TV25.GE-ს ინფორმირებული წყარო ქობულეთის მერიიდან უყვება, რომ ვიცე-მერმა ევროპაბეთში 28 000 დოლარიანი მანქანა მოიგო. ფაქტს დავით ვერულიძე ადასტურებს, თუმცა გვარწმუნებს, რომ პრიზი მამისაა.
საჯარო მოხელემ ძვირადღირებული ავტომობილის მოგება ქონებრივ დეკლარაციაშიც ასახა.
"თუ გინდათ დამაბრალეთ, რომ მანქანა მე მოვიგე, არც ესაა პრობლემა. კანონი არ დამირღვევია, ამის უფლება გვქონდა. ოჯახმა მოიგო ავტომობილი, კონკრეტულად მამაზეა საუბარი. მანქანა უკვე გავყიდეთ, რაც დეკლარაციაში ასახულია. თუ ზუსტად მახსოვს და არ ვცდები, 40 ლარიანი ბილეთი გვქონდა," - გვითხრა ქობულეთის მერის მოადგილემ.
დავით ვერულიძე ასევე, განმარტავს, რომ მანქანა გასულ წელს, მსოფლიო ჩემპიონატის მიმდინარეობისას მოიგო.
"მსოფლიო ჩემპიონატის აქტიური გულშემატკივარი ვარ, მათ შორის ოჯახიც. სულ ვუყურებთ, გათაშებაში მამა იყო ჩართული და მოგებაც მისია,"- ამბობს დავით ვერულიძე TV25.Ge-სთან საუბრისას.
როგორც ჩანს, ქობულეთის ვიცე-მერი ერთადერთი ჩინოვნიკი არ არის, რომელიც აზარტული თამაშების იღბლიანი მომხმარებელია.
ამბროლაურის მერი, დავით მხეიძე, რომელმაც ერთ-ერთი ტოტალიზატორის სატელევიზიო გათამაშებაში 2019 წლის პორშე კაიმანი მოიგო, ამბობს, რომ აზარტული თამაშების პოპულარიზების წინააღმდეგია.
ნეტგაზეთთან საუბარში მერი განმარტავს, რომ ეთანხმება რიგი პარლამენტარების ინიციატივას, რომლებიც აზარტული თამაშების რეკლამირებისა და პოპულარიზების წინააღმდეგ გამოდიან. ამ ინიციატივას შესაბამისი კანონპროექტი მოჰყვა, რომელიც “რეკლამის შესახებ კანონში“ ცვლილებებს ითვალისწინებს.
“მე მაგით არც დაკავებული ვარ და არც შეპყრობილი, არც იმდენ დროს ვხარჯავ, რომ ჩემს საქმეს ხელი შეეშალოს. უბრალოდ, რაღაც პერიოდის წინ ჩემმა ბიძაშვილებმა გამიკეთეს ეს გვერდი[ტოტალიზატორის საიტზე], წლების წინ.
ხან თვითონ დებდნენ ამ გვერდიდან, ხან- ის, ხან- ეს. ისე კი მიყვარს ფეხბურთი. ერთ-ერთ საღამოს მივედი და ბილეთი ვიყიდე, გასართობად, ჩვენც ადამიანები ვართ. თორემ მაგის არც დრო მაქვს და არც საშუალება დიდად“, – ამბობს მერი ნეტგაზეთთან საუბარში.
მისივე განმარტებით, აზარტულ თამაშებში ჩართულნი არ უნდა იყვნენ ახალგაზრდები და სკოლის მოსწავლეები, შედარებით ასაკოვანი მოსახლეობა კი, “თუ უნდა თამაში, ითამაშებს, რა თქმა უნდა“.
შეგახსენებთ, საქართველოს პარლამენტმა 2021 წლის 22 დეკემბერს, 82 ხმით 1-ის წინააღმდეგ, მესამე მოსმენით სათამაშო ბიზნესის რეგულაციების გამკაცრებას მხარი დაუჭირა. კანონმდებლობის თანახმად 2022 წლის პირველი მარტიდან ააზარტული თამაშების რეკლამა იკრძალება, გარდა ამისა აზარტულ თამაშებში ჩართვა დაახლოებით 1 მილიონ ადამიანს აეკრძალა, ესენი არიან 25 წლამდე ასაკის პირები, სოციალურად დაუცველი ადამიანები, საჯარო მოხელეები, ასევე ის ადამიანები, რომლებიც თავად მიმართავენ შემოსავლების სამსახურს, რომ მსგავსი ქმედება შეეზღუდოთ.
სათამაშო ბიზნესს ახალი რეგულაციები დაუწესდა სხვადასხვა მიმართულებით:
კერძოდ:
- სრულად აიკრძალა როგორც ონლაინ, ასევე ფიზიკურ სივრცეში არსებული სათამაშო ბიზნესის რეკლამირება (თუმცა სპონსორობა კვლავ დაშვებული იქნება);
- სრულად აიკრძალა 25 წლამდე პირებისთვის თამაში;
- ონლაინ სათამაშო ბიზნესის დაბეგვრის მექანიზმი შეიცვალა. სექტორის გადასახადების დასაბეგრი ბაზა 65-70%-ით გაიზარდა.
წყარო: tv25.ge, netgazeti.ge