იჯარის ფასები მნიშვნელოვნად მაღალი დარჩა 2021 წლის ანალოგიურ პერიოდთან შედარებით. მონაცემები არ მიუთითებს იმაზე, რომ ქირაზე მიგრაციის გავლენა კონცენტრირებულია რომელიმე კონკრეტულ რაიონში. წლიურმა ზრდამ თითქმის ყველა რაიონში 70%-ს გადააჭარბა. MoM-ის თვალსაზრისით, ქირავნობის ფასების ყველაზე მაღალი ზრდა ჩუღურეთმა აჩვენა (+7,1%). ინფორმაციას „თიბისი კაპიტალი“ აქვეყნებს.
ორგანიზაციის მიერ გამოქვეყნებულ მიმოხილვაში „თბილისის საცხოვრებელი ბაზარი“ აღნიშნულია, რომ 2022 წლის სექტემბერში, ქირავნობის შემოსავლების მიხედვით, პირველი 3 უბანი იყო დიდი დიღომი (14.5%), ისანი (13.4%) და გლდანი (12.3%).
2022 წლის სექტემბერში თბილისის Airbnb-ის ბაზარზე აქტივობა ძირითადად წინა თვის მსგავსი იყო, MoM-ის პირობებში მნიშვნელოვანი ცვლილებების გარეშე.
„აქტიური განცხადებების რაოდენობა გაიზარდა 2022 წლის აგვისტოსთან შედარებით (+8,9%). მიუხედავად ამ გაუმჯობესებისა, ეს მაჩვენებელი მაინც დარჩა პანდემიამდელი დონის ქვემოთ (-24% 2019 წლის აგვისტოსთან შედარებით). ერთხელ მაინც დაჯავშნილი ქონების რაოდენობამ ასევე გამოავლინა MoM ზრდა (+8,1%), რამაც ოდნავ შეამცირა სხვაობა 2019 წელთან შედარებით (-24%). გარდა ამისა, დაჯავშნილი ღამეების რაოდენობა კვლავ ჩამორჩა 2019 წლის დონეს 24%-ით. დაკავებულობის კოეფიციენტი წინა თვესთან შედარებით 5 პროცენტით დაეცა, თუმცა პანდემიამდელ დონეს 20 პროცენტით მაინც გადააჭარბა (ძირითადად დაბალი მიწოდების გამო).
არსებულმა ვითარებამ და მიგრაციის ახალმა ტალღამ შესაძლოა მოკლევადიან პერიოდში დადებითი გავლენა იქონიოს ბინის გაზიარების ბაზარზე. თუმცა, მთავარი „ტურიზმის სეზონის“ დასრულებასთან ერთად, ჩვენ ველით, რომ Airbnb-ის ზოგიერთი მფლობელი გადაერთვება ტრადიციულ (გრძელვადიან) გაქირავებაზე, რაც, თავის მხრივ, შეამცირებს ქონების მიწოდებას ბაზარზე“, — აღნიშნულია მიმოხილვაში.