ნატურალური ქართული წვენის მწარმოებელი კომპანია „ალალი“ საექსპორტო არეალს აფართოებს. ერაყის, აშშ-ის, კანადის და უკრაინის შემდეგ, პროდუქტი უკვე ბალტიისპირეთისა და ჩეხეთის ბაზრებზეც გავა. როგორც პროდუქციის მწარმოებელი კომპანია „აჩინებულის“ დამფუძნებელმა გოჩა ღვინეფაძემ ,,კომერსანტთან“ განაცხადა, თელავში წარმოებული „ალალი“ საექსპორტო ბაზრებზე საკმაოდ მოთხოვნადია.

,,აჩინებული“ აქტიურად არის ჩართული არასტანდარტული ვაშლის სუბსიდირების პროგრამაში.

,,ჩვენი ხილის გადასამუშავებელი ქარხანა ადგილობრივი მეწარმეებისგან იღებს ნატურალურ პროდუქტებს - ვაშლს, ატამს, ყურძენს, ალუბალს, ციტრუსებს. ყველაფერი, რასაც ვამზადებთ, არის დანამატებისა და კონსერვანტების გარეშე. არასტანდარტული ვაშლის სუბსიდიის პროგრამის ფარგლებში, 50 ტონა უკვე შევიძინეთ. ვაპირებთ კიდევ ამდენივე ვაშლის შესყიდვას. თუმცა, ამ ეტაპზე დროებით გადავინაცვლეთ ყურძნის შესყიდვაზე, რათა მოგვესწრო. მოგვიანებით ბროწეულის და ფორთოხლის გადამუშავებასაც დავიწყებთ.  შარშანდელთან შედარებით, 80%-ით გაიზარდა წარმოება, შესაბამისად, იზრდება ექსპორტიც, ტრადიციულ ბაზრებს მალე ბალტიისპირეთი და ჩეხეთიც დაემატება“, - ამბობს ღვინეფაძე.

კომპანია ,,აჩინებული“ აქტიურად მონაწილეობს გლობალურ მასშტაბურ გამოფენებზე. სულ ახლახან ემირატებიდან დაბრუნებული ბიზნესმენი ახალი პროექტებისთვის ემზადება. გოჩა ღვინეფაძის თქმით, ყოველი ახალი გამოფენას მოჰყვება ახალი კონტრაქტები და გეგმები. ემირატებში გამართული საკვები და სასმელი პროდუქციის საერთაშორისო გამოფენის შემდეგ კომპანიამ უკვე გააფორმა ხელშეკრულება, რომლის ფარგლებშიც იგეგმება  100-დან 150-მდე კონტეინერის გაგზავნა ექსპორტზე.

ცნობისთვის: ქართული ნატურალური ხილის წვენების მწარმოებელი კომპანია „აჩინებულის“ საწარმო თელავში მდებარეობს. ის „ერთიანი აგროპროექტის“ ფარგლებში შეიქმნა და 2019 წლის ზაფხულიდან ამოქმედდა. საწარმოში ჯამში 2,8 მილიონი ლარის ინვესტიცია განხორციელდა.

საწარმოში დასაქმებულია დაახლოებით 25 ადამიანი.

მარი ჩიტაია