ერთ-ერთი მიზეზი ისიცაა, რომ ევროკავშირი ჩვენგან აკაციის თაფლს ითხოვს, საქართველოში კი აკაციის ტყეები შემცირდა, თან თაფლოვანი მცენარეების ყვავილობას წვიმიანი სეზონი დაემთხვა და საერთო ჯამში, ეს იმას ნიშნავს, რომ თაფლოვანი მცენარეების გაუმჯობესებაზე მაქსიმალურად უნდა ვიზრუნოთ.“ - განაცხადა ალეკო პაპავამ.

პაპავა  აღნიშნავს, რომ   თუ ამ დროისთვის საქართველოში ფუტკრის ერთი ოჯახი 10-15 კილოგრამ თაფლს აწარმოებს, რესურსები იძლევა იმის საშუალებას, რომ ეს რაოდენობა 25-30 კილოგრამამდე გაიზარდოს.

„ამჟამად საქართველოში 2500-3000 ტონა თაფლი იწარმოება, ჩვენ გვაქვს რესურსი, რომ ეს მოცულობა 8000-10000 ტონამდე გაიზარდოს, შემოსავალი კი თუ ახლა 2-3 მილიონია, შესაძლებელია, რომ ეს შემოსავალი 100 მილიონი გახდეს, ამისთვის კი სტანდარტების დაცვა, სკების რაოდენობის გაზრდა, მწარმოებლების ბაზის გაუმჯობესება და ცოდნის ამაღლებაა საჭირო.

აუცილებელია, რომ ამ პროცესში სახელმწიფოც აქტიურად ჩაერთოს. იყო გარკვეული პროგრამები, რომლის ფარგლებშიც სახელმწიფომ მეფუტკრეებს სკები გადასცა, თუმცა ეს სკები იმ სტანდარტებს არ აკმაყოფილებს, რომლის დაცვაც აუცილებელია, შესაბამისად ნებისმიერი ღონისძიების განხორციელების დროს სახელმწიფოს ჩვენთან უნდა ჰქონდეს კომუნიკაცია, რადგან ჩვენ ზუსტად ვიცით, რა გამოწვევები არსებობს ამ დარგში.“ - განმარტავს ალეკო პაპავა.

პაპავას  თქმით ბოლო პერიოდში აღმოფხვრილია  ლაბორატორიების პრობლემაც, და საწარმოები მუდმივად ცდილობენ, რომ აკრედიტაცია გაიარონ და საერთაშორისო სტანდარტები დააკმაყოფილონ, შედეგად ამჟამად ქართული თაფლი ევროკავშირის ყველა ქვეყანაში თავისუფლად რეალიზდება.