ქობულეთში „დრიმლენდ ოაზისის“ კუთვნილ ტერიტორიაზე, ორი მაღალსართულიანი, მრავალფუნქციური კომპლექსის  მშენებლობა იგეგმება.

ქობულეთის მუნიციპალიტეტის საკრებულომ აღნიშნულ ნაკვეთზე მრავალფუნქციური ობიექტის მშენებლობის მიზნით დამტკიცებული კონცეფციის გათვალისწინებით შემუშავებული განაშენიანების დეტალური გეგმა დაამტკიცა.

დავით აღმაშენებლის გამზირ №297-ში არსებულ მიწის ნაკვეთზე გეგმის თანახმად უნდა მოეწყოს სრულყოფილი ინფრასტრუქტურის მქონე მრავალფუნქციური კომპლექსი. ნაკვეთის ფართი შეადგენს 15611,00 კვ.მ-ს.

„გეგმარებითი ერთეული განლაგებულია სანაპირო ზოლის ერთ-ერთ ულამაზეს ადგილზე დავით აღმაშენებლის გამზირისა და თამარ მეფის სანაპიროს შორის, ყოფილი „პანსიონატ ქარიშხალას“ ტერიტორიაზე და მის მიმდებარედ ჩრდილოეთისა და სამხრეთის მხრებიდან მდებარეობს ქობულეთის მუნიციპალიტეტის საკუთრებაში არსებული ნაკვეთები, სადაც განლაგებულია საზოგადოებრივი სკვერები და დავით აღმაშენებლის გამზირიდან თამარ მეფის სანაპიროზე გადასასვლელი გზები, აღმოსავლეთის მხრიდან დავით აღმაშენებლის გამზირი და დაბალი ინტენსივობის მქონე განაშენიანება, ხოლო დასავლეთის მხრიდან თამარ მეფის სანაპირო, პლაჟი და შავი ზღვა, რომლებიც წარმოადგენს საზოგადოებრივ სივრცეს.“ — ნათქვამია დოკუმენტში.

საპროექტო ტერიტორიაზე განსათავსებელი სასტუმრო ტიპის დანიშნულების შენობა ნაგებობა დაკომპლექტებულია სტანდარტული აპარტნომრებით. 25 და 35 სართულიან ორ შენობაში 840 აპარტნომერი უნდა განთავსდეს.