სარბენ ბილიკზე გაჩენილი ბიზნესიდეა ნიკა აბაშიძისთვის წარმატებული აღმოჩნდა და დღეს ,,ქარუს“ სერვისით სარგებლობა უკვე აშშ-შიცაა შესაძლებელია.
„ქარუ“ ქართული პლატფორმაა, რომელიც საშუალებას იძლევა, რომ მანქანის შეკეთების უსიამოვნო პროცესი ავტოასისტენტს გადააბარო და მანქანა შეკეთებული დაიბრუნო.
როგორც კომპანიის დამფუძნებელი ნიკა აბაშიძე აცხადებს, ამერიკის ბაზარი ძალიან დიდია და მის ასათვისებლად და გასავითარებლად გუნდი ყველაფერს აკეთებს.
„ამერიკის ბაზარი ძალიან დიდია. ამიტომაც ვმუშაობთ, რომ მაქსიმალურად ავითვისოთ და განვვითარდეთ. იქ მუშაობის იმავე მოდელს ვიყენებთ, რასაც საქართველოში და ჩვენი სერვისით ბევრი სარგებლობს, განსაკუთრებით ხანდაზმულები, რომელთათვისაც მარტივი და კომფორტული სერვისი პრიორიტეტულია,“- აცხადებს „ქარუს“ დამფუძნებელი ნიკა აბაშიძე.
შეგახსენებთ, რომ „ქარუ“ 2018 წელს შეიქმნა. ფინანსური პრობლემების გადასაწყვეტად ნიკა აბაშიძემ ჯერ საქართველოს ინოვაციების და ტექნოლოგიების სააგენტოს (GITA) მიმართა, შემდეგ კი, როცა კრედიტის აღებისას საფინანსო კომპანიასთან პრობლემა შეექმნა, „აწარმოე საქართველოს“ სესხის უზრუნველყოფის პროგრამით ისარგებლა.
„ქარუ“პირველი ქართული კომპანია გახდა, რომელმაც 2019 წელს სამსახურში ოფიციალურად ძაღლი დაასაქმა. ბიგლუ თანამშრომლების განწყობაზე ზრუნვის დეპარტამენტის უფროსია და ის ანაზღაურების სახით დღეში ორჯერ კვებასა და 1-საათიანი სეირნობას იღებს.
„ქარუს“ ანგარიშზე დღეს უკვე 50 000-ზე მეტი შეკეთებული მანქანაა.