კომპანია „ქართული ზეთისხილის“ დამფუძნებლის გიორგი სვანიძის განცხადებით, წელს ზეთისხილის კარგი მოსავალია და ამიტომ შარშანდელთან შედარებით 100%-ით მეტი ზეთისხილის აღებას და გადამუშავებას აპირებს.

როგორც „კომერსანტთან“ გიორგი სვანიძემ განაცხადა, “ზეთისხილის რთველი“ ოქტომბრიდან დაიწყება და დეკემბრის ბოლომდე გაგრძელდება.

“დღევანდელი პირობებით, გასულ წელთან შედარებით მოსავალი გაზრდილია 100%-ით. წელს ველოდებით, რომ 300 ტონიდან 400 ტონამდე მოსავალს მივიღებთ, - ამბობს ბიზნესმენი, რომელიც საქართველოში ზეთისხილის წარმოებით 2009 წლიდან დაინტერესდა და სოფლის მეურნეობის დარგის ამ მიმართულებაში პირველიც იყო.

გიორგი სვანიძის თქმით, საქართველოში წარმოებულ ზეთისხილის ზეთის 70%-ს ადგილობრივ ბაზარზე, ხოლო 30%-ს უცხოეთში ყიდის. პროდუქცია ექსპორტზე გადის ნიდერლანდებში, არაბეთის გაერთიანებულ საამიროებში, საუდის არაბეთში. ამჟამად მოლაპარაკებები მიმდინარეობს დიდ ბრიტანეთში და კატარში ექსპორტზე. ბიზნესმენი ამბობს, რომ ცდილობს ახალი ბაზრები მოიძიოს და იქ ქართული პროდუქცია შეიტანოს, რაც ასევე მოიცავს საერთაშორისო გამოფენებში პროდუქციის წარდგენასა და მონაწილეობას, რაც ერთ-ერთი ეფექტური გზაა.

მისი თქმით, ბოლო პერიოდში ზეთისხილსა და ზეთისხილის ზეთზე მსოფლიოში ფასები 30-35%-ითაა გაძვირებული, თუმცა „ქართული ზეთისხილის“ მენეჯმენტი ცდილობს ადგილობრივ ბაზარზე ფასები შეინარჩუნოს და ერთ-ერთ მისაღებფასიან პროდუქტად დარჩეს, რათა საქართველოს მოსახლეობამ ადგილობრივი წარმოების ზეთისხილის ზეთის შეძენა მოახერხოს.

კომპანია აქტიურად ზრუნავს კადრების გადამზადებაზე საერთაშორისო სტანდარტების დანერგვისთვის და ხარისხის კონტროლისათვის, ამისთვის კომპანია კადრებს საზღვარგარეთ გადაამზადებს.

„ჩვენ ვეცდებით, რომ ფასი დავარეგულიროთ და ჩვენი მომხმარებლებისთვის ფასი შევინარჩუნოთ“, ამბობს „ქართული ზეთისხილის“ დამფუძნებელი.

რაც შეეხება ზეთისხილის პლანტაციებს, მიმდინარე წელს კომპანიის გეგმებში 900 ჰა ზეთისხილის გაშენებაა, საიდანაც 450 ჰა ზაფხულის პერიოდში უკვე დაირგა, ხოლო 450 ჰა-ს დარგვა შემოდგომით მოხდება. პროექტის ღირებულება 10 მლნ ლარია.

გიორგი სვანიძე ამბობს, რომ ზეთისხილის წარმოება ზოგადად გრძელვადიანი კაპიტალდაბანდებაა და შესაბამისად ჩადებული ინვესტიციის ამოღებაც საკმაოდ დიდი ხნის შემდეგ ხდება. მთლიანად ზეთისხილის და ზეთისხილის ზეთის წარმოებაში გიორგის სვანიძის მიერ ჩადებული ინვესტიციის მოცულობა 30 მლნ ლარს აჭარბებს.

კომპანია „ქართული ზეთისხილი ზეთისხილის ბაღებს კახეთში ფლობს. „ქართული ზეთისხილის ზეთი 250-ml, 500-ml, 1000-ml მინის ქილებში, ასევე 5, 10 და 18 ლიტრიან მოცულობის თუნუქის ქილებში იყიდება. ზეთისხილის მარინადი კი - 370, 500 და 1000 გრამიან მინის ქილებშია წარმოდგენილი.

ამჟამად „ქართული ზეთისხილის ზეთი და ზეთისხილი გასაყიდად სპარში „კარფურში, „გუდვილში, „ნიკორასა და „აგროჰაბშია წარმოდგენილი.