ინოვაციური ტექნოლოგიით დამზადებული ქართული ვაშლის ჩიფსის „ენკენი“ საქართველოს რეგიონებში გასვლას და ექსპორტზე პროდუქციის გატანას გეგმავს.

„ენკენის“ თანადამფუძნებელი თამარ შეითნიშვილი „კომერსანტთან“ კომპანიის პოსტ პანდემიურ მდგომარეობაზე, ექსპორტისთვის მზადების დეტალებზე, სამომავლო გეგმებზე და პროდუქციის ონლაინ შეძენის პრიორიტეტებზე საუბრობს.

„რამდენიმე პრიორიტეტული მიზანი გვაქვს : პირველ რიგში, გვინდა რომ საქართველოს მასშტაბით გავიდეთ და სრულად ავითვისოთ სხვა დიდი ქალაქებიც; მეორე მიზანს წარმოადგენს ექსპორტი, გვაქვს მოლაპარაკებები ესტონეთთან და ლიეტუასთან. ამ ეტაპზე თბილისის მასშტაბით გვაქვს მიწოდება, თუმცა რეგიონებში ნიკორას ქსელებშიც იყიდება. გავაკეთეთ ექსპორტისთვის საჭირო ლაბორატორიული ანალიზები. ჩვენს პრიორიტეტს წარმოადგენს ევროპის ქვეყნები და ამერიკა. გვინდა თურქეთშიც ვიყოთ წარმოდგენილები, ასევე უკრაინაში,რადგან ძალიან მოსწონთ უკრაინელ ტურისტებს ეს პროდუქტი. ამ ეტაპზე, სხვადასხვა ქვეყანაში გვყავს ჩვენი წარმომადგენლები და მიმდინარეობს პარტნიორების ძიება და მოლაპარაკებები,- აღნიშნავს თამარ შეითნიშვილი. 

კომპანია ენკენი ბაზარზე 2018 წლის ოქტომბრიდან არის წარმოდგენილი, მისი საწარმო გორის რაიონში, სოფელ დიცში, საოკუპაციო ხაზთან ახლოს მდებარეობს. პანდემიის პერიოდში, მიუხედავად არსებული სირთულეებისა, კომპანიას თანამშრომლები არ შეუმცირებია.

სტარტაპ საქართველოსგან მივიღეთ 100 ათასი ლარის ოდენობით დაფინანსება, შემდგომ სხვადასხვა ორგანიზაცია გვეხმარებოდა, მათ შორის იყო გაეროს ქალთა ორგანიზაცია და ფერმერთა ასოციაცია,რომლის დახმარებითაც გავაკეთეთ რებრენდინგი და დავამატეთ მწვანე ვაშლის ჩიპსი (უკვე 10 თვეა). ჩვენ ვართ ევროპროდუქტების, გუდვილის, აგროჰაბის, ნიკორას, რამდენიმე სპარის, უნივერსალის ქსელებში, ასევე ორგანულ მარკეტში, კავეას კინოთეატრებში,სადაც აქტიურად იყიდებოდა ჩვენი ჩიპსები და პანდემიის პირობებში, უკან დაბრუნებაც კი მოგვიწია.

პანდემიის გამო ქსელებში შეგვიმცირდა გაყიდვები, თუმცა, ზუსტად პანდემიის პერიოდშივე დავიწყეთ აქტიურად ონლაინ გაყიდვები, ახალი შეთავაზებები და ამიტომ, რაღაც ეტაპზე, ამ ქმედებამ შეაჩერა გაყიდვების შემცირება, მიუხედავად ამისა, ზოგადი ფონი, ისევე როგორც სხვა ბიზნესებისთვის, მძიმე იყო ნამდვილად. მაგრამ ეს არ შეხებია თანამშრომლების შემცირებას“, - ამბობს კომპანიის თანადამფუძნებელი.

თაკო კვაჭანტირაძე