საქართველოში ქლიავის რეალიზაცია უკვე დაიწყო, მაგრამ ძირითადი სეზონი აგვისტოს ბოლოს იწყება. მიუხედავად იმისა, რომ შიდა ქართლში ქლიავის ნარგავები მეტნაკლებად დაზარალდნენ გაზაფხულის ყინვების გამო, მოსავლის მოცულობის მკვეთრი შემცირება მოსალოდნელი არ არის. შესაბამისად, ფერმერები გასულ სეზონთან შედარებით მაღალ ფასსაც არ ელოდებიან, თუ საექსპორტო მოთხოვნა არ გაიზრდება.

ქლიავი ქართველი კომერციული ფერმერებისთვის საუკეთესო არჩევანი არ არის, ეს კულტურა ძირითადად მცირე ფართობებზე მოჰყავთ და ძირითადი წარმოებისთვის სხვა ხილს არჩევენ. ქლიავის პოპულარული ჯიშებია „სტენლი“, „პრეზიდენტი“ და „იმპერატრიცა“, თუმცა ყველაზე მეტი პოპულარობით „სტენლი“ სარგებლობს. ამ ჯიშის ქლიავზე დაბალ ფასებს ფერმერები ხშირად უჩივიან და ამიტომაც არ აპირებენ დამატებით ინვესტირებას ამ კურკოვანი ხილის წარმოებაში. თუმცა, არიან ისეთებიც, ვინც გათვლებს სწორედ ქლიავზე აკეთებენ.

„ტირიფონი გარდენსი“ ერთ–ერთი კომპანიაა, რომელმაც თავისი ბაღების უდიდეს ნაწილზე გააშენა ქლიავი. შიდა ქართლის რეგიონში კომპანიას 37 ჰა ფართობზე აქვს ხილი გაშენებული, საიდანაც 6 ჰა ქლიავს უკავია.  კომპანიის თანადამფუძნებელი ზურაბ გოჯიაშვილი განმარტავს, რომ 2018 წელს ქლიავის გაშენების მოტივაცია წინა წლების მაღალი ფასები გახდა. თანაც ამ კულტურის მოშენება შედარებით ნაკლებ დანახარჯებს მოითხოვს. შედარებისთვის, 1 ჰა ფართობზე ვაშლის ინტენსიური ბაღის გასაშენებლად იმდენივე დახარჯეს, რაც 6 ჰა ფართობზე ქლიავის დარგვაში. ქლიავის ექსპორტით ნაკლებად დაინტერესებას გოჯიაშვილი ქვეყანაში ამ კულტურის მსხვილი მწარმოებლების არარსებობით ხსნის. გასულ წელს კომპანიას 1 კგ ქლიავი 0,3 ლარად გაყიდა და ამაზე მაღალ ფასს არც მიმდინარე სეზონზე ელოდება.

თუმცა, არსებობს უფრო მეტი პოზიტიური მოლოდინების მქონე წარმოებაც. რომან ჩხენკელი 5 ჰა ფართობის ქლიავის ბაღს ფლობს კახეთში. აქ რამდენიმე ჯიშის ქლიავი იზრდება, მათ შორის ევროპული და იაპონური. კახეთში, ადგილობრივი კლიმატიდან გამომდინარე, ქლიავი უფრო ადრე მციფდება, ვიდრე საქართველოს სხვა რეგიონებში. ჩხენკელმა უკვე გაყიდა იაპონური ქლიავი და ახლა ევროპული ჯიშების მოსავლის აღებას შეუდგა. მისი თქმით, მიმდინარე წელს რუსეთში შეიძლება ქლიავზე მოთხოვნა გაიზარდოს. მან უკვე მიიღო ექსპორტიორების წინადადებებიც. ჩხენკელის აზრით, ხარისხიან ქლიავზე საექსპორტო ფასი წელს მაღალი იქნება.

ექსპორტზე ორიენტირებული ფერმერების გარდა არიან ისინიც, ვინც იაფიანი ქლიავით მაღალფასიანი პროდუქტის შექმნას გეგმავს. შოთა ბერიძის ოჯახი შიდა ქართლში 20 ჰა მიწის ფართობს ფლობს. ამ ბაღის მთავარი პროდუქტი არ არის ქლიავი, მაგრამ მფლობელი სერიოზულად უდგება ამ კულტურის მოშენებას. 2015 წელს, როდესაც ქლიავის ნერგები დაირგო, მფლობელი ახალი ხილის რეალიზაციაზე ფიქრობდა, მაგრამ პირველი მოსავლის გაყიდვისას მიხვდა, რომ პროდუქტი იაფია და არ არის მომგებიანი. ამის შემდეგ, 2020 წლიდან, ბერიძემ დისტილირებული ალკოჰოლური სასმელის წარმოება დაიწყო – ქლიავის არაყი.

ბერიძე აღნიშნავს, რომ მანამდე ბაზარზე არ არსებობდა ამ რაოდენობის ხარისხიანი ადგილობროივი წარმოების ქლიავის არაყი და ეს შესაძლებლობა ხელიდან არ გაუშვა. მისი აზრით, პროდუქტს პოპულარობის პოტენციალი აქვს როგორც ადგილობრივ, ისე საექსპორტო ბაზრებზე.

EastFruit–ის მონიტორინგის თანახმად, გასულ კვირაში საქართველოში ქლიავის ფასები 0,8–დან 2,5 ლარამდე მერყეობდა. სპეციალისტების მოლოდინით, ფასები სექტემბრის დასაწყისში დავარდება.

EastFruit