„ნებისმიერ წელს, ახალი გაფორმებული ხელშეკრულება, კაბალური პირობები და ახალი მოთხოვნები იწვევს ფასებზე გავლენას“,- ამის შესახებ დისტრიბუტორთა ასოციაციის თავმჯდომარემ ივა ჭყონიამ რადიო „პალიტრისა“ და „პალიტრანიუსის“ გადაცემაში „საქმე“განაცხადა.

მისი თქმით, გარდა მსოფლიოში მიმდინარე ტენდენციებისა, კერძოდ, საწვავის, ნედლეული გაძვირებისა, ასევე ქვეყანაში ლარის გაუფასურებისა, არსებობს სავაჭრო ქსელების მიერ დაწესებული თამაშის წესები, რომელიც ფასებზე გავლენას ახდენს.

„წლიდან წლამდე, ყოველი ახალი კონტრაქტის გაფორმებისას, ნებისმიერი ქსელური სუპერმარკეტი ცდილობს, პირობა გაიუმჯობესოს. ანუ, ეს რას ნიშნავს, თუ შენ ერთ სუპერმარკეტში შესვლის გადასახადს მიხდიდი 500 ლარს, ახლა უნდა გადამიხადო - 700, რომ მაძლევდი რეტრო ბონუსს - 15-ს, უნდა მომცე 20. იძულებული ხარ გაჰყვე. რომ გაჰყვეს, ეს ნიშნავს, რომ გარდა საერთაშორისო ბაზარზე ფასების ცვლილების, გარდა საწვავის ფასისა და ა.შ დამატებით უნდა განსაზღვრო და ჩადო ფინანსური რესურსი“,-განაცხადა ივა ჭყონიამ.

მისი თქმით, საკითხზე აქტიური მუშაობა დაწყებულია, ჩართულია რითეილ ასოციაციაც და ყველაფერი გაკეთდება იმისთვის, რომ ფასების მაღალი ცვალებადობა არ იყოს და რაც მთავარია, დახლების 30-35% მაინც, ადგილობრივმა წარმოებამ დაიკავოს.

„ბოლო პერიოდში ჩვენ საკმაოდ კონსტრუქციული საუბარი დავიწყეთ რითეილ ასოციაციასთან, რომელიც თუ არ ვცდები, სულ ერი წელია, რაც შეიქმნა. საკმაოდ აქტიურად არიან ჩართულები და მომავალში, ჩვენც აქტიურად ვიმუშავებთ, რომ ფასების მაღალი ცვალებადობა არ იყოს და განსაკუთრებით მინდა, მხარი დავუჭიროთ ადგილობრივ მწარმოებლებს და ფერმერებს. იმიტომ, რომ საკმაოდ მძიმე მდგომარეობაში არიან, ადგილობრივი ფერმერები, რომლებსაც სოფლად მოჰყავთ პროდუქცია, თუმცა არც კი მიუწვდებათ ხელი, რომ მიაწოდონ და რიგ შემთხვევაში, არაერთ პრობლემა ჰქონიათ, იგივე თანხების ამოღებასთან დაკავშირებით.

მონოპოლისტი, როგორც ასეთი, არცერთი ქსელური მოთამაშე არ არის, 40%-ზე მეტს უნდა ფლობდეს ამისთვის. შეთანხმებულ წესებსაც ვერ ვიტყვი, უბრალოდ, როდესაც ერთი მოთამაშე, ერთი მონსტრი შემოვიდა ბაზარზე და დისტრიბუტორებთან ურთიერთობა რაღაც ისეთი თამაშის პირობებით დაიწყო, რომელიც ჩემი აზრით, ძალიან არასწორი იყო ( ჩვენი დანაშაულიც არის), მას გაუვიდა. სხვა დანარჩენებმაც დაინახე, ძალას იკრებენ და რაც უფრო მეტად მსხვილდებიან, მით უფრო მეტად ეხსნებათ მადა.

ნებისმიერ წელს, ახალი გაფორმებული ხელშეკრულება, კაბალური პირობები და ახალი მოთხოვნები იწვევს ფასებზე გავლენას.

ამასთან დაკავშირებით, მომავალ წელს ჩვენ აუცილებლად ვიმუშავებთ აქტიურად, რომ ქართველი მწარმოებლები და ფერმერები წინა პლანზე დავაყენოთ. საერთაშორისო ბრენდებს, რომლებიც წარმოდგენილი არიან, ასე თუ ისე გარკვეული რესურსი აქვთ და ამ რესურსის ხარჯზე ფასებს შედარებით სტაბილურად ინარჩუნებენ, მაგრამ ძალიან უჭირთ ქართველ მწარმოებლებს.

ამიტომ, აქტიურად ვიმუშავებთ, რომ მინიმუმ დახლების 30-35% მაინც ქართველ მწარმოებლებს დავუთმოთ და ადგილობრივი მწარმოებლები გავაძლიეროთ“,- განაცხადა ივა ჭყონიამ.

bpn.ge