ქართული წვენის მწარმოებელი კომპანია „ალალი“, რომელიც 2018 წლიდან თელავში ადგილობრივი ხილისგან ნატურალურ წვენებს აწარმოებს, უკვე ამერიკის ბაზარზე გამოჩნდა. სამომავლოდ კი ლიტვის, საბერძნეთის, რუსეთისა და ბელორუსიის ბაზრებზეც გამოჩნდება. როგორც კომპანიის დამფუძნებელი გოჩა ღვინეფაძე, „კომერსანტთან“ განმარტავს ლოს ანჯელესსა და ნიუ ჯერსიში თელავში წარმოებული „ალალი“ საკმაოდ მოთხოვნადია.
„ჩვენი ხილის
გადასამუშავებელი ქარხანა ადგილობრივი მეწარმეებისგან იღებს ნატურალურ პროდუქტებს
- ვაშლს, ატამს, ყურძენს, ალუბალს, ციტრუსებს. ყველაფერი, რასაც ვამზადებთ არის
დანამატებისა და კონსევანტების გარეშე. საწარმოში დასაქმებულია დაახლოებით 25 ადამიანი.
ქართულ ბაზარზე დღესდღეობით „კარფურის“„ფრესკოს“ „უნივერსამი“ „ზღაპარის“ „ბაიას“ „ნიკორას“, „ლიდერფუდის“, „გუდვილის“ ჰიპერმარკეტებშია წარმოდგენილი და მიდის მოლაპარაკება „ფუდმარტთან“.
აღსანიშნავია , რომ მოთხოვნა ნატურალურ პროდუქტებზე წლიდან წლამდე იზრდება და ეს ხარისხითაა გამოწვეული, თუმცა მაინც რთულია იმპორტულ პროდუქციასთან კონკურენცია, რომლის ხარისხიც დაბალია და ფასიც.
ამერიკაში ჩვენი პროდუქცია საშუალოფასიან სეგმენტში გადის. მოლაპარაკებები რამდენიმე ქვეყანასთან გვაქვს თუმცა პანდემიამ პროცესები გარკვეულწილად შეაფერხა. ალბათ წლის ბოლოდმე კიდევ სამ ქვეყანაში გამოჩნდება ჩვენი პროდუქცია“- განმარტავს გოჩა ღვინეფაძე.
კომპანია „ალალი“-ს სამომავლო გეგმებში გაფართოებაც შედის, 1 მილიონ 300 ათასის ინვესტიციით თელავში ქარხნის მიმდებარე ტერიტორიაზე სამაცივრე და სასაწყობე მეურნეობები აშენდება.
კომპანია „ალალმა“ ქარხანა 2018 წელს 2 მილიონ 800 ათასი ინვესტიცით სახელმწიფოს პროგრამის ფარგლებში ნაწილობრივი დაფინანსებით ააშენა. ქარხანამ უკვე 500 ტონა ხილი გადაამუშავა, USAID-თან მოლაპარაკებით კი „ალალი“ უახლესი დანადგარების შეძენის პროცესს ახორციელებს.
მარიამ მორგოშია