ქართულ ბაზარზე ქათმის ხორცის ფასი კატასტროფულად იზრდება. 2021 წელს, წლიურ ჭრილში, ხორცისა და ხორცპროდუქტების ღირებულება თითქმის 12%-ით გაიზარდა. თუმცა ტენდენცია ამით არ შეჩერებულა. ქათმის ხორცპროდუქტები მკვეთრად გაძვირდა იანვარშიც, რის მიზეზადაც ქართველი მეწარმეები გლობალური პროცესის გავლენას, განსაკუთრებით კი ნედლეულის მაღალ ფასს ასახელებენ.
როგორც ,,კომერსანტთან“ კომპანია ,,კუმისის“ დამფუძნებელი, ,,მეფრინველეობის ასოციაციის“ ხელმძღვანელი ზურაბ უჩუმბეგაშვილი აღნიშნავს, მარტო საკვების ხარჯი 1 წელიწადში გაორმაგდა, რასაც ბიზნესი რთულად უმკლავდება.
,,ქათმის ხორცის წარმოების ხარჯი კატასტროფულად გაზრდილია, ამიტომ ყველამ გააძვირა, ვის როგორც უღირს. ეს არ იყო მოულოდნელი, 1,20 ლარს მიაღწია ხორბლის ფასმა, როცა პანდემიამდე 55-60 თეთრად ვყიდულობდით. საკვების ხარჯი თვითღირებულებაში კი 65-70%-ის ფარგლებშია. ფასების შეკავება დღევანდელ მდგომარეობაში ძალიან ძნელი, ფაქტობრივად წარმოუდგენელია გაძვირებული ნედლეულის გამო. რაც დიდია წარმოება, დანარჩენი ხარჯი შედარებით მცირეა. ამიტომ მასიურად მოიმატა ქათმის ხორცის ფასმა, ზოგმა 10%-ით, ზოგმა 15%-ით გააძვირა. ტენდენციას მივყვებით, რასაც ვერავის დავაბრალებთ, მთელი მსოფლიოს მასშტაბით ასეა. კოვიდმა მთელი სამეწარმეო ბიზნესი თავდაყირა დააყენა“, - ამბობს უჩუმბეგაშვილი და დასძენს, რომ გაიზარდა კვერცხის წარმოების თვითღირებულებაც და არ არის გამორიცხული, ქათმის ხორცის შემდეგ კვერცხის ფასი ისევ დაკორექტირდეს.
,,გარდა საკვებისა, სხვა ნედლეულიც გაძვირებულია, კვერცხის წარმოება რომ ავიღოთ, მარტო მუყაოს ყუთი, რითაც მაღაზიებში პროდუქტი შედის, 3,20 ლარი გვიჯდება, როცა 1,20 ღირდა. 23 თეთრი ღირს ქაღალდის თითო ფირფიტა, რომელსაც აქამდე 13 თეთრად ვყიდულობდით. ყველაფერს ,,ცეცხლი უკიდია“, ბიზნესიც რთულ სიტუაციაშია. ყოველი თეთრი მტკივნეულია როგორც მომხმარებლისთვის, ასევე ინდუსტრიისთვისაც, რადგან რეალიზაცია ჭირს. დაინტერესებული ვართ და თუ მცირე საშუალებაც გამოჩნდება, ფასი უნდა დავწიოთ, მაგრამ ჯერჯერობით თავს ზევით ძალა არ არის. არაფერი გამოვა, რაც არ უნდა ვცადოთ, მთელ მსოფლიოში ინფლაციასთან დაკავშირებული პრობლემაა და ვერც ჩვენ აღმოვჩნდით გამონაკლისი“, — აცხადებს ზურაბ უჩუმბეგაშვილი.
ცნობისთვის, სურსათისა და უალკოჰოლო სასმელების ჯგუფში ერთ-ერთი პროდუქტია ხორცი და ხორცის პროდუქტები, რომელიც 2021 წელს ყველაზე მეტად გაძვირდა. კერძოდ, ზრდა ამ მიმართულებით 11,9 %-ს შეადგენს.
სტატისტიკის ეროვნული სამსახურის მონაცემით, იანვარში ინფლაციის დონემ გასული წლის ანალოგიურ პერიოდთან შედარებით 13.9% შეადგინა, ბოლო 12 თვეში კი სამომხმარებლო ფასები საშუალოდ 10.5%-ით გაიზარდა.
მარი ჩიტაია