შპს ,,ჯეო მულჩის“ (Geo Mulch LLC) საქმიანობა პანდემიური პერიოდისას საგრძნობლად შეფერხდა. გარდა იმისა, რომ მოთხოვნამ იკლო, შემცირდა წარმოებაში დასაქმებულთა რაოდენობაც, ფაქტობრივად განახევრდა. ამ მდგომარეობამ, როგორც ,,ჯეო მულჩის“ დამფუძნებელი მიხეილ მესტვირიშვილი განმარტავს, შეიცვალა ექსპორტთან დაკავშირებული გეგმაც, თუმცა მაქსიმალურად ცდილობენ, რომ წარმოება გააფართოონ და როგორც საქართველოში, ასევე მთლიანად სამხრეთ კავკასიაში დანერგონ მულჩირების კულტურა.

საქართველოში ,,ჯეო მულჩი“ პირველია, რომელმაც ინოვაციური პროდუქტი – ორგანული მულჩი და მულჩირების კულტურა ჩამოიტანა და დანერგა. კომპანია სამხრეთ კავკასიის მასშტაბით ერთადერთი მწარმოებელია, რომელიც 2015 წლიდან აშშ–ის სტანდარტის დაცვით ხის ნარჩენისგან  ორგანულ ხის მულჩს აწარმოებს.

როგორც მიხეილ მესტვირიშვილი ,,კომერსანტთან“ აღნიშნავს, მულჩის შემოტანის იდეა აშშ–ში დაიბადა, სადაც მულჩის კულტურას ასწლოვანი ისტორია აქვს და წარმატებით იყენებენ როგორც სოფლის მეურნეობაში, ასევე ლანდშაფტურ დიზაინში და დეკორატიულ მცენარეთა მოვლისათვის.

კომპანია „ჯეო მულჩის“ დამფუძნებელმა ინტერესი საქმედ აქცია და რამდენიმე წლის განმავლობაში სწავლობდა მულჩის კულტურას, მის გამოყენებას და წარმოებას აშშ–ის წამყვან უნივერსიტეტებში (კოლორადოს სახელმწიფო უნივერსიტეტი, ჩრდილო კაროლინის უნივერსიტეტი), შემდეგ კი ეს ტექნოლოგია საქართველოში დაენერგა.

,,1999 წლიდან ამერიკაში ვცხოვრობ, 2008-2009 წლებში შევამჩნიე მულჩის წარმოება, რამაც ძალიან დამაინტერესა.  დავიწყე მოკვლევა, ინფორმაციის შეგროვება და ამ ინოვაციით ჩამოვედი საქართველოში, ვფიქრობ, რომ ქვეყნისთვის საჭირო ტექნოლოგია ჩამოვიტანე. ამას განსაკუთრებული ხაზგასმით აღვნიშნავ, რადგან ბოლო წლების  განმავლობაში საქართველოში ნამდვილად დგას მიწების უნაყოფობის და ეროზიის პრობლემა. აქედან გამომდინარე პრობლემა გადაჭრას საჭიროებს. გლობალური დათბობის  პირობებში მულჩი შეუცვლელი პროდუქტია, მიწის გამოფიტვას, ტენის შენარჩუნებას,  ნივთიერებათა ცვლას, ნიადაგის ბიო სფეროს განვითარებას უწყობს ხელს. ფაქტობრივად საფარველს წარმოადგენს  კლიმატური ცვლილების დროს, ტემპერატურული რეჟიმის მარეგულირებელია. ძალიან ბევრი დადებითი თვისება აქვს და საჭიროდ ჩავთვალე დამეწყო წარმოება, ამ მიზნით დავბრუნდი შორეული ემიგრაციიდან 2 ჩემი პარტნიორი ამ ეტაპზეც ამერიკაში რჩება“, - ამბობს მიხეილ მესტვირიშვილი.

პანდემიისას მთავარ გამოწვევას ექსპორტი წარმოადგენს. როგორც მეწარმე აღნიშნავს, თანაინვესტირების ფონდის დახმარებით იგეგმებოდა წარმოების გაფართოება, რასაც პანდემიამ ხელი შეუშალა.

პრობლემა გაჩნდა ადგილობრივ ბაზარზეც და წარმოება მინიმუმ 30%-ით შემცირდა. ეს მაშინ, როცა წლიდან წლამდე მულჩის მიმართ მოთხოვნა ორმაგდებოდა.

,,წარმოება უკვე 6-7 წელია ვითარდება. პირობითად, 2015 წელს საქართველოში 30 000 ლარის მულჩს თუ ვყიდდით,  2016 წელს 150 000 ლარის იყიდებოდა,  ასე ყოველწლიურად 2-ჯერ მატულობდა გაყიდვის მაჩვენებელი, ხოლო 2019 წელს რეალიზაციამ პიკს მიაღწია (გახუთმაგდა 2018 წელთან შედარებით), მარკეტინგზე მინიმალური დანახარჯების ფონზე. პირველ რიგში იმიტომ, რომ ეკოლოგია და ჯანსაღი გარემო ერთ-ერთი პრიორიტეტი გახდა“, - ამბობს მიხეილ მესტვირიშვილი ,,კომერსანტთან“.

კომპანიის წლიური ბრუნვა ამ ეტაპზე 500 000 ლარს შეადგენს.

შპს „ჯეო მულჩი“ ქართულ ბაზარზე 2014 წლიდან ფუნქციონირებს. პროდუქტს გავლილი აქვს შემოწმება და დადასტურებულია მისი გამოყენების აუცილებლობა სოფლის მეურნეობის სამინისტროს, პარლამენტის გარემოს დაცვის კომიტეტის და აკრედიტებული ლაბორატორიების მიერ.

კომპანიამ 2018 წელს თიბისის ბანკის მიერ გამართულ ეროვნულ ბიზნეს დაჯილდოებაში გაიმარჯვა ნომინაციით “ბიზნესი დადებითი გავლენისთვის”, 2019 წელს კი საქართველოს პასუხისმგებელი ბიზნეს კონკურსის “მელიორას” გამარჯვებული გახდა ნომინაციაში “ნარჩენების მართვა”. 2020 წელს საქართველოს ინტელექტუალური საკუთრების ეროვნულ ცენტრში კომპანიის მიერ წარმოებული პროდუქტი, როგორც “სიახლე ტექნოლოგიაში” დაპატენტდა სახელწოდებით – ეკოლოგიურად სუფთა “ბიოორგანული მულჩის” წარმოების ექსკლუზიური ტექნოლოგია (პატენტის # GE U 2021 2064 Y).

ცნობისთვის, მულჩი მიიღება მაგარი და რბილმერქნიანი მცენარეების მსხვილ და წვრილ ფრაქციებად დაქუცმაცებით. მუშავდება ეკოლოგიურად სუფთა ბიოორგანული თხევადი სასუქით – ორგანიკა. შეფერვა ხორციელდება აშშ–ის სტანდარტების შესაბამისი სპეციალური საღებავით.

მარი ჩიტაია